Kêng măng nar 23/2, mpôl kan uănh nđôi bâh Quốc hội yor wa Dương Thanh Bình, Ủy viên rnâng kan Quốc hội, kruanh rnâng kan dân nguyện bâh Ủy ban thường vụ Quốc hội ƀư tơm hăn lĕ geh rơh pah kan đah UBND n’gor Dak Lak mpeh nău rgum, mât uănh n’hanh dŏng ăp rnoh kan kơl an nău kan njrăng rdâng nuh srê Covid-19, nău ƀư tĭng nău kơl kan pháp luật mpeh trong kan dak si, ntŭk kan mât njrăng.

Tĭng nău mbơh tơih ta rơh pah kan, bâh năm 2020 tât năm 2022, n’gor Dak Lak lĕ rgum geh bâh tơm prăk ngih dak, rnoh prăk 986 rmen 632 rkeh prăk an nău kan njrăng rdâng nuh srê Covid-19. N’gor lĕ rgum rnoh kan n’hanh dơn bâh ntŭk kan êng tâm n’hanh bah dih dak 71 rmen 355 rkeh prăk. Bâh rnoh prăk aơ, ăp ntŭk kan, n’gâng kan lĕ leo kan mbơh tơih nău kan rvăt năp ndơ, dak si, ndơ dŏng dak si gay ma tâm di đah nău kan njrăng, rdâng nuh srê Covid-19 ta ntŭk. N’gâng kan dak si n’gor Dak Lak lĕ mât uănh ntĭm nti cán bộ dak si ta ntŭk n’hanh n’gâng kan dak si njrăng n’gang. Bâh nĕ n’hao nău dơi mât uănh nuh srê, geh ngăch saơ ơm, leo ƀư njrăng rdâng ăp nuh srê n’hanh njrăng bah nuh srê. Wa Dương Thanh Bình, kruanh rnâng kan dân nguyện-ủy ban thường vụ Quốc hội nkah đă n’gor an geh uănh năl tay nău ndơ̆ du đê̆ ntŭk kan dak si mpeh ta ntŭk gay ma mât uănh, ƀư kloh nău kan bâh trạm y tế xã, phường đah nău kan uănh, săm nău ji đah thẻ bảo hiểm y tế, n’hao nău dơi uănh săm ji, pă dak si ta ngih dak si nkuăl ghay ma bah ir rnoh nuĭh ji hăn săm âk ir ta ntŭk ngih dak si ba lơ, mât uănh tay mpeh rnoh ntuh kơl an ăp trạm y tế n’hanh ntŭk kan dak si ba dâng ta lam n’gor.