Bôk nau kan nkra mhe, pơk hvi yôk Prenn Đà Lạt lah nau kan gung trong gưl III nkuăl yôk, geh rnoh jong 7,4km, ân ndeh hăn 4 ntrong, măt trong hvi 15,5 m ndrel măt trong nchuăt lah 14,5 m, hvi rlau trong ơm. Njokl trong geh nkra 4 ntŭk njưh ndrel 2 ntŭk tach hvi. Bôk nau kan geh rnoh ntuh kơl 553 rmen tă bah tơm prăk n’gor. Rơh ƀư lah 11 khay, jêh bah năp lơ 31/12/2023.

Ntoh nau tâm nar nkra, wa Trần Văn Hiệp, Kruanh UBND n’gor Lâm Đồng mbơh, nau ntuh kơl nkra yôk Prenn lah nau khlay, ndal ndrel geh nau dơi mpeh hun hao gung trong bah n’gor Lâm Đồng, đă ntŭk ƀư kan, uănh nau ndâk ân geh đăp mpăn nau nkra nâp, nau pah kan ndrel răk ntŭk ntu. Ăp n’gâng kan, ntŭk kan bah n’gor mra kơl an, pơk trong nơih gay ntrŭnh ƀư tâm di nau ngăch./.