Ôi 2/8, ta nkual ƀon têh Buôn Ma Thuột, n’gor Dak Lak, Mpôl pah kan bah Tiểu ban wăng sa rêh jêng kon nuĭh Đại hội đại biểu lam dak tâl XIV bah Đảng hŏ pah kan đah ăp n’gor nkual Tây Nguyên. Groi Thủ tướng Chính phủ Trần Lưu Quang ƀư tơm rơh pah kan. Ăp siƀŭt mbơh lah rjăp, Tây Nguyên geh âk ndơ dơh uĕh tâm hun hao wăng sa kơt: tuch tăm mât rong, công nghiệp nkret njêng ndơ tuch tăm, si  gle, ŭnh nar sĭt jêng tay, hun hao công nghiệp kuĭh joi, nkret njêng bauxite, hun hao pâl nđaih nkre đah văn hóa săk  tơm rnoi nuĭh.

Yơn lah, hun hao wăng sa nkual  mô hŏ geh suan đăt ndal, ăp n’gâng kan wăng sa tơm rgop mô hŏ kloh. Kuanh ăp n’gor Tây Nguyên an lah, đah ntŭk dơh uĕh mha êng, Tây Nguyên ân geh trong kơl mha êng gay nkual hun hao dăng, luh bah nkual rđŭng lam dak. Tâm ban ŭch đah nău mĭn nê, Groi Thủ tướng Chính phủ Trần Lưu Quang lah rjăp, Tây Nguyên lah nkual way geh nău kan, ntŭk gŭ khlay mha êng mpeh wăng sa, chính trị, rêh jêng kon nuĭh, njrăng n’gang neh dak, rnă njrăng bah lam dak, jêng nuih n’hâm nsum lah ân geh nău an lor trong kơl, tơm  ndơ an nkual dja tâm let năp tay.