Ôi 12/12, Thủ tướng Phạm Minh Chính n’hanh Thủ tướng Campuchia Hun Manet rân rƀŭn ntrŭt ngăch ntuh kơl n’hanh tăch rgâl Việt Nam-campuchia. Ntoh ngơi ta Rƀŭn, Thủ tướng Campuchia Hun Manet mĭn lah mbra ntrôl rgâl ntŭk ntô ntuh kơl tăch rgâl đah ăp trong tơm khlay, ngăch prăl gay đăp mpăn ăp nuĭh ntuh kơl đăp mpăn ntuh kơl ta Campuchia. Chính phủ Campuchia mbra nsrôih gay nta nơih lơn an ăp nuĭh ntuh kơl dak bah dih; kuăl jă ăp nuĭh ntuh kơl 2 dak n’hao kan ndrel tâm nău kan wăng sa n’hanh ntuh kơl tă bah ƀư rƀŭn nchră, rgum nchră tăch rgâl ntuh kơl geh jă kruanh 2 dak; kuăl jă ăp nuĭh ntuh kơl Việt Nam hăn ntuh kơl ta Campuchia âk lơn tay; ntrŭt ngăch ăp nuĭh ntuh kơl Campuchia ntuh kơl an Việt Nam gay rgop ân nău ƀư nkra njêng, tăch rgâl, trong tâm pă bah nơm.

Mpeh đah nơm, Thủ tướng Phạm Minh Chính uănh lah prêh nău n’hao ƀư rƀŭn n chră; uănh lah ăp đại biểu râng dŭt n’hâm rgop rgum dăch dêh n’hanh kan ndrel đah 2 dak. Đah Việt Nam kơt Campuchia, 2 dak mbra nta uĕh ngăn an ăp nuĭh ntuh kơl. Thủ tướng kuăl jă ăp nuĭh ntuh kơl rgum an rgâl mrô, wăng sa tâm pleh, ntuh kơl nsing tâm khoa học công nghệ, rgâl mhe, tă bah nĕ n’hao 2 jâng wăng sa, tâm pă nău blău ơm kan ndrel, pơk hvi tay ntŭk ntô an hun hao.