Ntơm bah năp tết nguyên đán tât aƀaơ, nkual bri n'ho dơh ŭnh sa ta tiểu khu 263 mpeh xã Phúc Thọ, nkuâl Lâm Hà (Lâm Đồng) way dơi Ban mât njrăng bri tu dak nching sial Lâm Hà n'hanh ăp rnăk dơn mât ntrôl dăng pah kan hăn treng nđôi, rsong hăn, tâm pă nuĭh way gŭ kâp njrăng mbro gay ơm ban saơ lah geh ŭnh sa. Tĭng wa Dương Thanh Quang, Kruanh rmôt way mât njrăng mbrô 5, Ban mât njrăng bri tu dak nching sial Lâm Hà, ntơm bah bôk khay wai, cán bộ tiểu khu hŏ rgum mpôl kan jik kuaih trong mbor njrăng n'gang ŭnh sa bri n'hanh rdâk ƀư ăp ntŭk chuanh kâp njrăng njrăng n'gang ŭnh sa bri.

          "Oh nô mpôl hên tâm pă nău kan, ôp uănh tay mpôl dơn mât njrăng gay njêng trong nchrăp gŭ kâp njrăng ndăng măng nar. Nkre, n'hao tay âk mpôl kan gay ntop kơl ta ăp ntŭk dơh hô ŭnh sa ndrel oh nô hăn rsong uănh lĕ ma măng".

        Lâm Hà geh rlău 34.000 ha bri, lơn âk lah neh bri tăm tâm rlŭ, kâng n'har đah mir ba bah nuĭh ƀon lan jêng geh ma nău ŭnh sa ta rnoh hô. Wa Hồ Nghĩa Nam, Groi kruanh Ban mât njrăng bri tu dak nching sial Lâm Hà an gĭt, ndrel đah ntrôl dăng pah kan hăn rsong ŭanh, nău rdâk n'hanh an ƀư ăp kôp ăp trong nchrăp njrăng n'gang ŭnh sa bri dôl dơi đơn vị ŭanh khlay tĭng ƀư đŏng.

        "Ban mât njrăng bri hŏ nkra tay ăp chuanh gơng kâp njrăng ŭnh sa n'hanh rvăt năp du đêt ndơ ntrŭp dŏng gay an pah kan njrăng n'gang ŭnh sa bri, puh n'hât ŭnh sa bri. Aƀaơ, ăp rmôt way rnâng kan dôl ƀư lôch jêh ăp nău kan, đăp mpăn tâm năm 2023 mô an geh nău njrăng n'gang ŭnh sa bri".

          Lâm Đồng lah n'gor geh rnoh hvi neh tăm tơm n'ho n'hanh ăp ntil  bri tăm dơh ŭnh sa, đah lĕ rngôch rnoh hvi rlău 513.000 ha. Mhe bôk khay wai yơn n'gor hŏ geh 3 tơ̆ ŭnh sa pih rêp ta nâm n'hâm bri. Nơm geh ngăch saơ  n'hanh puh n'hât jêng mô geh khuch khat roh huach mpeh bri. Aƀaơ trôk nar ta Lâm Đồng dôl kro phang, duh hô, geh ma nău ŭnh sa bri âk. UBND n'gor Lâm Đồng hŏ n'gluh an dŏng âk siƀŭt ntrŭt ntrôl, rđău đă ăp nhih pah kan, đơn vị dơi kan mô thơ tha, uănh lhơ, rgum an ƀư ăp kôp âk trong nkra pah kan njrăng n'gang ŭnh sa bri.