Măt nar mhe luh, wa Hồ Sỹ Trung, ntŭk tơm mir V-Ori ta xă Ea Yông, nkuăl Krông Pắc, n’gor Dak Lak lĕ hăn khâl mir cà phê hôm e mpê̆ tŭk. Uănh nger na nê̆ tĭng nkao dôl ntơm rgâl bah pŭt jêng nglang, wa Trung an ƀư trong tŏ, bôl mir mô têl mô tŏng dak. Wa Trung an gĭt, aơ lah du trong kỹ thuật gay ndruch ngăch cà phê dang nkao, đăp mpăn geh nkual mir nkao dăng nglang, ƀô kah, rhŏ an năch pâl nđaih tât đah lễ hội cà phê Buôn Ma Thuột rơh tal 8:

“Mpôl hên dôl nchrăp ăp nar, gay ndrel đah ƀon lan, ndrel ta ntŭk gay wơt ăp nuĭh tât. Geh du nău ton mbra an cà phê dang nkao tâm lễ hội, bah nar 10 tât nar 14. Lah uănh di nar nkao dang ri nar aơ ntơm tŏ dak, gay geh âk n’ging nkao dang nglang, ƀô kah nklang mir cà phê. Wơt rhơn ăp nuĭh tât đah Lễ hội cà phê Buôn Ma Thuột n’hanh tât đah Krông Pắc.

N’gul khay 3 ta Dak Lak lah yan lễ hội, lah yan nkao cà phê dang đŏng. Yơn ntil nkao nglang ƀư jêng nău lư êng bah Dak Lak lŏ dang du rơh. Ăp mir knŭng dang 2 rơh n’hanh du rơh ri jŏ tâm 3 nar. Yôr nê, âk nuĭh tơm farm cà phê ta n’gor lĕ mĭn njêng trà nkao cà phê gay dơi mât ƀô kah tâm âk khay. Hôm năch, du đêt lĕ săch tât đah Buôn Ma Thuột bah năp lễ hội cà phê, gay dơi nkre ngêt nkao rih nkre ngêt trà. Wa Mai Thị Thu Thủy, năch n’gor Ninh Bình lĕ tât Buôn Ma Thuột bah dŭt khay 2, jêng wa rlong ngăn n’ăp ƀô kah nkao cà phê ta ăp mir n’hanh ntil trà mhe, rơh bôk năp ngêt. Wa Thủy gĭt saơ:

“Jêh rnôk hăn ƀư ngăn mir nkao cà phê dôl dang, chŭp rup đah mir cà phê, lŏ dơi ngêt ka chok trà cà phê kơt aơ dŭt uĕh. N’hanh gâp mĭn bu ur mbra ŭch ngêt dak aơ”.

Lễ hội cà phê Buôn Ma Thuột rơh tal 8 năm 2023 ntơm ƀư na nê̆ ta măng aơ lah du lễ hội dŭt mhe. Nĕ mô knŭng lah ăp nkô̆ nău mhe dơi mpôl rdâk ƀư săch, bah ăp mpôl năch dak bah dih rgop răm đah ăp nău uĕh kah văn hóa bah neh dak nơm, bah dŭt âk ntil cà phê n’hanh nuĭh mpli cà phê bah Việt Nam n’hanh lam ntŭr neh. Lễ hội cà phê Buôn Ma Thuột rơh aơ hôm e mhe yor ăp nău ƀư rƀŏng ta ăp ntŭk tâm n’gor, ntŭk geh ăp mir sầu riêng, vải, nhãn, cam, bưởi... dôl yan nkao dang, ƀô kah; geh ăp ƀon lan n’gŭr răm chĭng gông n’hanh nuih n’hâm rŏng năch. Ta ăp ntŭk, ƀon lan, nuĭh ƀon lan Dak Lak gĭt saơ nơm lah nuĭh tơm bah lễ hội n’hanh mbra wơt năch đah ăp ndơ uĕh ngăn. Yuh H Tít Aliô, ta ƀon Ako Dhông, nkual ƀon têh Buôn Ma Thuột, du ƀon mhe dơi kơp dơn lah ƀon pâl nđaih nsum mpôl gĭt saơ kơt aơ:

“Du yan lễ hội aơ pơng geh tât mô knŭng lah cà phê ma pơng hôm lah văn hóa bah nuĭh Êđê ta Buôn Ma Thuột jêng ƀon lan dŭt răm n’hanh nđơr kâp. Gâp saơ ƀon lan n’gŭr lơn, dôl ntop kơl ndăn nchrăp n’hanh an rhŏ yan Festival cà phê aơ. Ƀon lan geh ăp nău ƀư kơt chĭng gông, ndơ ngêt sa, geh ngêt cà phê an dơm tay. Tâm ƀon ri geh ăp rnăk kơt Ay Ray, Tăng Bi, quán cà phê A Rul, quán cà phê Ako Dhông khân pơng dôl nchrăp dŭt ndăn an nău Festival rơh aơ.

Rlău 100 năm têh jêng hun hao ta nkual yôk têh lâng Dak Lak, ndrel đah rnoh khlay wăng sa têh lơn, cà phê jêng ntăk krêp văn hóa, hăn ndrel văn hóa bah bơi 50 rnoi nuĭh bah lĕ 3 nkual Bắc Trung Nam. Bah nĕ, jêng du yan lễ hội jông hvi ta nkual neh aơ, bah lễ hội văn ăp rnoi nuĭh tây Bắc, đông bắc, tât hội xuân quan họ Bắc Ninh, tât Lễ hội cà phê n’hanh Lẽ hội Sầu riêng. Lễ hội cà phê Buôn Ma Thuột rơh tal 8, bah nar 10 tât 14 khay 3, mbra djôt tât an năch n’ăp du nău nkoch jong mpeh cà phê n’hanh ăp ndơ tơm si lĕ ƀư jêng an ăp rnoi nuĭh ta nkual neh aơ.