Tâm jrô hồi sức bah Ngih dak si Nhi Gia Lai, yuh Trần Thị Khánh Huyền (Nkual têh Ayun Pa, Gia Lai) kâp kon bu klô 10 khay kah rngăl jêh rek ƀưh hot mbung. Muh măt yuh ntoh nău mpŏng kâp jêh ăp nar khay jêr jŏt ndrel kon. Yuh Huyền an gĭt, bah rnôk deh, mon lĕ mâp âk nău nking n’gang yor koet ji aơ, kơt ƀa ƀơ geh thŏk dak toh, geh ji khai tôr, ƀư săk soan mô ngăch n’hanh mbrơi têh. Lap gĭt tât bôk nău kan rek bâr gơm, yuh ôp n’hanh dơi ntop kơl. Bah prăk kăk hăn nsong, but uănh tât rek, lĕ rngôch dơi an dơm da dê n’hanh rhŏ dŭt uĕh.

   Tâm rnôk hăn but uănh bôk năp, rmôt kan dŭt n’hâm ngăn. Bu ntĭm lĕ rngôch, hôm ntop kơl tay prăk xăng. Aƀaơ rek, lah du hê nuĭh mê̆ gâp đăp mpăn lơn an kon hơm dơi hun hao nâm ơm kơt ăp kon se êng; ji khai tôr lah hŭch đŏng nkôp đah bah năp rnôk rek.

Ta ntŭk kâp, bơ̆ kon nô Phùng Theo Sáng, rnoi Mông, ta thôn Quảng Hòa, nkuăl Dak Glong, n’gor Dak Nông, dŭt rvê lor rnôk rek ƀưh hon mbung. Nô Sáng an gĭt, kon gâp 16 năm n’hanh lôch 16 năm bah năp, nô mpŏng ŭch kon dơi rek, yơn mô dơi ƀư yor nău rêh wăng sa jêr jŏt. Nô mpŏng kâp jêh rek, kon nơm dơi ngơi, ngêt sa nâm ơm gay nsing nơm tâm ngơi.

Bôk nău kan aơ dŭt uĕh yor nsing nơm đah rmôt nai dak si rek. Mpôl hên tât ta aơ mpŏng ŭch bôk naư kan rek ăp mon dơi ngêt sa. dơh ngơi lơn, gay bah kơi aơ mon gŭ ur.

Aơ lah rơh tal 2 bôk nău rek Bâr mbung gơm, âk nău ƀư kơl nuĭh yor Rmôt kan Operation Smile Việt Nam tâm rgop đah Ngih dak si Nhi Gia Lai ƀư ta n’gor Gia Lai. Năm e, bôk nău kan lĕ geh 104 mon jêt dơi rek jêh. Bôk nău kan năm aơ ƀư but uănh lor an nklăp 200 kon se n’hanh ntơm rek an 100 kon se geh koet nte bah ndŭl me ƀưh hot mbung mô hŏ dơi rek; n’glơi an koet nte bah ndŭl me ƀưh hot mbung, kang kĭt (khap ta yoi,trôm bluh mbung, hot muh, ƀah tơm sêk), rmeh nglău, tâm krêp nglău (ty, jâng) ta Gia Lai n’hanh du đêt n’gor kiau ma. Ăp nuĭh dơi but uănh, săm n’hanh rek an dơm, nkre dơi ntop kơl ăp prăk hăn trong, gŭ âm. Thạc sĩ, Nai dak si Bạch Minh Tiến, Kruanh khoa rek Tạo hình n’hanh Thẩm mỹ, Ngih dak si Hữu nghị Việt Nam-Cuba, kruanh rmôt an gĭt:

Mpôl hên geh ăp nuĭh rek mât uănh săm ji ăp nai dak si kon se n’hanh ăp nuĭh kơl kan tât bah Hà Nội, nkual ƀon têh Hồ Chí, Nghệ An n’hanh Huế ăp nuĭh dŭt n’hâm mpôl hên lĕ nchrăp du đêt ndơ mpeh dak si, mpeh ndoh ndơ gay đăp mpăn an ăp mon dơi tâm di uĕh ngăn đah dak si n’hanh mpŏng ŭch nsĭt tay bâr mbung gơm an kon se.

Mpeh đah ngih dak si Gia, wa Từ Thị Mai Linh, Groi Giám đốc Ngih dak si an gĭt, ngih dak si nsrôih nta an uĕh ngăn, an n’ăp nuĭh ji, nuĭh rnăk wâl an rơh rek aơ dơi lôch uĕh lĕ rngôch:

Rnoh ăp oh tât đah ngih dak si dŭt âk, rmôt kan geh trong nchrăp kan na nao, kan măng n’hanh n’hao kan ndrel đah ngih dak si nhi ndrel đah rmôt kan gay pah kan uĕh lơn n’hanh dơi lôch uĕh lơn.

Nău ƀư tĭng bôk nău kan nsĭt nkô̆ nău uĕh, mpơl saơ nău mât uănh bah nsum mpôl n’hanh kon nuĭh đah kon se, kon se koet nte geh naư rêh jêr jŏt dơi gĭt tât ăp ndoh ndơ dak si uĕh ngăn. Bôk nău kan lĕ nsĭt tay bâr mbung gơm, nău nsing nơm an kon se mô lap geh koet nte, gay ăp oh plơ̆ tay gŭ âm nâm ơm, geh dơi nti nsơm, răm rlưn n’hanh hun hao kơt ăp băl ndrel năm deh, rgop kơl ăp oh tâm rgŏ năp geh nău rêh uĕh lơn. Bôk nău kan rek bâr mbung gơm mô knŭng kơl ăp oh jêt but nkra săk soan, joi tay bâr mbung gơm ma hôm kơl ăp y nai dak si ta ntŭk n’hao blău pah kan, djôt kăr ăp kỹ thuật mhe bah rmôt way kan.