Tâm ăp nar bah năp, nău mbơh mpeh n’gơ neh dăng 5 độ richter geh nung nar 28/7 ƀư n’gơ dăng dơi nuĭh ƀon lan nkoch. Kônh wa lĕ nkoch tay ăp nău gĭt saơ, nkre nău gĭt rnôk saơ nu nău. Yuh Y Phiếu, nuĭh ƀon lan ƀon Rô Xia, xă Đăk Tăng, lah kơt aơ:

Gâp hăn luh bah dih bôk năp lor jêh nĕ lah hăn joi kon bah gâp. Nuĭh ƀon lan bôk năp rvê yor lah pơng dăng ir yơn jêh rnôk ăp nuĭh ntrŭt nsôr, rkleh, ntĭm jêng lah nuĭh ƀon lah plơ̆ tay nâm ơm.

Jêh rnôk geh n’gơ neh, tâm ăp nar bah năp, n’gâng kan ƀon lan, nsum mpôl ăp xă bah nkuăl Kon Plông, n’gor Kon Tum lĕ đă cán bộ tât ăp thôn, ƀon uănh nđôi nu nău, nkre nkah ntĭnh nuĭh ƀon lan nchră rdâng njrăng lah geh tay nu nău n’gơ neh. Wa Nguyễn Văn Bay, Kruanh UBND xă Đăk Tăng, an gĭt, knơm mbơh ngăch jêng nuĭh ƀon lan ta 11 ƀon tâm xă dơi dêr nău klach rvê mpeh n’gơ neh:

Jêh rnôk geh n’gơ neh dăng lơ 28/7, đah nău ntĭm rđău bah UBND nkuăl, xă ndâk ƀư ăp rmôt pah kan rgŏ jă ăp đồng chí blău ơm tâm trong kan nkoch trêng, rgŏ jă n’hanh hăn uănh lah nu nău ta ăp thôn ta lam xă. Nkre rkleh ntĭm đăp mpăn an kônh wa, nkoch trêng tay, rgŏ jă kônh wa đăp mpăn pah kan jan sa.

Nchrăp rdâng njrăng đah n’gơ neh, khay bah năp tă jêh Viện Vật lý địa cầu lĕ tâm rgŏ đah n’gâng kan nkuăl Kon Plông ƀư âk rơh tiăr năp nău wât blău an nuĭh ƀon. Knơm nĕ âk nuĭh ƀon lan ta ăp xă nkual nklang n’gơ: Đăk Tăng, Đăk Nên, Đăng Ring, Măng Bút, Ngọc Tem... geh nti da dê n’hanh blău rdâng njrăng đah n’gơ neh. Oh Nguyễn Bỉnh Khiêm ta thôn Vi Xây, xă Đăk Tăng, an gĭt ăp nău an ƀư tâm nu nău geh n’gơ neh gay njrăng n’gang săk nơm n’hanh nsum mpôl:

Rnôk mon hăn nti lah mon lĕ dơi nai ta ngih sam ƀŭt n’hanh ăp nău ƀư ta xă, thôn nkoch trêng mpeh trong njrăng n’gang n’gơ neh. Rnôk geh nu nău n’gơ neh lah gâp lăp tâm dâng nsưng mô lah bah dâng nsưng bĭch gay dêr ăp ndơ dŏng mô lah chor jay tŭp gay njrăng n’gang nău rêh bah nơm.

Hôm oh Y Vỹ (gŭ ndrel ta xă Đăk Tăng) an gĭt nău ƀư dŭt geh nkô̆ bah nơm, gay kơl kônh wa gĭt trong rdâng njrăng đah n’gơ neh.

Geh nuĭh dơi gĭt đŏng yơn âk nuĭh ranh geh nuĭh gĭt yơn geh nuĭh mô gĭt. Mpôl mon nkah ntĭnh, nkoch trêng an khân pơng gĭt lăp tâm dâng nsưng ngêt dak n’hanh hăn luh ntŭk nsoih gay ma mô khuch an săk nơm.

Bah khay 4/2021 tât aƀaơ ta nkuăl Kon Plông, n’gor Kon Tum lĕ geh nklăp 800 rơh n’gơ neh n’hanh tĭng năl lah bah Viện Vật lý địa cầu aơ lah n’gơ neh nsôr yor nău ntêm dak n’glău thủy điện ƀư. Tâm 2 nar mhe rlău, ta năp nu nău n’gơ neh geh ndal đah rnoh ntoh âk, dăng ngăn bah sa ơm tât aƀaơ, wa Lê Đức Tín, Groi Kruanh UBND nkuăl Kon Plông, an gĭt trong way ƀư bah nkuăl lah nchrăp njrăng n’hanh dêr ƀư klach tâm nău rdâng njrăng đah n’gơ neh.

Mpôl hên dŏng tay sam ƀŭt sam tra bah Viện Vật lý địa cầu geh dŭt tŏng ăp nkô̆ nău gay ntĭm, mbơh rblang tay an ƀon lan nchrăp rdâng njrăng tâm ăp nu nău. Ntĭm rđău ăp xă ƀư nkoch trêng, rgŏ jă, mbơh rblang nău wât tât ăp thôn, ƀon, tĭng rnăk gay gĭt tay n’hanh blău rdâng njrăng uĕh lơn. ƀư tiăr nti tât nkual nklang ntŭk n’gơ jêh nĕ mbơh ta ăp thôn êng ta lam nkuăl. Tă bah nĕ, kơl an Ban ntĭm rđău ta ăp xă geh nău blău ơm rnôk geh nu nău n’gơ neh.

Nău mbơh bah Ntŭk nchroh mbơh nău n’gơ neh n’hanh mbơh njrăng dak lêng rdŭl-Viện Vật lý Địa cầu an saơ, tâm 2 nar 28 n’hanh 29/7 lĕ geh 46 rơh n’gơ neh đah ntŭk n’gơ ta nkual nkuăl Kon Plông, n’gor Kon Tum. N’hêl na nê̆ an saơ rlău ma n’gơ neh dăng 5 độ richter geh ta nung nar 28/7 ƀư n’gơ ta lam hvi ri ăp rơh n’gơ neh hôm ƀa ƀă nuĭh ƀon lan mô gĭt saơ n’gơ. Khuch khat yor n’gơ neh mô hŏ geh khuch têh đah drăp ndơ. N’gâng kan ƀon lan n’hanh nuĭh ƀon lan ta nkual ntŭk n’gơ neh nkuăl Kon Plông, n’gor Kon Tum dôl nchrăp rdâng njrăng tay đah nu nău geh ndal bah n’gơ neh./.