Ƀư ueh nau kan ơm cách mạng, êp nau kơl an ntuh kơl bah Đảng ndrel Ngih dak, kônh wa ăp rnoi ta Tây Nguyên nsôih hao jêng gay ndâk njêng nau rêh mhe.

Nkuăl Ia Pa, n’gor Gia Lai geh ndâk tâm năm 2002, đah 9 xã. Tâm nê geh 7 xã jêr jŏt ngăn ngên. Yơn lah, đah nau tâm rnglăp, tâm ban bah lam ntrong kan chính trị, nuih n’hâm nsum bah ăp kơn ƀon lan, tât rnôk aơ, nau geh bah nkual Ia Pa geh âk nau dơi ngăn, hŏ geh 2 xã Ia Ma Rơn ndrel Ia Tum geh dơi ƀon lan mhe. Nau geh bah du hê bôk nŭih ăp năm rlau 40 rkeh prăk. Wa R’ô Hôk-tâm Plei Marin 3, xã Ia Mrơn, nkuăl Ia Pa, ngơi:

“Plei Marin 3, xã Ia Mrơn, nkuăl Ia Pa âk ngăn lah kônh wa rnoi Jrai. Bah năp nơh, nau rêh bah kônh wa ji ngot ach o yor nau tuch tăm tĭng nau vay ơm, ntrong hăn ro mâp âk nau jêr. Ndrel nau kan gơih tâm pah kan jan sa ndrel nau kơl an bah Đảng, Ngih dak ntuh kơl, kơl an, ƀon Plei Marin 3 hŏ rgâl âk ngăn, trong hăn nơih ueh, ngih rƀŭn rgum, tach chưng play, ngih săm ƀŭt geh ndâk nâp nala. Kônh wa ƀon lan hŏ blau dŏng nau kan tuch tăm mhe gay ma mât chăm tơm tăm, mpa rong, blau tăm ba dak. Rnơm nê, tât rnôk aơ, ƀon Plei Marin 3 hŏ geh âk rnăk rklaih ach o, nau rêh ƀon lan geh rgâl âk, ăp ngih mhe ndâk ân saơ nau rgala mhe ăp nar bah ƀon lan”.

Tâm ăp năm aơ, ta ăp nkuâl: Tu Mơ Rông, Đăk Tô, Đăk Hà, Kon Plông, Kon Rẫy bah n’gor Kon Tum ntoh âk nuĭh đoàn viên, druh ndăm nuĭh Xơ Đăng ƀư wăng sa jăp blău n’hanh rdâk njêng nău rêh hơm răm, đăp mpăn. Ntoh lư lah ăp trong ntĭt leo tâm rgop kan tuch tăm, Hợp tác xã tăm, nkret njêng tơm dak si; Rmôt njroh mprơ chĭng gong- xoang… bah đoàn viên, druh ndăm ta ăp nkuâl Tu Mơ Rông n’hanh Kon Plông. Ndrel đah trong kan tuch tăm, âk đoàn viên, druh ndăm hôm geh săk leo lor râng hăn kan dak bah dih, kơt nti khoa học kỹ thuật dŏng tâm nău kan tuch tăm… Yuh Y Za Nhi, 28 năm deh, thôn Mô Bành 1, xã Đăk Na, nkuâl Tu Mơ Rông lah kơt aơ:

Ân ntrŏng kloh mhâm ƀư gay he geh du nău rêh đăp mpăn, wăng sa hun hao, lơn lah rơh mom ndăm aƀaơ ân lơn ma jăp gơih kơt nti, đăp dêh nâm lơh nâm kan gay hun hao wăng sa rnăk wâl. Rơh druh ndăm he mô dơi kâp nơm nsing gư ma ân rlău dơi jêr jŏt, ntul rlong, mô rleh ƀlao, dơn gĭt sa dơm ri mbra mô geh nău rêh đăp mpăn. Gâp geh nău njrăng đă tât đah ăp băl mom gĭt nău mĭn, ân tiăr nti êng săk nơm, gơih nđơr kan nsĭt geh an rnăk wâl, săk nơm, nsrôih ndôr ri mpŏng he mbra geh nău rêh mbơm oi kơt ăp nuĭh êng ƀa ƀă”.