Bôk năm 2017, trong dêr mpeh bah dâng nkual ƀon têh Bảo Lộc, n’gor Lâm Đồng ntơm ndâk ƀư, nuĭh ƀon lan ta ntŭk rhơn mô lôch. Rnôk geh trong aơ jêh mô knŭng n’hŭch kol trong tĭng ntŭk ta Quốc lộ 20 lvang rlău Bảo Lộc, ma hôm nta nơih hun hao wăng sa n’hanh nău rêh bah nuĭh ƀon lan tâm nkual. Wa Phạm Minh Thuận, ta phường Lộc Sơn, nkual ƀon têh Bảo Lộc an gĭt, nuĭh ƀon lan ntŭk aơ kâp tĭng nar dơi hăn ta trong mhe, yơn mô gĭt yor nkô̆ nău trong dôl ƀư ri an rlu lĕ rngôch. Nău rlu ndâk ƀư n’gul gâl lĕ ƀư âk ndơ lĕ jŭr djơh, măt trong geh rluh, tăch gâl... ƀư mpŭng lir prăk bah ngih dak.

Trong aơ kơt lah trong me têh bah nkual Bảo Lộc. Kônh wa lăp ta aơ jŏ hôm, gŭ âm ta aơ bah năm 1954 tât aƀaơ, rnôk trong pơk luh ri mbra hun hao tĭng ndrel nkual ƀon têh. Mpŏng n’gâng kan ƀon lan geh nău ngơi tât Quốc hội gay geh nău rgop jêh trong hăn, đah nkual ƀon têh nuĭh an trong n’gul gâl kơt aơ dŭt mpŭng lir.

Nău rlu ndâk ƀư n’gul gâl, ăp ndơ ƀư mô tâm ban hôm lah nkô̆ nău ƀư âk nău rmanh ndeh khĭt nuĭh ta trong aơ. Khay 3/2023, du hê bu klô 54 năm ƀĭt ndeh ô tô rdêng mon 4 năm deh, rnôk hăn tât du mlâm ntung mô hŏ geh n’gar ta trong dêr, lvang rlău xă Lộc Nga, nkual ƀon têh Bảo Lộc ri geh jŭr nkual brŏng ƀư lĕ 2 hê khĭt. Jêh nĕ, ta dŭt năm 2023, du hê bu ndăm lĕ khĭt rnôk ƀĭt ndeh măy tŭp tâm brŏng jru lah du ntŭk rluh, tăch gâl ta trong dêr. Tĭng wa Hoàng Xuân Hậu, ta thôn 3, xă Đại Lào, nkual ƀon têh Bảo Lộc, bôl n’gâng kan ƀon lan lĕ ntăm n’gâng mbơh yơn nău klach geh mro mrăng, ngăn lah ăp nuĭh bah ntŭk êng tât.

Ƀon lan hăn nsong âk ma trong jŭr djơh n’hanh rluh. Lah hăn bah đah aơ hăn đah ri mô uănh nger, jêng uănh du njônh đah ri yơn ntôn trong dôl tâm ntoi, na nê̆ geh rluh jru 3,5-4 mét, đah bri mih lah ngo lĕ rngôch. Saơ nuĭh êng lah mpôl hên an ntĭm khân pơng, ô tô hăn tât ntŭk nĕ an ntĭm khân pơng plơ̆ tay gay dêr nău klach. Mpŏng chính phủ, gưl dơi mkra uănh tât trong aơ.

Tĭng wa Trần Đình Văn, Groi Bí thư rnâng ka N’gor ủy, Kruanh Mpôl đại biểu Quốc hội n’gor Lâm Đồng, nău ndâk ƀư n’gul gâl jêh nĕ rlu tâm âk năm ƀư trong dêr mpeh bah dâng nkual ƀon têh Bảo Lộc  jŭr djơh hô, ƀư mpŭng lir n’hanh geh âk nău djơh lĕ dơi nuĭh ƀon lan âk rơh lah. Mpôl đại biểu n’gor Lâm Đồng lĕ dăn đă n’hanh Chính phủ lĕ ŭch pă tay 320 rmen prăk gay ndâk ƀư jêh trong aơ tâm năm tât.

Trong dêr Bảo Lộc aơ ri Mpôl đại biểu Quốc hội lĕ dăn đă dŭt âk tơ̆. Trong aơ lĕ tă geh ăp nău rmanh ndeh hô, jêh nĕ nău hăn nsong jêr jŏt, n’hôl ƀô ntŭk ntô gŭ âm tâm nkual... Mhe rlău, Groi Thủ tướng Lê Minh Khái lĕ geh nău rgop mpeh nău aơ. Na nê̆, mbra tâm pă rlău 320 rmen prăk bah prăk ntuh kơl nsum gay jêh trong dêr Bảo Lộc.

Ndơ ndâk ƀư trong dêr mpeh bah dâng nkual ƀon têh Bảo Lộc lah ndơ ƀư ntop tay tâm nău nchrăp ƀư ndâk nkra, rgâl uĕh Quốc lộ 20 rlău nkual 2 n’gor Đồng Nai n’hanh Lâm Đồng tĭng trong ƀư BT (ndâk ƀư-jao an). Ndơ ƀư yor N’gâng kan ntung trong lah ntŭk kan ntrŭnh an ntuh kơl n’hanh Công ty Cổ phần BT20-Cửu Long ƀư tơm ntuh kơl mbơh ƀư nău nchrăp kan. Ndơ ƀư trong geh jong 15km đah prăk ntuh kơl lĕ dơi rgâl lah rlău 720 rmen prăk. dŭt năm 2020, tâm rnôk ndâk ƀư geh 70% rnoh ndơ ƀư lĕ an rlu ndâk ƀư bah nĕ tât aƀaơ yor mô tŏng prăk./.