Tâm rơh hăn khâl n’hanh pah kan ta Campuchia, nar nđaơ (29/8) mpôl đại biểu n’gor Gia Lai yor wa Hồ Văn Niên-Ủy viên Ban Chấp hành Trung ương Đảng, Bí thư N’gor ủy, Kruanh UBND n’gor ƀư kruanh rmôt lĕ geh nar pah kan đah mpôl kruanh n’gor Ratanakiri (Campuchia) yor Groi krunah n’gor Ma Vichet ƀư kruanh rmôt.

Ta nar wơt, ndơn măt Đảng bộ, n’gâng kan n’hanh ƀon lan  n’gor Gia Lai, Bí thư N’gor ủy Hồ Văn Niên lĕ mbah rhơn jêh săch Quốc hội Campuchia khóa 7, mbah rhơn neh dak geh Chính phủ mhe yor Thủ tướng mhe Hun Manet djôt bôk; nkre mpŏng Chính phủ mhe ndrel Đảng, n’gâng kan n’hanh nuĭh ƀon lan Campuchia ndâk njêng tay neh dak nar lơ nâp dăng, uĕh lăng; ndrel soan, ndrel nuih n’hâm ndâk njêng nău tâm boh dăch deh, tâm rnglăp đah Việt Nam-Campuchia lah nsum n’hanh Gia Lai-Ratanakiri lah êng nar lơ nâp nâl. Groi Kruanh n’gor Ratanakiri mpŏng n’gor Gia Lai ntop kơl kan ndrel tay đah 2 n’gor, ƀa ƀơ nta nơih an nuĭh ƀon lan, doanh nghiệp 2 ding dơi tâm rgâl nti nsơm nău blău ơm hun hao wăng sa, tăch rgâl, hăn nsong, tâm rgâl ndoh ndơ bah nuĭh ƀon lan, doanh nghiệp.