Rơh rƀŭn nchră gâl têh ASAEN - Úc tal 3 rnê nău mbơh tơih nău nchrăp pah kan năm 2020-2024. Tâm 2022, lĕ rnoh prăk tăch rgâl đah 2 ding geh 101 rmen đôlar, tâm rnôk FDI bâh Australia ta ASEAN geh rlău 2 rmen đôlar. Thủ tướng Australia Anthony Albanese lah na nê̆ uănh khlăy ASAEN, ton mbơh tơih trong kan tâm kơl wăng sa Đông Nam Á tât năm 2040, njêng nău nsrôih ueh an nău tâm boh kan lĕ rngôch ASEAN- Australia.

Ta rơh rƀŭn nchră gâl têh ASEAN- LHQ tal 13, ăp ding mbra tâm mbơh nău mpŏng kan n’hanh tâm ton n’hao nău chủ nghĩa âk ding, ryơk pháp luật, n’hao nău tâm rgop tâm rdâng đah ăp nău ntul rlong lam ntur neh. Tổng thư ký LHQ Antonio Guteres lah na nê̆, LHQ an geh nău hăn ndrel bâh ăp trong kan âk ding kơt lah ASEAN, n’hanh đă ntrôl dăng nău tâm kơl kan 2 ding ta trong ƀư tĭng ăp nkô̆ mpŏng hun hao nâp nâl, tâm nĕ uănh khlăy tâm kơl rgâl mhe ŭnh nar, ntĭm nti rnoh mbrô, dak si, nău kan, mât âk nău kan sinh học, mât njrăng mih sial...Lah na nê̆ Việt Nam lah dak kan ndrel âk, leo kan tơm khlăy bâh ASEAN n’hanh LHQ, Thủ tướng lah na nê̆ Việt Nam mbra mô rlu nsrôih đah nău dơn kan khlăy, tâm rgop âk an nău kan nsum bâh LHQ, n’hao nău tât râng pah kan mât đăp mpăn, nkre lah ƀư lôch ueh ăp nău kan tơm khlăy lam ntur neh geh pă an.

Ta meng rơh rƀŭn nchră, nar 7/9, Thủ tướng Chính phủ Phạm Minh Chính lĕ geh ăp rơh tâm mâp đah Thủ tướng Australia Anthony Albanese n’hanh kruanh mpôl kan liên bang Nga, kruanh n’gâng kan nchră nău dak bah dih Sergei Lavrov.

Kêng măng nar 7/9/2023, Kruanh ăp dak ASEAN n’hanh dak kan ndrel lĕ râng n’glôch jêh Rƀŭn nchră Gưl prêh ASEAN rơh tal 43 n’hanh ăp rƀŭn nchră Gưl prêh geh tât n’hanh ƀư jao an nău kan Kruanh ASEAN bah Indonesia an Lào.

Tâm ntoh ngơi dơn kan ƀư Kruanh tâm pleh bah ASEAN tâm năm 2024, Thủ tướng Lào Sonesay Siphandone na nê̆ mbơh bôk nău bah năm ASEAN 2024 lah “Ntrŭt boăt nthoi n’hanh hao êng”, nkoch ăp nău khlay, kơl lor mpeh nâp nâl tâm rnglăp, tâm ban ŭch n’hanh nău tơm bah ASEAN, ntrôl ndâk njêng Nsum mpôl boăt nthoi na nao, hao êng, nâp nâl n’hanh tâm di bah năp nău ntŭl rlong, rgâl ngăch, jêr jŏt tâm nkual. Jêh 3 nar pah kan ndăn n’hanh dŭt n’hâm, Rƀŭn nchră Gưl prêh ASEAN rơh tal 43 n’hanh ăp Rƀŭn nchră Gưl prêh geh tât lĕ lôch uĕh. Măng nar 7/9/2023, Thủ tướng Chính phủ Phạm Minh Chính ndrel mpôl đại biểu Việt Nam lĕ sĭt bah Indonesia sĭt dak, lôch uĕh rơh pah kan râng Rƀŭn nchră Gưl prêh ASEAN rơh tal 43 n’hanh ăp rƀŭn nchră Gưl prêh geh tât.