Ôi 13/3, ta Jay Quốc hội, Kruanh Quốc hội Vương Đình Huệ wơt Kruanh ăp nhih pah kan ntơh măt bah Việt Nam gŭ ta dak bah dih năm kan 2023-2026. Lah ta rơh mâp măt, Kruanh Quốc hội dăn đă Kruanh ntơh măt ăp nhih pah kan bah Việt Nam ta dak bah dih ân n'hao dăng lơn đŏng tâm boh đah Quốc hội he đah nhih pah kan njêng pháp luật dak tơm jay gay njêng tâm boh uĕh lăng đah ăp Nghị sỹ bah dak tơm jay.

Ta rơh wơt, Kruanh Quốc hội Vương Đình Huệ lah rjăp, tâm boh rgop uĕh gay neh dak geh nău nsing nơm, nău khlay n'hanh ntŭk gŭ kan têh lam ntŭr neh kơt aƀaơ. Rlơ̆ tay, ntŭk gŭ kan, nău khlay, nău nsing nơm bah neh dak aƀaơ nta trong dơh lĕ mpeh nsan n'hanh suan dăng, nta trong dơh an pah kan tâm boh dak bah dih. Kruanh Quốc hội dăn đă tâm boh đah ăp dak n'hanh lơn lah Việt Nam he lah suan dăng rgum. Kruanh Quốc hội dăn đă, Kruanh nhih pah kan ntơh măt bah Việt Nam ta dak bah dih rgop uĕh mât nău mât nâp đăp mpăn neh dak, ƀư tơm lam lĕ rngôch bah neh dak, mât rnă njrăng neh dak "bah ơm, bah ngai", mât njrăng nău đăp mpăn n'hanh rhơn răm bah ƀon lan. Aơ lah nău dơn kan mbro, jŏ jong, dŭt khlay ân way nkah n'hanh tĭng ƀư du  trong mô dĭl r'êl.