Ôi 26/12 ta Hà Nội, Đại hội đại biểu lam dak Hội Nông dân Việt Nam rơh tal 13, năm kan 2023-2028 ntơm ƀư ta Ntŭk rƀŭn nchră Lam dak Mỹ Đình. Tổng Bí thư Nguyễn Phú Trọng tât râng n’hanh geh nău ntoh ngơi ntĭm rđău ta Đại hội. Đah bôk nău “Tâm rnglăp-Ƀon lan ƀư tơm-Mĭn ƀư mhe-Kan ndrel-Hun hao” Đại hội Hội Nông dân Việt Nam rơh tal 13 geh rgop măt bah bơi 1 rbăn đại biểu na nê̆, ntoh măt an rlău 10 rkeh nuĭh râng, nuĭh ƀon lan lam dak.

Ta Đại hội, ăp đại biểu rgum tâm nchră, an rgop tâm dự thảo ăp sam ƀŭt khlay, geh: Nău mbơh chính trị bah Ban Chấp hành Trung ương Hội Nông dân khóa 12; Dự thảo mbơh kiểm điểm bah Ban Chấp hành Trung ương Hội Nông dân khóa 12; Dự thảo Điều lệ Hội Nông dân Việt Nam (ntop tay, nkra rgâl). Đại hội tâm nchră nău ntrŭnh trong rƀŏng, nău rƀŏng, nău kan an lĕ năm kan; săch Ban Chấp hành năm kan 2023-2028. Tâm trôm đại hội mbra geh 10 rƀŭn tâm nchră chuyên đề gay dăn đă trong mkra ăp nău têh n’gluh an đah nău kan bah Hội Nông dân Việt Nam, rgum djăt ăp nău rgop, dăn đă lĕ rngôch, djăt tâm sam ƀŭt Đại hội.

Ntoh ngơi ntĭm rđău đại hội, Tổng Bí thư Nguyễn Phú Trọng đă, ăp gưl Hội Nông dân lam dak an rgâl mhe têh lơn tay nkô̆ nău, trong ƀư, n’hao uĕh, săk rnglăy nău ƀư bah hội; ndâk njêng Hội Nông dân Việt Nam nar lơ nâp dăng, ngăn ngên lah rmôt ntoh măt an nău dơi, nău geh tâm di luật, tâm di bah ƀon lan; mât uĕh nău ƀư tơm ta n’gul, n’gâng tơm an ntrong leo ƀon lan, lah ntung nthoi đah ƀon lan đah Đảng, Ngih dak; lah nkô̆ nău  nsrôih tâm rnglăp lam rnoi nuĭh, tâm rgop “phung pah kan-ƀon lan-nuĭh gĭt blău”.