Wa K’Ních, kruanh ƀon Dur 1, xă Dur Kmăl, nkuăl Krông Ana, n’gor Dak Lak, rngot n’hanh ntô̆ n’hao rnôk dơi mâp Tổng Bí thư Nguyễn Phú Trọng ta Nar rgum tâm rnglăp ăp rnoi nuĭh năm 2018. Wa dơi saơ nău dăch dêh, nkoch bri bah nuĭh kruanh têh ngăn bah Đảng đah nuĭh ƀon lan.

Dơi djăt n’hanh mâp na nê̆ nar nĕ, gâp saơ wa lah du hê nuĭh rmư, kơt du hê nuĭh bơ̆ bah he. Wa ntĭnh ntăn lĕ rngôch cán bộ n’hanh kônh wa an tâm rnglăp rjăp, gĭt mkra ăp nău hôm e nkân gay ndrel hun hao. Bah nĕ tât aƀaơ lĕ 5 năm hôm, tă bah ăp nău ntĭnh bah wa ri kônh wa ƀư tĭng dŭt uĕh.

Lap tă 2 tơ̆ dơi mâp Tổng Bí thư Nguyễn Phú Trọng tâm ăp rƀŭn nchră mpeh văn hóa, nuĭh văn Niê Thanh Mai, Kruanh Hội Văn học Nghệ thuật Dak Lak nkah gĭt tĭng nău ntoh ngơi bah Tổng Bí thư mpeh tâm rnglăp rnoi nuĭh. Wa Niê Thanh Mai nkoch, ăp ntĭm rđău ta rƀŭn nchră lam dak mpeh văn hóa năm 2021 lĕ dơi n’gor Dak Lak mbơh ƀư na nê̆.

Tâm rnglăp rnoi nuĭh tâm văn hóa nghệ thuật n’hanh tă bah văn hóa nghệ thuật ri mpôl hên lĕ ndâk njêng ăp bôk nău, ăp trong nchrăp tâm tác phẩm bah lĕ rngôch ăp văn nghệ sĩ; m’hâm ƀư dơi saơ nău tơm n’hanh tâm rnglăp bah ăp rnoi nuĭh n’hanh lơn lah tâm rnglăp, nău râng bah âk rmôt bah công an, tahen, druh ndăm, bu ur... Jêh rƀŭn nchră văn hóa lam dak đah nău ƀư tơm bah Tổng Bí thư Nguyễn Phú Trọng ri nâp nâl nuih n’hâm n’hanh tâm rnglăp rnoi nuĭh mbra hôm hvi lơn tay n’hanh mbra dơi hao bah văn hóa, văn học nghệ thuật.

Djôt r’u păng rup dơi chŭp nsum đah Tổng Bí thư Nguyễn Phú Trọng, wa H’ Yam Buôn Krông, ta ƀon Tơng Jŭ, xă Ea Kao, nkual ƀon têh Buôn Ma Thuột, n’gor Dak Lak rngot nkoch, wa lap 2 tơ̆ mâp Tổng Bí thư. Lơn lah, năm 2011, wa n’hanh ăp oh yuh hôm tanh êng ao Ê đê an Tổng Bí thư rnôk wa hăn khâl ƀon:

Rnôk tăng nău lah ntơm rui cheh tanh brai gay ma dơi an wa, njuăl nău rŏng, nău ryơk bah nơm đah Wa. Rơh tal 2 mâp Wa lah rnôk hăn râng Rƀŭn nchră rnê rhơn nhân sĩ, tri thứ, doanh nghiệp ntoh lư n’hanh nuĭh nsing nơm rnoi mpôl đêt ta Hà Nội. Gâp saơ dŭt ŭch rŏng ăp nău Wa ntĭnh đah ƀon lan rnoi mpôl đêt lah êng n’hanh lam dak lah nsum, an ndâk njêng tâm rnglăp, geh tâm rnglăp ri mư lôch dơi.

Wa Hà Ngọc Đào, tă ƀư Giám đốc N’gâng kan ntĭm nti Dak Lak an gĭt, năm 2011, rnôk Tổng Bí thư Nguyễn Phú Trọng ntơm mât ƀư kruanh Đảng, lah rnôk nchră an bôk nău rgop tâm nchră rgâl mhe ntơm jêh, lam lĕ rngôch ntĭm nti. Đah âk ntĭm rđău jru bah Tổng Bí thư, tât aƀaơ, jêh 10 năm ƀư tĭng Nghị quyết 29-NQ/TW, ntĭm nti dak he lĕ geh ăp njoăt hun hao nâp dăng n’hanh dơi geh âk săk rnglăy khlay, lơn lah tâm nkual rnoi mpôl đêt, nkual n’har bri, gôl dak. Tâm di đah nău ŭch rŏng bah Tổng Bí thư an ntĭm nti, wa Hà Ngọc Đào nkoch:

Wa Trọng roh lah du nău roh têh đah neh dak. Êng gâp dŭt rngot, nău yô̆ aơ lah dŭt têh. Lah Đảng viên gâp nsing nơm tâm Ban Chấp hành Trung ương Đảng mbra ƀĭt thuk rlet rlău jêr jŏt aơ. Aƀaơ an rgâl nău rngot yô̆ jêng nuih n’hâm soan dăng tâm nău kan. Ƀon lan nsing nơm tâm Đảng, tâm rnglăp ăp nuĭh kơt ngoăy, tâm rnglăp ăp rnoi nuĭh, tâm rnglăp tâm Đảng, tâm rnglăp tâm ƀon lan tĭng kơt nău ŭch rnôk wa Trọng dôl hôm e rêh.

Nkah gĭt ăp nău ntĭnh bah Tổng Bí thư tâm Nar rgum tâm rnglăp rnoi nuĭh ta Dak Lak năm 2018, wa Y Giang Gry Niê Knơng, Kruanh Ủy ban Mặt trận Tổ quốc Việt Nam n’gor Dak Lak nkoch:

Tổng Bí thư Nguyễn Phú Trọng uănh mro nău tâm rnglăp lĕ rnoi nuĭh nkô̆ nău khlay, lah tu tơm soan dăng bah neh dak. Ƀư tĭng nău rgop bah Tổng Bí thư, Ủy ban MTTQ Việt Nam n’gor Dak Lak ƀư tĭng uĕh nău rgum, tâm rnglăp ăp rơh kơn nuĭh ƀon lan, ăp rnoi nuĭh, chroh rƀŭn, ndrel soan yor nsum mpôl, ndâk njêng ƀon tơm ndrŏng uĕh.