Ta nkuăl Cư Kuin, Hội chữ thập đỏ n’gor Dak Lak mhe ƀư bôk nău kan Rgum tăch ndơ Tết kơl nuĭh năm 2024. Bôk nău kan lĕ an 33 nklâm ndơ n’hanh 30 phiếu hăn chợ mô sŏk prăk, dĭng lĕ khlay 233 rkeh prăk an nuĭh ƀon lan geh nău rêh jêr jŏt ta lam nkuăl Cư Kuin. Ăp ndơ mô sŏk prăk geh ƀănh chưng, ƀănh kẹo, ndơ ndŏng (dak ngi dak mắm, xì dầu, sĭk, ƀôt ngot, mì tôm, phe). Tâm trôm bôk nău kan hôm geh ăp nău ƀư kơt kreh sŏk an dơm, nchih thư pháp; ndrơng ndơ nklâm ƀănh chưng; ndrơng ndơ chŭp rup n’hanh râng ăp nău pâl way ơm. Nkre dơi dơn ndơ tết bah bôk nău kan, nô Y Gu Buôn Yă, ƀon Ea Mtă, xă Ea Bhok, nkuăl Cư Kuin nkoch:

Gâp dŭt rhơn, dŭt lah uĕh ăp nuih n’hâm lŏng lĕ ƀư du bôk nău kan dŭt khlay n’hanh dŭt răm an ăp nuĭh geh nău rêh kơt mpôl oh, mbra kơl an mpôl oh geh du nău Tết hơm răm, uĕh m’ak.

Thĭng wa A Yun H’Hương, Kruanh Hội chữ thập đỏ n’gor Dak Lak, bôk nău kan Rgum tăch ndơ kơl nuĭh năm 2024 mbra an 25 rbăn nklâm ndơ, dĭng lĕ 17,5 rmen prăk an nuĭh ƀon lan geh nău rêh jêr jŏt tâm lam n’gor. Rlău ma 3 bôk nău kan ta ăp nkuăl Cư Kuin, Cư Mgar n’hanh Ea Kar yor Hội chữ thập đỏ n’gor tâm rgop đah n’gâng kan ƀon lan ƀư, ăp ntŭk ƀa ƀă mbra săch trong ƀư tâm di đah nău geh bah ntŭk nơm.

Tă bah ntop kơl Tết kơl nuĭh rơh aơ dŭt lah uĕh ăp nuĭh ntop kơl, ăp nuĭh lŏng bôk tôr an bôk nău kan, mpŏng năm tât ăp nuĭh ntop kơl n’hanh ăp nuĭh lŏng bôk tôr mbra hăn ndrel đah Hội chữ thập đỏ gay ƀư ăp bôk nău kan đăp mpăn nău rêh jêng nar lơ uĕh lơn, rgop kơl an nuĭh ƀon lan geh tết răm ,m’ak, hơm răm uĕh lăng.

UBND n’gor Dak Lak mhe an Trong nchrăp pă prăk chop khâl n’hanh an ndơ ăp nsum mpôl, êng nuĭh tâm rơh Tết Nguyên đán Giáp Thìn năm 2024. Tĭng nĕ, n’gor Dak Lak ntrŭnh an prăk chop khâl n’hanh an ndơ an ăp nsum mpôl mpôl, êng nuĭh tâm rơh Tết Nguyên đán Giáp Thìn năm 2024 rlău 77 rmen prăk.

Di rơh aơ Kruanh n’gor Dak Lak mbra ƀư ăp mpôl hăn khâl, an 51 nklâm ndơ an nuĭh geh soan ntoh lư n’hanh du đêt Ngih pah kan , công an, n’har bri n’hanh tahen ta lam n’gor. Ndrel đah nĕ, Ủy ban Mặt trận Tổ quốc n’gor, Hội chữ thập đỏ n’gor Dak Lak ƀư trong nchrăp rgŏ jă ăp tơm prăk gay hăn khâl, an ndơ ân rnăk ach o, rnăk geh nău rêh jêr jŏt n’hanh ăp nuĭh dơi kơl... ta nkual jru ngai, nkual rnoi mpôl đêt gay ăp nuĭh geh soan dơi wơt Tết răm m’ak, hơm răm.

Nău đăp mpăn ăp nuĭh geh Tết n’hanh “Mô geh nuĭh ntlơi bah kơi” dôl dơi N’gâng kan Lao động Thương binh n’hanh xã hội ndrel ăp gưl, ăp n’gâng kan, ƀon lan uănh tât mbơh ƀư. Wa Phạm Hồng Đào, Groi Chánh văn phòng Ngih dak mpeh n’hŭch ach o (N’gâng kan Lao động-Thương binh n’hanh xã hôi).

N’gâng kan ƀon lan kơt ăp nuĭh lŏng bôk tôr n’hanh ăp ngih pah kan geh tât mbra geh trong, rgŏ jă ăp nuĭh êng gay ndrel ntop kơl, đăp mpăn an wơt năm mhe răm m’ak, uĕh lăng kơt ntĭm rđău bah Ban bí thư, Chính phủ n’hanh Thủ tướng Chính phủ. Dŭt âk ntop kơl phe, way dŭt năm geh ntop kơl ndơ nĕ.  Bah meng nău geh ndơ bah Kruanh dak, ndơ bah ăp ntŭk. Nău nĕ bôl nău geh tơm prăk bah n’gor, mbra nsrôih tâm nău geh đăp mpăn ngăn a nuĭh ƀon lan tăk mât uănh. N’gâng kan Lao động Thương binh n’hanh xã hội lĕ geh sam ƀŭt njuăl ăp ntŭk hôm, dăn đă uănh tât ntĭm rđău mât uănh Tết an nuĭh ach o đăp mpăn di nău ntrŭnh. Bah meng nĕ ƀon lan geh trong uănh nđôi nău ƀư tĭng aơ gay đăp mpăn di nuĭh mbra dơi geh, mô an geh nău rlăm mô lah mplư rlăp nău aơ.

Tết Nguyên đán Giáp Thìn dôl êp tât. Mât uănh an nuĭh ach o, an nuĭh mô lap, đăp mpăn ăp nuĭh dơi geh wơt Tết răm m’ăk, hơm răm lĕ jêng nău way uĕh bah rnoi nuĭh Việt Nam.