Năm pâl nđaih ngih dak năm 2022 lĕ geh rlău 210 nău kan văn hóa, pâl nđaih geh ƀư ta lam dak, tâm nĕ, êng Quảng Nam geh ƀư 73 nău kan, ntop ƀư trĕ lam nău kan, săk rnglăy bâh nău pâl nđaih đah n’gâng kan wăng sa neh dak.

Bol ma năch pâl nđaih lam ntur neh tât ta Việt Nam ê hŏ geh nău dơi kơt nơm ŭch, yơn năm 2022, Việt Nam lĕ vơt 3,5 rkeh năch. Lĕ rnoh năch pâl nđaih ta ntŭk geh klâp ma rlău 101,3 rkeh nuĭh. Lĕ nău geh pâl nđaih nchroh geh 495 rbăn rmen prăk. Bôk ntuh nghệ thuật ta rơh nglôch lôch năm pâl nđaih ngih dak-Quảng Nam 2022 geh nău jŏ 90 mnĭt, mbơh tơih nău Quảng Nam- nkual neh geh âk nău tâm rŏng mpeh văn hóa, lịch sử cách mạng, pah kan mhe, rgâl mhe...đah âk nău dơi, nău ơm geh, văn hóa gay ma hun hao pâl nđaih, uănh năl nău geh leo ƀư năm pâl nđaih ngih dak-Quảng Nam 2022, nkre lah mbơh ndơ̆ Cờ leo kan ƀư năm pâl nđaih ngih dak năm 2023 an n’gor Bình Thuận đah bôk nău “Bình Thuận- rgum nău ueh nđir”.