Ta ăp njăr trong Quốc lộ 14, 14C Quốc lộ 28 hăn rlău n’gor Dak Nông n’hanh du đêt njăr trong tỉnh lộ, n’gâng kan ntung trong hŏ năl geh 18 “ntŭk ndreng” roh đăp mpăn ntung trong. Ta ăp ntŭk dja hŏ geh âk rơh tâm tom ndeh khĭt rmanh jru, ƀư âk nuĭh khĭt. Dŭt mhe aơ lah ndeh bôk têk tâl tâm jay ƀon lan nkual chợ 312 xã Đắk R’la, nkuâl Dak Mil, lơh 3 nuĭh khĭt 1 hê nuĭh rmanh. Nhih pah kan dơi kan Dak Nông dôl ndăn ngăch an ƀư ăp trong nkra mât đăp mpăn hăn ntung trong.

Rlău du pơh lôch ndeh container tâl tâm jay ƀon lan lơh 3 nuĭh khĭt,  nuĭh ƀon lan rêh njok trong Hồ Chí Minh ta nkual chợ 312, xã Đắk R’la, nkuâl Dak Mil, n’gor Dak Nông, nha mô hŏ bah phit klach ơm. Wa Phạm Thị Ngọc Lan – du hê nuĭh ƀon lan gŭ rêh ta nkual an gĭt, gâl trong dŭt sŏng uĕh dja ƀư nuĭh ƀĭt ndeh nchuăt ngăch. Yor kơt nê̆  ma tâm bar pe năm aơ, ta aơ hŏ geh 8 nuĭh khĭt, 6 nuĭh rmanh tă bah tâm tom ndeh.

“Gâp tăch ndơ ta chợ hŏ jŏ năm hôm, saơ ntŭk dja way geh tâm tom ndeh jru hô. Aƀaơ gâp mpŏng mpôl kan cảnh sát giao thông n’hao rsong hăn âk ta gâl trong klach rvê dja; nhih pah kan dơi kan ân ơm geh trong nkra ƀư an ndeh nchuăt mbrơi oi, ntrŭp camera rmal.

Wa Lê Văn Hoàng – Kruanh UBND nkuâl Dak Mil, n’gor Dak Nông, mbơh gĭt, trong Hồ Chí Minh hăn rlău nkuâl geh 2 “ntŭk ndreng” mpeh tâm tom ndeh lah gâl hăn rlău nklang xã Thuận An n’hanh nkual chợ 312 xã Đắk R’la. Ăp ntŭk dja way geh tâm tom ndeh jru hô, lơh khĭt âk nuĭh n’hanh khuch khat âk bôk ndeh rklư, roh huach âk mpeh wăng sa. Mpeh nău lơh bah “ntŭk ndreng” roh đăp mpăn ntung trong dja, wa Lê Văn Hoàng an lah ân ntrôl dăng nkoch trêng n’hao nău gĭt êng bah nuĭh râng hăn ntung trong lah mô hŏ tŏng, ma ân rgâl uĕh ntung trong hăn đŏng.

“Nkuâl ntrôl dăng nkoch trêng, n’hao nău gĭt êng nuĭh ƀon lan tĭng jăp, lơn lah nuĭh ƀĭt ndeh mpeh rnoh ngăch nchuăt n’hanh ăp quy định geh  tât đăp mpăn hăn ntung trong. Mpôl kan dơi  kan ân n’hao âk hăn rsong uănh treng nđôi, ngăch ban saơ ăp ndeh hăn tih, rmal lhăt tĭng di nău way. Gay nkra bah lĕ, ân ntuh kơl ndơ dŏng an trong hăn. Ntĭt kơt pơk hvi ăp gâl trong hăn, ntrŭp ăp ndơ nking mbor ndeh hăn, ân ƀư ăp kôp âk trong nkra lơh”.   

N’gor Dak Nông geh 3 trong quốc lộ hăn rlău lah 14, 14C, 28. N’gâng kan dơi kan ta n’gor năl ăp trong quốc lộ n’hanh du đêt tỉnh lộ dôl hôm geh 18 “ntŭk ndreng” rŭ hôch geh ma  nău tâm tom ndeh. Tâm n’gul bôk năm aơ, ta Dak Nông geh 57 tơ̆ tâm  tom ndeh, lơh 43  nuĭh khĭt, 53 nuĭh rmanh. Rđĭl đah ndrel khay dja năm e nơh,  tâm  tom ndeh hŭch 12 tơ̆, hŭch 2 hê nuĭh khĭt, yơn hao 18 nuĭh rmanh. Thượng tá Văn Ngọc Lập, Groi kruanh jrô kan Cảnh sát giao thông Công an n’gor Dak Nông an gĭt, tâm tom ndeh hŭch yơn ăp tơ̆ tâm tom jru hao, lơn âk geh ta ăp ntŭk “ndreng” mpeh trong hăn. Gay kân bah ir tâm tom, mpôl cảnh sát giao thông ntrôl dăng pah kan hăn ôp uănh, rmal ăp nău tih.   

“Tâm let năp tay, Jrô kan Cảnh sát giao thông hăn rsong uănh tay groi nđôi ndăng măng nar, n’hanh tĭng  ƀư way nkô̆ weh rnoh ngăch ăp bôk ndeh rdeng năch, ndeh container, ndeh rdeng ndơ … du njăr trong, lơn lah ta ăp ntŭk rŭ hôch jêng geh tât tâm tom ndeh. Bah meng nê, way kan nsum mbro đah công an xã, mpôl hăn treng nđôi ntung trong, nkoch trêng gay nuĭh ƀon lan ta nkual chợ n’hao nău gĭt êng tĭng jăp Luật hăn ntung trong, kân bah ir tâm tom  ndeh hăn trong.”  

Gay nkra lơh bah ăp “ntŭk ndreng” roh đăp mpăn hăn ntung trong ta ăp njăr trong quốc lộ, tỉnh lộ, Ban đăp mpăn hăn ntung trong n’gor Dak Nông hŏ đă ăp mpôl kan dơi kan ƀư nsum ndrel ăp nkuâl ntrôl dăng pah kan nkoch trêng n’hao nău gĭt êng tĭng jăp Luật hăn ntung trong, tĭng ƀư ăp kôp  ăp trong nkra nău kan, rmal lhăt ăp nuĭh tih đăp mpăn hăn ntung trong. Nkre, ôp uănh tay, nsŏng kơl gay dăn đă UBND n’gor Dak Nông, doanh nghiệp mât ăp njăr trong BOT ntuh kơl n’hao têh uĕh tay ntung trong, lơh bah ăp “ntŭk ndreng” rŭ hôch  tâm tom ndeh ta ăp njăr trong hăn, lơn lah ta trong Quốc lộ 14 (trong Hồ Chí Minh) n’hanh trong Quốc lộ 28./.