Măng (10/3), ta Quảng trường 10/3, nkual ƀon têh Buôn Ma Thuột, n'gor Dak Lak hŏ ntơm pơk Lễ hội cà phê Buôn Ma Thuột tâl 8, năm 2023. Groi thủ tướng Chính phủ Trần Lưu Quang, kruanh rđău kan ăp n'gâng kan, kruanh rđău  kan n'gor Dak Lak rlău ăp rơh, ntơh măt ăp tơm nuĭh nkret njêng n'hanh tăch n'gluh cà phê tâm dak n'hanh dak bah dih, âk mpưm ƀon lan ăp rnoi nuĭh tâm n'hanh bah dih n'gor râng.

Đah nkô̆ "Buôn Ma Thuột – ntŭk rgum tât bah cà phê lam ntŭr neh" Lễ hội Cà phê Buôn Ma Thuột tâl 8 lah rjăp tay n'hanh n'hao ntŭk gŭ kan têh khlay bah cà phê Việt Nam ta ntŭk tăch rgâl lam ntŭr neh. Lah ta rơh lễ, Groi thủ tướng Trần Lưu Quang lah rjăp kruanh rđău kan n'gor ân rdâk njêng trong nkoch n'hơ, marketing, năl dơi săk ntơ lư tâm di đah nău dơi kan bah he. Ntrôl dăng hun hao cà phê săk kah, cà phê kah khlay Việt Nam đah n'hôl ƀô kah mha êng, dơi kơp dơn tĭng di rnoh dak bah dih tŏng đah nău ŭch geh bah nuĭh dŏng nar lơn ma âk.