Lĕ jêng bên, ăp ôi dâk bĭch, wa Y Tai ta xă Quảng Phú, nkuăl Krông Nô, n’gor Dak Nông way joi sóng Radio gay djăt Bôk nău ntuh nău ngơi Bunong bah Radio nău ngơi Việt Nam. Wa Tai nkoch, năm aơ lĕ rlău 80 năm deh, yơn dŭt uănh nu nău mĭn tâm dak n’hanh bah dih dak tă bah Radio đah nău ngơi Bunong. Lơn lah, Bôk nău mbơh ntĭm khoa học kỹ thuật n’hanh lah ndơ djăt răm, đah ăp bôk nău mprơ, nđơn, rgop mât ndrăy văn hóa ăp rnoi nuĭh.

   Gâp djăt nău ngơi Bunong ta Radio nău ngơi Việt Nam bah năm 2006 tât aƀaơ hôm, gâp way djăt nkô̆ way nkoch nău pah kan jan sa gay djăt mpeh kỹ thuật n’hanh mât chăm ăp ntil tơm tăm, tal 2 tay lah djăt nău mprơ Bunong he, nău Bunong ngơi tâm Radio nău ngơi Việt Nam dŭt dơh djăt, nău Bunong preh jêng ăp mpôl êng bah nuĭh Bunong dơh wât da dê, dŭt uĕh, tă bah nĕ bôk nău ntuh gâp ŭcvh druh ndăm aƀaơ nsrôih nti uĕh, nsrôih mât uĕh n’hanh ndrăy văn hóa bah rnoi nơm, mô yor nău rêh mhe ma chuêl ăp nău way uĕh ơm bah rnoi nơm.

Jêh 18 năm pơk, Bôk nău ntuh Nău ngơi Bunong bah Radio nău ngơi Bunong ntơm tâm di nău ŭch bah băl djăt Radio. Ăp biên tập viên, nuĭh răk rblang kơt Thị Đoắt, H’Thi Rya, Điểu Thân, Y Sưng Phê Ja mô rlu nti, gĭt nău pah kan gay ngăch tĭng nău răk rblang mhe. Mô knŭng rblang, răk ăp nău mhe, bôk nău ntuh ta jrô rhôp nău ngơi, ăp biên tập viên hôm tât ăp ƀon lan nkual Tây Nguyên gay joi nău mhe, nchih nău, ƀư ăp bôk nău ntuh dŭt uĕh. Gĭt saơ geh nău uĕh nĕ, oh Y Cam-Groi Kruanh UBND xă Quảng Phú, nkuăl Krông Nô, n’gor Dak Nông uănh lah:

Nău ngơi Bunong ta Radio nău ngơi Việt Nam dŭt uĕh, djăt dơh wât, nkô̆ nău đêt, dŭt uĕh nkoch tŏng ăp nkô̆ nău ma kônh wa ŭch, ntĭt nsa nău kơl Đảng, Ngih dak tât kônh wa, kơt nkoch tât kônh wa mpeh kỹ thuật tâm nău kan lŏ mir, mât chăm cà phê, tiêu... kônh wa dŭt uănh tât nău mhe rêh jêng, bôk nău ntuh dŭt ngăn ngên đah kônh wa. Gâp mpŏng ŭch ăp băl ƀư bôk nău ntuh nău ngơi Bunong geh âk nkô̆ nău, uĕh lơn n’hanh ngăn ngên lơn an kônh wa.

Gay ngăch đah trong hun hao nsum bah báo chí mhe, ndrel đah nău hun hao ngăch bah truyền thông nău rêh jêng, ndrel đah nău ngơi way ơm tă bah Radio, bah lơ 23/3/2024, Bôk nău ntuh nău ngơi Bunong bah Radio nău ngơi Việt Nam lĕ dơi ndơ̆ tâm mạng xã hội Facebook đah Fanpage “Tiếng Mnông VOV Tây Nguyên”. Đah trong ƀư mhe aơ lĕ kơl âk nuĭh djăt uănh tât đah Bôk nău ntuh nău ngơi Bunong bah Radio Nău ngơi Việt Nam. Du hê nuĭh djăt geh nick name facebook lah “Huế Xưa” an gĭt:

Gâp gĭt nău ngơi Bunong tă bah “Fanpage nău ngơi Bunong Tây Nguyên”. Bah Fanpage dơi djăt ăp nkô̆ nău ta radio pơk, ta trang web đah nău ngơi Bunong, ăp druh ndăm aƀaơ gĭt tât nău mhe bah mạng xã hội âk jêng trang Fanpage aơ dŭt tâm di đah ăp băl mom lah nuĭh Bunong ŭch mĭn joi mpeh nău ngơi văn hóa bah nơm. Geh Fanpage đah nău ngơi Bunong kơt aơ dŭt uĕh. Gâp ŭch djăt nđơn. Djăt ăp nghệ nhân mprơ... n’hanh ăp nău mhe êng ta Facebook nău ngơi Bunong, nu nău di na nê̆ n’hanh uĕh.

Lơn lah, nuĭh djăt uănh geh nick name “Songtheothoigian” nkoch dŭt rhơn n’hanh uĕh ngăn rnôk dơi gĭt trang Fanpage (Tiếng Mnông VOV Tây Nguyên”, n’hanh na nao nchih njuăl ôp khâl ăp oh nô ƀư bôk nău ntuh. Nuĭh aơ njuăl nău an lah: “OH saơ ta Fanpage Tiếng Mnông geh video clip mẹ oh mprơ, oh nô hôm âk rup mê̆ mprơ đŏng, pơk âk lơn oh yuh hŏ.

Oh dăn ôp oh yuh, oh lah Nam, năm aơ oh 34 năm deh, oh gŭ ta xă Quảng Trực, oh djăt bôk nău ntuh nău ngơi Bunong tă bah Fanpage “Tiếng Mnông VOV Tây Nguyên”, oh saơ ăp oh nô pơk nău nchih geh rup dŭt uĕh, oh way nkoch tay ăp nkô̆ nău oh nô nchih gay rêng nău ngơi rnoi nuĭh nơm tât ăp băl mom âk lơn, aƀaơ ăp nuĭh dŏng Facebook jêng trong ndơ̆ bôk nău ntuh nău ngơi Bunong kơt aơ tâm di đah ăp nuĭh mô dơi djăt bôk nău ntuh tă bah Radio.

Fanpage “Tiếng Mnong VOV Tây Nguyên” aƀaơ geh bơi 1.500 nuĭh uănh nđôi, ăp nar Fanpage nchih nkoch ƀa ƀơ ăp ndơ ntuh nău ngơi Bunong đah rup dơi ƀư uĕh n’hanh file nău ngơi dŭt dơh an nuĭh răk n’hanh djăt tâm di đah âk nuĭh joi, ngăn lah băl mom.... kơt: nău mhe, nău nchih, nđơn, nău ngơi tâm ơh... Du hê băl geh nick name lah “Tung Yôk” nkoch:

Fanpage tiếng Mnong VOV Tây Nguyên dŭt uĕh, gâp ŭch djăt nău mhe, ăp oh nô pơk nkre geh rup n’hanh răk ngơi, knŭng pơk uănh lah dơi djăt, tâm di đah druh ndăm aƀaơ ngăn.

Rlău 18 năm bah năp, Bôk nău ntuh nău ngơi Bunong bah Radio nău ngơi Việt Nam, yor Ngih pah kan gŭ nkual Tây Nguyên ƀư, mô rlu n’hao uĕh nkô̆ nău n’hanh trong răk rblang. Bah meng bôk nău ntuh pơk ăp nar n’hanh trang thông tin điện tử VOV4.M’nông, ri Fanpage: “Tiếng Mnông VOV Tây Nguyên” lah “n’ging ty nthoi jong” bah Bôk nău ntuh nău ngơi Bunong, tâm di nău ŭch nar lơ âk bah nuĭh djăt.