Tâm rnôk hăn khâl ngăn dak he, kêng măng ntri (13/12) ta Hà Nội, Tổng Bí thư Nguyễn Phú Trọng ndrel I ur n’hanh Tổng Bí thư, Kruanh Trung Quốc Tập Cận Bình ndrel I ur râng mâp măt dêh bên n’hanh tâm nđŭr đah ăp nuĭh gĭt blău tâm rnglăp, rơh kơn mom ndăm 2 dak Việt Nam-Trung Quốc.

 Lah ta rơh mâp măt, Tổng Bí thư, Kruanh Trung Quốc Tập Cận Bình lah rjăp, ăp nău way tâm boh, tâm nđŭr ƀon lan bar ding, tâm nê geh tâm nđŭr văn hóa, tâm mâp đah ăp n’gor n’har bri bar ding mbra rgop n’hao nău tâm rŏng bar ding, ndrel nkoch nău rêh let năp tay lam ntŭr neh âk rgoh n’gơ rgop âk lơn an n’gâng kan rgâl mhe bah ntil kon nuĭh. Ntơh măt nuĭh gĭt blău n’hanh rơh kơn mom ndăm bar dak lah rjăp mbra nsrôih lĕ n’hâm suan he, rgop tĭng ƀư nău mĭn nsum bah ăp kruanh rđău kan gưl têh bar Đảng, bar Ngih dak mpeh rdâk njêng “Jâng nsing tâm rnglăp”, rgop ngăn ngăn gay bun dăp nău tâm rnglăp Việt Nam- Trung Quốc.