Ngih pah kan rgum mom ndăm n’gor Dak Lak hvi 3ha, ta phường Tự An, nkuăl ƀon têh Buôn Ma Thuột. Nău kan geh du ngih rgum âk nău kan geh 2 dăp hvi rnoh dŏng 3 rbăn mét vuông. du ntŭk re n’hanh 2 ntŭk ăch cho, tơh kho ao, tach jâng gung bê tông hvi 1.500 mét vuông n’hanh mpông n’gar têh, n’gar văr mât njrăng.

Nău kan geh lĕ rnoh prăk kan lah 62 rmen. Ngih aơ geh ƀư bâh năm 2013 n’hanh ƀư lôch ta năm 2017. Yơn lah, ngih geh ƀư âk rmen prăk aơ nklơi dơm bâh nĕ tât aƀaơ. Wa Võ Đình Thận, nuĭh kan mât uănh ntŭk kan an gĭt.

Gâp pah kan ta aơ geh 5 năm hôm, saơ jŏ jŏ mpeh đoàn viên geh rƀŭn tâm mâp 1-2 tơ̆. Bâh nar gâp gŭ lah mô geh điện, dak dâl, hăn dăn dak ƀon lan dăch nĕ sĭt dŏng. Ngih lĕ khuch, ntrŭh mih bâh ta ba lơ, chor jay ba năp rĭ lĕ sial ntô̆ roh hôm”.

Ngih geh ƀư ta rnoh neh têh geh nklơi dơm, jêng nuĭh ƀon lan dŏng tach jâng gung ƀư ntŭk ih cà phê, tuh mbo n’hanh nchiăp trôk. Yuh Nguyễn Thị Thanh Mai, jay dăch ngih  pah kan rgum mom ndăm Dak Lak an gĭt.

Gâp saơ mô geh rgum, pah kan ta aơ, ba năp rơh nuh srê Covid-19 rĭ saơ mpeh đoàn mom ndăm tât tâm nđur njroh mprơ 1-2 tơ̆ dơm, lôch nĕ nuh srê mô hôm saơ nkre. Lôch nĕ nklơi dơm rĭ ƀon lan saơ mô dŏng khân păng mbơk ndrôk tâm nĕ, cà phê, tuh mbo rĭ jŏ jŏ rdeng tât ta nĕ ih”.

Yuh H’Giang Niê, Bí thư Đoàn n’gor Dak Lak kơp dơn, ngih pah kan rgum mom ndăm Dak Lak lĕ mô hôm dŏng 5 năm aơ hom.

Aƀaơ âk ntŭk ta ngih aơ lĕ khuch lĕ rngôch. Nkô̆ nău lah yor mô geh nău dŏng, mô dơi geh njêng nău leo kan. Đoàn n’gor dôl mô tŏng 18 biên chế, tâm rnôk nău ntrŭnh aƀaơ mô an njêng ntŭk kan mhe. Rlău ma nĕ, rnôk nău kan ƀư lôch ta năm 2017 rĭ ăp trong hăn ta nkual aơ mô hŏ ƀư lôch.

Yuh H’Giang Niê an gĭt, Đoàn n’gor lĕ geh săm ƀŭt dăn đă đah UBND n’gor Dak Lak ntop tay rnoh prăk nkra mhe ăp ntŭk lĕ khuch, nkre lah pă dăp tay rnoh biên chế njêng nău leo kan pah kan ta ntŭk aơ, tâm rgop đah ăp ntŭk kan, n’gâng kan ndrel tât râng gay ma ndơ̆ ntŭk kan lăp pah kan.

Mpôl hên lĕ ntĭm đă đoàn nkuăl ƀon têh Buôn Ma Thuột ndrel nsum ti đah mpôl kan mom ndăm bâh Đoàn n’gor ƀư ăp nău kan mom ndăm gay ma mât nău ueh an ngih pah kan. Tâm rgop đah UBND phường Tự An mbơh tơih, rgŏ jă ăp rnăk ƀon lan mô mbơk lêng ndrôk sŭr, dŏng tach jâng gung ih til tuh mbo. Rlău ma nĕ, Đoàn n’gor hôm nha mbơh tơih tât ăp rnăk ƀon lan văr nĕ gay ma nkah oh kon mô dơi lăp ta aơ re dak der geh nău tât rmok dak”.