Ôi aơ 17/3 ta Hà Nội, ntơm pơk Hội báo lam dak 2023. Hội báo ƀư tâm 3 nar ntơm bah 17/3 tât 19/3 đah nkô̆ "Tâm rnglăp - way rnâng kan - Văn hóa - blău ƀư mhe". Hội báo lam dak năm aơ đah 87 ndrơng ndơ pla n'hơ bah 63 Hội Nhà báo n'gor, nkual ƀon têh, 60 nhih pah kan báo chí Trung ương n'hanh n'gor, ndrel ăp ndrơng ndơ pla n'hơ way nkô̆ ntoh lư bah ăp Liên Chi hội: Báo Nhân dân, Đài Tiếng nói Việt Nam, Đài Truyền hình Việt Nam, Thông tấn xã Việt Nam, Bộ Thông tin n'hanh truyền thông... n'hanh nău tât râng bah ăp nhih pah kan ntĭm nti, kơi nău năp gĭt blău báo chí, nkual pla n'hơ bah ăp đơn vị pă an ndơ dŏng kan báo chí – nkoch trêng têh mhe.

Ntŭk rgum bah Hội báo năm aơ lah rêng kan mpeh nghiệp vụ báo chí, kơt Tâm nchră rgum mâp giải A Báo chí Quốc gia dơi pơk sŏng dăng kalơ sóng bah Đài Tiếng nói Việt Nam; Tâm nchră A.I n'hanh mât blău mĭn mhe nkô̆ tâm toà soạn; Tâm nchră ntĭm nti n'hanh kơi năp nău gĭt blău kan báo chí tĭng nău ŭch geh... Bah nê nuĭh ƀư báo tâm dak n'hanh lam nuĭh geh rnôk kơt nti ma ăp nău nchih báo chí dŭt uĕh blău, rgop n'hao dăng lơn đŏng báo chí săk blău uĕh.