Đah nău nsum ti bâh ƀon lan ta ăp thôn, ƀon, ngăn lah ăp bu ranh ƀon, kruanh ƀon, nuĭh geh nău knơm, nău kan njrăng rdâng nuĭh tih, ăp nău ƀư tih geh tât n’har bri ngih dak lĕ geh mât n’hao ueh. Bâh nĕ, ntop mât nâp ueh nău ƀư tơm, n’har bri đăp mpăn.

 Lĕ jêng nău way, ta nar dŭt pơh, rmôt kan mât uănh trong n’har bri n’gâng ntăm n’har bri Ƀon Đrang Phôk, xã Krông Na, nkuăl Buôn Đôn, hŏ hăn ndrel tay đah ăp cán bộ, tahen pôih n’har bri Sêrepôk hăn uănh nđôi, uănh njrăng ta nkual trong n’har bri, n’gâng ntăm. Wa Y Mosk H’ra, nuĭh geh nău knơm bâh ta ƀon an gĭt, ƀon lan lĕ gŭ rêh dŭt jŏ ta nkual rđŭng bâh bri ngih dak mât Yok Đôn, yor nĕ, ndrel đah mât ueh trong n’har bri, n’gâng ntăm n’har bri, nău kan mât bri ta nkual n’har bri geh uănh khlăy đŏng. Bu ranh ƀon, ăp nuĭh geh nău knơm way leo ăp nuĭh mom bâh ƀon hăn ndrel đah mpôl kan tahen gay ma mât tĭng tơm si, nđam neh ta n’har bri.

“Lĕ ƀon lan hên lah tâm rgop đah pôih tahen n’har bri Sêrêpok, mpôl pah kan ta ƀon lan, mât bri rĭ tâm rgop đah kiểm lâm mât bri ngih dak mât Yok Đôn gay ma mât uănh bri n’hanh mât n’gâng ntăm n’har bri, trong n’har bri. Mbơh tơih bâh nuĭh têh an tât oh kon se jê̆ lah dŭt n’hâm mât ueh trong n’har bri, lôch nĕ mbơh tơih an oh kon se lah mô dơi hăn ntung tât let dak băl”.

Ta xã n’har bri Ia Lôp, nkuăl Ea Sup, 12 thôn lĕ geh njêng năm 2006 tĭng bôk nău nchrăp kan ntrơn ƀon lan hun hao wăng sa mhe bâh Binh đoàn 16- n’gâng kan mât rnă njrăng ngih dak aƀaơ lah mpôl wăng sa mât njrăng ngih dak 737, Quân khu 5. Yuh Hà Thị Phê, ta thôn Đừng, xã Ia Lốp an gĭt, tât ta aơ njêng nău kan rnôk hôm nha mom, 17 năm gŭ rêh, gŭ sai, yuh tâm ban kơt âk nuĭh ta aơ uănh ta aơ lah ƀon tơm tal 2 bâh nơm. Ƀon lan ta aơ lĕ gĭt na nê̆ nău kan bâh nơm, nău mĭn kan bâh nơm đah ngih dak. Mât ueh trong n’har bri, n’gâng ntăm n’har bri, lah mât ueh nău rêh bâh ăp rnăk vâl, bâh ăp thôn, ƀon. Ăp nuĭh ƀon lan lĕ uănh nơm kơt lah n’gâng rêh ta nkual neh n’har bri.

“Geh nău mbơh tơih bâh ăp kônh, ăp nô tahen n’har bri mpeh nău mât njrăng n’har bri ngih dak, săk gâp nơm ndrel đah rnăk vâl lĕ gĭt vât nău aơ dŭt khlăy đah nuĭh ƀon lan hên. Gâp mbra rgŏ jă rnăk vâl, oh nô, kon său nơm ƀa ƀơ tâm rgop đah ăp nô tahen n’har bri, tahen ƀon lan, công an xã tât râng nău kan mât ueh n’har bri”.

N’gor Dak Lak geh rlău 71 km trong n’har bri dăch đah dak Campuchia. Ƀư tĭng nău ntrŭnh mbrô 01/CT-TTg, nar 9/1/2015 bâh Thủ tướng Chính phủ “Mpeh nău leo ƀư nău kan lĕ ƀon lan tât râng mât nău ƀư tơm nkual neh, rnă njrăng n’har bri ngih dak tâm nău mhe”, n’gâng kan ăp xã n’har bri lĕ tâm rgop na nê̆ đah ăp pôih tahen, ăp mpôl kan pah kan ta n’har bri gay ma ƀư ueh jăp nău kan mât rnă njrăng đăp mpăn, mât nău ƀư tơm nkual neh, rnă njrăng n’har bri ngih dak. Âk nău kan mpeh mât rnă njrăng lĕ  geh rdâk njêng n’hanh ƀư ueh kơt lah “Đah mom đah pháp luật”, “gloh loih rnă njrăng”, “Gloh loih mât njrăng ngih dak”. Ta 4 xã n’har bri ta 2 nkuăl Buôn Đôn n’hanh Ea Sup aƀaơ geh rlău 2.400 mpôl kan, rnăk vâl, nuĭh kan tât râng mbơh tơih mât uănh bơi tât 60km trong n’har bri n’hanh 4 n’gâng ntăm n’har bri. Trung tá Nguyễn Thanh Tùng, pôih tahen kruanh pôih tahen mât rnă njrăng ngih dak Ea  H’leo, tahen n’har bri n’gor Dak Lak an gĭt, nău tâm rgop kan đah pôih tahen đah ăp rmôt kan chính trị, rêh jêng, ăp mpôl kan, ntŭk kan ta ăp thôn ƀon dôl nsĭt tay săk rnglăy tâm nău pah kan mât nău ƀư tơm, rnă njrăng n’har bri ngih dak.

“Ntŭk kan lĕ tâm rgop đah ăp ntŭk kan n’gâng kan, geh ăp nău ntrŭnh kan đah mpôl bu ur, mpôl kan tahen ơm, tât râng ndrel đah mpôl kan tahen pôih tahen n’har bri gay ma uăn nđôi, mât n’gâng ntăm n’har bri. Ăp thôn ta ăp ntŭk mbơh tơih nău kan mô geh nuĭh tih n’hanh mbra ndrel đah tahen n’har bri njrăng rdâng, mbơh ăp nuĭh tih tât ta nkual n’har bri”.

Đại tá Đào Việt Hùng, kruanh tahen n’har bri n’gor Dak Lak an gĭt, ndrel đah nău kan “Nău kan  lĕ ƀon lan tât râng mât ueh nău ƀư tơm nkual neh, rnă njrăng n’har bri ngih dak tâm nău mhe”, nău kan rdâk njêng, ndâk nsơm, n’hao nău ueh di pah kan bâh ăp ntŭk kan Đảng, n’gâng kan n’hanh ăp mpôl kan ta xã n’har bri lah nsum geh ndâk nsơm ƀư lĕ rngôch n’hanh ăp nar lơ ma pah kan geh săk rnglăy. Mpôl cán bộ, đảng viên mât njrăng ngih dak geh đă sĭt rêh ta ăp thôn, ƀon, cán bộ n’har bri mpeh ƀư groi Bí thư ăp xã dôl n’hao nău kan ƀư tơm tâm ăp nău kan, ăp bôk nău kan, nău nchrăp an hun hao wămg sa- văn hóa- rêh jêng, mât đăp mpăn hun hao wăng sa tâm rgop đah mât rnă njrăng ngih dak, rnă njrăng ta n’har bri.

“Mpôl hên geh nău way pah kan đah nkuăl ủy, ăp pôih tahen n’har bri an nău way pah kan đah đảng ủy ăp xã gay ma njêng nău tâm ban, dơn ngoăy tâm đảng mpeh nău leo kan, nuĭh leo kan, lôch nĕ dơn ngoăy tâm nău dŏng nuĭh kan. Ntĭt lah tâm nău mât leo kan mât ueh n’har bri rĭ mpôl hên an tâm rgop ueh tĭng Nghị định 03 bâh Thủ tướng chính phủ. Đah nău kan lĕ ƀon lan rĭ hên lah na nê̆ ŭch ƀư ueh nău kan năp lor an geh rgum ndrel đah cấp ủy, n’gâng kan ta ntŭk ndâk nsơm nău kan ba dâng, ngăn lah ntŭk kan đảng ba dâng. Aƀaơ ta 2 nkuăl n’har bri geh 38 thôn ƀon rĭ mpôl hên lĕ geh cán bộ tahen n’har bri tât râng pah kan rgum nsum đah ăp thôn ƀon”.

Ndrel đah nău kơl an mô rlu bâh ăp tahen n’har bri grat nđir, nău nsum ti bâh nuĭh ƀon lan lĕ ntop mât ueh nâp nkual neh, mât rnă njrăng đăp mpăn ta nkual neh n’har bri bâh n’gor Dak Lak.