Lôch bơi 2 năm an manh nău way ntuh kơl n'hanh mât dŏng nău kan pâl nđaih tuch tăm mât rong, âk nkô̆ nău ntoh luh ƀư ntil pâl nđaih "wăch rgum năch" dja mô hŏ njêng dơi jâng chuat hăn đăt ndal gay hun hao tâm di. Aƀaơ n'gor Lâm Đồng dôl ntrôl dăng joi trong droh rklaih ntŭk kô̆ yơn kol khan.

Tât rnôk dja, lĕ rngôch tơm prăk ntuh kơl an trong kan pâl nđaih tuch tăm mât rong bah Lâm Đồng nklăp 377 rmen prăk, ta rnoh neh hvi rlău 300ha. Tâm nê, geh 212 ha neh tuch tăm, 9ha neh rdâk njêng, hôm ƀa ƀă lah neh dŏng an nău kan êng ƀa ƀă. Yơn lah, rlău bơi 2 năm Lâm Đồng an dŏng nău way manh ƀư mpeh ntuh kơl n'hanh mât dŏng pâl nđaih tuch tăm mât rong ta nkuâl, âk nkô̆ nău ntoh luh, kŏ kol mhe ntoh luh tay.

        Na nê̆, ndrel đah 33 ntŭk pâl nđaih tuch tăm mât rong hŏ dơi n'gor pă an siƀŭt manh kan bah năp nê nơh, âk ntŭk pâl nđaih tuch tăm mât rong mhe mâp âk wăk kol đŏng, mô hŏ geh nău tâm ban ŭch tâm trong an tĭng ƀư. Lơn lah ƀư lôch jêh ăp rêng ƀư mpeh siƀŭt mât kan, đăp mpăn ăp nkô̆ nău mpeh rnoh di srêt rdâk njêng, dăp rgum dŏng neh, dăp rgum rdâk njêng, rnoh âk ntŭk geh chor ntưm ta neh tuch tăm, rgâl neh tuch tăm jêng neh mô dŏng kan tuch tăm. Nău dja hŏ jêng suan ntrôl têh ƀư ăp trong nchrăp kan pâl nđaih tuch tăm mât rong mô hŏ dơi an ƀư ntuh kơl, mô lah ntuh kơl  mô hŏ tât di rnoh, mô hŏ đăp mpăn tŏng di đah nău ŭch geh ntŭk hăn ŭanh pâl bah năch.

        Tĭng wa Đoàn Ngọc Bích, Giám đốc mât bôk kan Công ty Xuất nhập khẩu Tám Trình, ta nkuâl Lâm Hà (Lâm Đồng), rlău ma ăp jêr jŏt dja, nkô̆ nău dơi an năch manh gŭ bĭch  măng ta nkual, ntŭk pâl nđaih tuch tăm mât rong ân dơi n'gor mĭnh uănh nkra đŏng.

         "Ntŭk pâl nđaih bah mpôl hên geh tât mir cà phê. Nău ŭch lah gay năch hăn tât uănh pâl mpeh rnôk ƀư cà phê, nkret njêng, mhâm ƀư wâr kĭn cà phê. Yơn lah dôl kol du đêt nkô̆ nău mpeh siƀŭt nê đŏng. Nkre, pâl nđaih tuch tăm mât rong ri mô geh lĕ ma an manh gŭ bĭch măng, năch dak bah dih hăn tât Việt Nam ri ŭch gŭ tay ta ƀon lan dja gay bu joi gĭt. Nê lah ngoăy tâm ăp nău ôp têh bah ntŭk pâl nđaih tuch tăm mât rong dja".   

          Lâm Đồng lah n'gor lor bôk năp lam dak an ƀư trong ntĭt leo pâl nđaih tuch tăm mât rong, nkre đah pâl nđaih n'hanh nkre đah nău kan tuch tăm mât rong. Wa Phạm S, Groi kruanh UBND n'gor Lâm Đồng lah rjăp, aƀaơ ntil pâl nđaih dja hŏ ntik uĕh suan dăng, săk geh n'hanh dơh uĕh, mât dŏng geh nău tam ăp tơm ndơ mpêt khlay njêng luh ndơ geh ƀư tuch tăm rhŏ dŏng an pâl nđaih, nta joi nău kan, n'hao nău geh wăng sa n'hanh nkoch n'hơ ndơ geh ƀư tuch tăm bah n'gor. Yor kơt nê̆, ndrel đah bôk nău kan joi trong nkra gay droh rklaih jêr jŏt, kŏ kol, Lâm Đồng ân gĭt tât rdâk njêng ăp nău way kan na nê̆, kloh rvah gay ntrŭt ntrôl pâl nđaih tuch tăm mât rong nsing ta nău đăp mpăn ăp quy định bah pháp luật. wa Phạm S, lah:

         "Tâm bah ri aơ nơh, n'gor geh 33 ntŭk pâl nđaih tuch tăm mât rong yơn rnoh ntuh kơl, têh hvi n'hanh ndơ geh ƀư tâm trŭp đah ăp trong ntĭt leo ƀư. Tâm let năp tay, n'gor geh trong rƀŏng an ƀư lor, ntrŭt nsôr ƀư ăp trong ntĭt leo têh hvi lơn, đăp mpăn rnoh hvi neh ntuh kơl ƀư rdâk njêng, ndơ geh ƀư mô geh tâm trŭp, geh nău blău ƀư mhe êng, tâm di trong rƀŏng bah ntŭk pâl nđaih, rgâl trôk nar. Ăp ntŭk êng mô geh ndơ ma ƀư dơi, Lâm Đồng dơh geh ri mbra ntrŭt nsôr ntik hvi gay njêng luh ndơ geh ƀư pâl nđaih mha êng n'hanh hun hao jŏ jong tâm let năp tay".

Kêng dŭt năm 2022 mhe aơ, Sở Văn hoá Thể thao n'hanh pâl nđaih n'gor Lâm Đồng hŏ ƀư  tâm nchră ŭanh năl n'hanh đă joi geh trong nkra an nău kan pâl nđaih tuch tăm mât rong. Lah ta rnôk tâm nchră, wa Phạm S an lah, tâm bah ri aơ nơh, n'gor Lâm Đồng lah ngoăy tâm ăp n'gor lor bôk năp lam dak mpeh hun hao pâl nđaih tuch tăm mât rong, bah nê rêng lam rup gui pâl nđaih, bri dak uĕh măt uănh n'hanh văn hóa nuĭh Đà Lạt-Lâm Đồng, wăch rgum âk rnoh năch, nta joi geh tay nău kan n'hanh tơm geh wăng sa ma trong tăch ndơ ta ntŭk. Yơn lah, tâm rnôk an ƀư hôm mâp du đêt jêr jŏt, kŏ kol đŏng. Groi kruanh UBND n'gor Lâm Đồng Phạm S jao an n'gâng kan, ăp nkuâl geh tât, ôp ŭanh tay ăp tŏng lam lĕ rngôch ăp ntŭk pâl nđaih tuch tăm mât rong hŏ dơi kơp dơn, ntĭm nti ăp ntŭk kơi ntop tay, ƀư lôch jêh ăp drăp ndơ dŏng gay dăn đă ŭanh năl di tay n'hanh kơp dơn trong ntĭt leo pâl nđaih tuch tăm mât rong; rgum nchih ăp nău rgop, dăn đă bah đại biểu gay kơi ntop, ƀư lôch jêh tay ăp nkô̆, rnoh tât kan n'hanh nău mbơh Ủy ban nhân dân n'gor mĭn uănh, ntop kơl, rgâl nkra nău way kan tâm di đah nô nău ngăn geh, gay ntik uĕh tay ăp săk geh, dơh uĕh dôl geh aƀaơ, hun hao pâl nđaih tuch tăm tĭng trong rƀŏng hŏ ndơ̆ luh.