Rnơm tâm nah ao tanh bah rnoi K’ho, oh Sruk Đan, kon se nti jrâu 9, ngih săm ƀŭt Phổ thông Dân tộc nội trú Trung học cơ sở nkuăl Đam Rông, n’gor Lâm Đồng, ngơi:

‘Gâp năm nti aơ geh hao jrâu 9 jêh, ri ma ngih săm ƀŭt đă rgum tâm nau ntĭm nti ân ơm lơn, ntơm lơ 22/8. Ăp băl ndrel nti tât rgum âk ueh ngăn. Năm aơ, lah năm dŭt gưl hôm ri ma hên nsôih tâm nau kan ntĭm nti bah nơm. Lăp năm nti mhe, ntŭk ntu ngih nti bah ngih săm ƀŭt ƀư ueh nâp ngăn, kloh đŏng, jrâu nti geh nkra mhe, gâp rhơn ngăn. Tâm rnôk rlu nti mhe nơh, gâp gŭ tâm ngih kơl an me mbŏ âk nau kan tâm ngih ngăn kơt lah n’gon piăng, rao lŭ ngan, bonh đă ăp oh, nur gâp dôl ma geh nau ji ân păng bah ngăch nau ji. Năm mhe rlau, nau kan ntĭm nti bah gâp ê lăng blau ơm, ri ma tâm năm nti aơ, gâp mra nsôih lơn tay gay ma dơi geh nau dơi prêh ngăn gay ma ân me mbŏ rhơn, me mbŏ hŏ mât chăm, kơl an ân gâp hăn nti tât lôch”.

Nkuăl Đam Rông lah nkuăl jêr ngăn bah n’gor Lâm Đồng, đah rnoh nuưih rnoi mpôl đê̆ geh nklăp 70% rnoh nŭih. Ăp năm rlau aơ, Đảng ndrel Ngih dak hŏ kơl an âk ngăn ân nau kan ntĭm nti tâm nkuăl. Ndrel ma ngih vâl, ndơ dŏng kan, jrâu nti geh ƀư nâp nâl, kon se rnoi mpôl đê̆ ta aơ kŏ geh nau kơl an bah Đảng ndrel Ngih dak. Ngăn lah, nau mĭn bah ƀon lan tâm nau mât chăm ân oh kon hăn nti geh n’hao kloh. Tâm nar lăp năm nti mhe, wa Me Nhi, leo kon hăn nti gay bonh đă kon nơm geh nau nsôih geh nau nti blau ngăn:

‘Rnôk lăp nti jrâu 6, ngih săm ƀŭt Dân tộc Nội trú nkuăl, geh ngih săm ƀŭt ntĭm nti rƀŏng trong lah ntă kon se geh nau blau ri mra geh nkhôm prăk hăn ntĭm nti tâm dak ba dih. Nau ŭch bah kon gâp lah nsôih nti ân blau ân dơi geh nau nkhôm prăk nê ndrel geh hăn nti tâm dak Nhật Bản, Ndri ma ân geh nti ân gơih ndrel dŭt n’hâm nsôih, gay jêh rnôk lôch nti jrâu 12, păng geh ndơn prăk nê. Rnăk hên kŏ pơk trong nơih ueh ngăn ân kon gâp, êng prăk têm, rnăk hên kŏ manh ntop tay prăk gay ma ân kon geh prăk hăn nti tâm dak Nhật Bản nkre lah hăn nti hăn kan”.

Nkô̆ nau ŭch bah Me Nhi lah mô knŭng ntuh kơl ân kon nti blau tâm dak nơm ma ân geh hăn kan tât dak ba dih đŏng. Rnăk păng geh 3 kon, kon bôk rah nti blau gay ma leo trong ân 2 oh păng:

‘Jêh rnôk yuh bôk rah, rnăk hên hôm 2 kon se kŏ dôl ma hăn nti. Bar hê ba kơi ri rnăk hên bonh đă păng ân geh lŏ tĭng kơt yuh. Lăp năm nti mhe, rnăk hên rvăt săm ƀŭt nti, kho ao mhe, ndeh vah jâng gay ma kon hăn nti, yor ngih săm ƀŭt ngai nklăp rlau du cây số. Du gưl lah yor nau nsôih râng hăn nti bah kn, rnăk hên ri pơk trong ueh ngăn ân kon nơm. Lah nsum ăp kon gâp ri gơih nti ndrel ŭch hăn nti, blau đŏng ri ma gâp rhơn đŏng ndrel nsôih pơk trong nơih ân ăp kon hăn nti play săm ƀŭt”.

Mât ân ueh nau ndrih bah bri yôk, Ngih săm ƀŭt Phổ thông Dân tộc nội trú Trung học cơ sở Đam Rông, n’gor Lâm Đồng, ntoh ngăn đah nau mhe, vơt năm nti mhe 2023-2024. Nai Nguyễn Hữu Hanh-Groi hiệu trưởng ngih săm ƀŭt Phổ thông Dân tộc nội trú Trung học cơ sở Nkuăl Đam Rông mbơh, bol ma tâm nkuăl jru, ngai, yơn ntŭk ntu ngih săm ƀŭt hôm nâp ueh, đăp mpăn nau kan ntĭm ndrel ma nti. Năm nti mhe aơ, ntơm bah tơm prăk Bôk nau kan nkô̆ nau bah neh dak hun hao văng sa, rêh jêng nkuăl rnoi mpôl đê̆ ndrel gôl yôk lvang năm 2021-2030, ngih săm ƀŭt ân nâp ueh, tă bah jrâu nti nội trú:

‘Rnôk aơ, ntŭk nti ngih vâl bah ngih săm ƀŭt hŏ geh ntuh kơl nkra mhe ân nâp ueh. Ăp jrâu ntĭm nti geh nkra ân nâp, ốp gạch nền, gạch ngih săm ƀŭt ân kloh ueh, kơl an nau kan ntĭm nti. Nkuăl ntŭk gŭ bah kon se kŏ geh nkra ân nâp, ốp gạch tường, đăp mpăn ueh ngăn nau dơi ân kon se nti nội trú bah kon se nti’./.