Ndơn nau jă bah Kruanh Quốc hội Vương Đình Huệ, Kruanh Quốc hội dak Campuchia Samdech Khuon Sadary khâl ngăn Việt Nam ntơm lơ 30/11 tât 2/12, Kruanh Quốc hội Vương Đình Huệ ƀư tơm nar vơt, jêh nê, bar Kruanh Quốc hội hŏ tâm nchră. Bar Kruanh Quốc hội kŏ lah rjăp nau mra ntrŭt dăng lơn tay nau tâm boh đah bar dak tâm rơh tât. Bar ding ndrel uănh khlay nau ƀư nâp ndrel n’hao nau tâm dăch, tâm rnơm chính trị; tâm rgop ngăn ƀư ueh nau ton lan nsum, ăp nau ton, nau nchrăp tâm boh.

Ngăn lah rgum nar rƀŭn đah rđau kan gưl prêh bar Đảng năm 2023, rgum rơh tâm mâp đah pe nŭih kan dâk bôk năp bah 3 Đảng Việt Nam-Campuchia-Lào. Việt Nam-Campuchia n’hao nau ntrŭt dăng tâm boh neh dak, rnă njrăng, uănh aơ lah n’gâng tơm bah nau tâm boh bar dak, mro lah ntŭk nsing nâp tâm nau đăp mpăn neh dak, rdâng tam đah ăp nau ntul rlong mpeh nau rnă njrăng mô tă geh, n’hao nau tâm boh mât nâp trong mạng, lŏ tâm rgop nau ndâk ntrong nkuăl n’har bri đăp mpăn, nâp nâl ndrel hun hao./.