VOV4.M'nông: Tâm rnôk hăn khâl n'hanh pah kan ta Lào bah Mpôl kruanh rđău kan Nhih pah kan phat dôih ƀon lan gưl têh Việt Nam ntơm bah 09 – 13/8, nar 12/08,  Chánh án nhih phat dôih ƀon lan gưl têh Nguyễn Hòa Bình ndrel mpôl  hăn hŏ tât mâp dơm Tổng bí thư, Kruanh dak Lào Thongloun Sisoulith n'hanh Kruanh Quốc hội Lào Saysomphone Phomvihane. Ta rơh wơt, Chánh án nhih phat dôih ƀon lan gưl têh Nguyễn Hòa Bình hŏ mbơh đah Tổng Bí thư, Kruanh dak Thongloun Sisoulith lôch jêh rơh Tâm nchră đah nhih phat dôih ƀon lan gưl têh Lào n'hanh nhih phat dôih ƀon lan gưl têh Việt Nam; lôch jêh tâm nchră Nhih phat dôih ăp n'gor n'har bri 3 dak Lào - Việt Nam - Campuchia tâl 6 n'hanh nău mbơh nsum lah rjăp  nău mĭn bah ăp ding tâm nău n'hao dăng tâm boh lhăt tâm trong kan nhih phat dôih pe dak. Tổng Bí thư, Kruanh dak Lào Thongloun Sisoulith mpơl nău rhơn wơt mpôl  hăn khâl n'hanh pah kan ta Lào rơh dja; nkre lah rjăp, n'gâng kan nhih phat dôih Lào n'hanh Việt Nam ân kan nsum lhăt lơn đŏng gay ngăch nkra ăp nkô̆ nău ntoh luh, nsĭt tay nău dơi ngăn ngăn an nuĭh ƀon  lan tâm ban kơt nău nsing nơm bah nuĭh ƀon lan đah n'gâng kan, tâm ban kơt rdâk njêng nuih n'hâm nsing nơm ƀon lan đah Đảng, Ngih dak./.

Nuĭh rblang: Điểu Thân