Geh tât nău hang rbăn mlâm ndrôk dak toh geh srê n’hanh khĭt ndal, kêng măng 9/8, UBND n’gor Lâm Đồng geh sam ƀŭt ndal đă N’gâng kan Tuch tăm mât rong n’hanh hun hao ƀon lan, UBND ăp nkuăl, nkual ƀon têh tâm n’gor rgŏ jă cán bộ thú y n’hao an ăp nkuăl geh srê, rgum mbơh ƀư ăp trong njrăng n’gang srê ji ndŭl ta mpôl ndrôk dak toh.

Ndrel đah nău an rlu dŏng ăp ntil vaccine njrăng n’gang srê ta mpôl ndrôk gay uănh nđôi, năl nkô̆ nău ndrôk dak toh ji ndŭl djroh, UBND n’gor Lâm Đồng đă N’gâng kan tuch tăm mât rong n’hanh hun hao ƀon lan, UBND ăp nkuăl Đơn Dương n’hanh Đức Trọng tâm pă rmôt thú y tât ăp rnăk geh ndrôk geh srê gay ntĭm ƀư tĭng ăp trong njrăng n’gang srê. Lơn lah, uănh nđôi, kơp tay rjăp trong kan uănh kơp nkhĭt roch, mô an geh nu nău tăch ndal, rdêng ndrôk srê mô lah nkhĭt roch ndrôk geh srê tâm nkual geh srê; uănh nđôi rjăp nău nchoăn rdêng ndrôk luh bah dih xă, nkuăl, n’gor, ngăn lah đah ndrôk, rpu dak toh geh nuh srê.

Kơt Đài TNVN lĕ lah, hang rbăn ndrôk dak toh ta 2 nkuăl Đơn Dương n’hanh Đức Trọng bah n’gor Lâm Đồng ntoh saơ mô sa, ji ndŭl djroh luh mham jêh nĕ khĭt. Kơp tât 9/8, ngih pah kan dơi kan ƀon lan djôt dơn geh rlău 3.700 mlâm ndrôk dak toh geh ji ndŭl n’hanh rlău 100 mlâm ndrôk lĕ khĭt.