Ƀư nau kan tâm rlong nsum n’hâm ndâk njêng ƀon lan mhe, nsum ty kơl an nŭih ach o, 5 năm ma aơ, rmôt tahen Dak Lak rgum geh rlau 2.300 cán bộ tahen, đah bơi tât 20 rbăn nar kơl an ƀon lan nkuăl jêr ngăn. Rgum rlau du rmen prăk nkra ngih ân ăp rnăk dơi kơl, rvăt kon ntil tăm, mpa rong, nti nau kan ân rnăk ach o. Tâm rnôk srê Covid-19, tahen n’gor tâm rgop ma ăp ntŭk kan chính trị rgum rlau 3 rmen prăk kơl an ƀon lan mâp jêr, đah âk nau kan săk tam.

Râng ndrel ntoh nau tâm Đại hội, Trung tướng Thái Đại Ngọc, Uỷ viên Trung ương Đảng, Rđau Quân khu 5 rnê prêh ăp nau kan tâm rlong rnê nkhôm, tâm rlong geh nau dơi bah tahen Dak Lak tâm 5 năm ma aơ. Ăp năm tât, nau kan tâm lam ntur neh, nkuăl mra geh jêr rdâng, tâm lam Quân khu, ngăn lah tâm Tây Nguyên hôm lah 1 tâm ăp nkuăl mra roh đăp mpăn. N’gâng kan rđau tahen đă Đảng uỷ, Hội đồng tâm rlong rnê nkhôm, N’gâng kan rđau kan n’gor Dak Lak rgum rđau ƀư ueh nkô̆ nau tơm:

‘Ntrŭnh rjăp nau mĭn kan bah Kruanh Hồ Chí Minh mpeh tâm rlong rŏng dak, ƀư ngăn nau “5 nsôih, 5 nchrăp” bah đồng chí Tổng Bí thư Nguyễn Phú Trọng; ăp nau ntrŭnh quy phạm pháp luật mpeh nau ƀư nau tâm rlong, rnê nkhôm. Ƀư ân ăp cán bộ, tahen, ƀon lan gĭt kloh nau khlay bah nau kan tâm rlong, rnê nkhôm ndrel nau kan nsôih geh nau dơi, aơ lah nau kan cách mạng bah “Tahen Wa Hồ”, nau ntoh lư, ueh êng bah tahen ƀon lan Việt Nam”.

Ta Dak Nông, 5 năm ma aơ, nau kan tâm rlong geh nau dơi bah rmôt tahen n’gor hŏ njêng nau nsôih prêh bah nau rgum, n’hâm tâm lơh, rgop nau khlay ƀư nau kan hun hao văng sa, rêh jêng, ƀư nâp rnă njrăng, neh dak. Tâm 5 năm, hŏ geh âk rbăn tŏ cán bộ, tahen kơl an nkuăl jêr jŏt, rgum geh rlau 5,6 rmen ndâk 78 ngih tâm kơl, kơl an 1,4 rmen prăk kơl an nau kan bah ăp rnăk jêr jŏt, khám, pă dak si mô roh prăk ân bơi tât 1.900 nŭih ƀon lan tâm nkuăl jru, ngai.

Tâm rnôk 2019-2024 lam n’gor hŏ săch, mbơh 67 rmôt, 82 nŭih blau ăp ntil tâm nau kan. Tâm 5 năm rlau aơ, geh 31 tŏ rmôt kan geh N’gâng kan neh dak ndrel Quân khu 5 kơp dơn rmôt kan nâp nâl ăp ntil “ƀư leo trong lor, ntoh lư”.

Tâm Đại hội, Trung tướng Thái Đại Ngọc, Rđau kan Quân khu 5 rnê rmôt kan tahen Dak Nông hŏ tâm rnglăp, nchrăp, blau nau mhe ntrŭnh ăp ntil nau kan tâm rlong geh nau nsôih. Tâm rnôk mhe, Trung tướng Thái Đại Ngọc đă Đảng uỷ, N’gâng kan rđau tahen n’gor Dak Nông lŏ ntrŭnh ngăn nau mĭn bah Kruanh Hồ Chí Minh mpeh nau tâm rlong rong dak:

‘Uănh khlay tâm nau saơ, ntĭm nti, nkoch mbơh jru ăp nau kan, nau ƀư blau mhe, săk tam, ăp nŭih ntoh lư bah rmôt, êng săk nŭih blau, ntoh lư gĭt dơi. Ntoh ngăn lah ăp rmôt, ăp nŭih blau mĭn ƀư ăp nau kan ma âk nŭih ê geh dơi mĭn, rlet rlau dơi ăp nau jêr ma âk nuĭh ê dơi geh rlet; ƀư dơi ăp nau kan ma âk nŭih mô ŭch ƀư mô lah ê dơi ƀư, geh nau mĭn, nau janh, nau kan. Tâm rlong ân geh nsum ma rnê nkhôm, ân năn, nkhôm ân tâm di”.

Bah nau tâm rlong nsôih geh nau dơi bah rmôt tahen lvang năm 2019-2024 du tŏ tay đŏng ân saơ, cán bộ, tahen bah n’gor Dak Lak ndrel Dak Nông, bol tâm moh nau kan, nau rêh kŏ ân geh n’hao nuih n’hâm cách mạng, leo trong, ƀư rjăp, tâm du nuih n’hâm, rdâng nau khuch tih. Lơn ma jêr ri rmôt tahen ân geh tâm rlong gay ma rgâl mhe, blau nau kan, ân ƀư jêh ăp nau kan dơi bah tahen tâm lơh, rmôt kan nâp, rmôt kan pah kan jan sa bah Tahen ƀon lan Việt Nam./.