Plŏ tâm ndrâm dak Sêrêpôk, ntŭk nơm ndrel ăp nŭih tahen nơm gŭ tă bah jŏ ƀư nau kan pơk trong hăn, Đại tá Lê Xuân Bá, tă kan tâm Trung đoàn Kruanh Trung đoàn 4 công binh, Sư đoàn 470 Binh đoàn 12 nkah gĭt ngăn. Mpoh kthup nkah tât ăp tahen ndrel nơm lĕ khĭt, wa Bá nchŏng ty tât ndrâm dak, nkoch: tâm bôk yan vai năm 1973, ntŭk kan bah khân păng geh jao nau nkra ntung ntơm trong 19 lăp mpeh ba dâng Tây Nguyên, đăp mpăn hăn Buôn Ma Thuột. Ta ntŭk aơ, wa ndrel âk tahen êng ân ndeh sar ndrel du ntung nthông ân neh ô tô, ndrak phao jâk, tahen choat dak Sêrêpôk. Tâm rnôk tâm lơh duh jang, nau kan pơk trong ân nâp ndrel ƀư nau kan ân tĭng nâp “hăn mô geh têl, gâm mô dơi n’huk ŭnh, ngơi mô tăng nteh”.

“Ndeh sar, ndeh njŏng loih geh trong hăn êng. Du trong lah ƀư du ntŭk nơih teng hăn ntơm bah kơh đah aơ hôm ntơ lah ndrâm ba lơ, đah ri moh lah ndrâm ba dâng. Hvi ngăn bah ndrâm aơ nklăp 6m, jong hăn tât kơh đah ri lah 200m. Ntŭk nê lah du ntŭk dăp lŭ dŏng ndeh sŏk rdeng lŭ dăp ân tâm ban gay ma tŏng dơi hăn lăn ân ndeh sar, ndeh jrŏng loih hăn. Jêh rnôk nkra ri ma rhiăng ndeh sar, ndeh jrŏng loih hăn trong aơ”.

Tĭng nau wa Bá, ntung nthông aơ geh moh lah LPP geh ndop ƀư đah ăp duk loih dăp tâm dăch, măt ntung geh ƀư đah kđar. Nâm ntung geh njêng tă bah ăp ntŭk lŭ dăp âk tâm ban gay ma nkra jêng trong hăn. Ntŭk aơ jêh mra leo ăp binh đoàn ƀư tơm, ndeh sar, ndeh loih hăn mpeh ăp n’gor mpeh Đông Nam Bộ, jêh aơ râng nau tâm lơh Hồ Chí Minh năm 1975.

Tâm rnôk nkra trong, nthoi ntung đah dak me Sêrêpôk, tahen tâm lơh dăng ngăn. Đah nuih n’hâm tâm lơh ngăn, rjăp gay ma mât trong, 57 tahen bah Trung đoàn 4 công binh ndrel Tiểu đoàn 21 tâm Sư đoàn 470 hŏ khĭt tâm ndrâm dak rnôk choat. Đại tá Đặng Đình Đường, Kruanh Sư đoang 470 nkah tay, tâm ăp năm khay rnôk nê, nuih n’hâm nsôih “khĭt săk nơm ân neh dak geh ndâk rêh” kơl an ăp cán bộ, tahen rlet âk nau jêr, nau jâk gay ma ƀư jêh nau kan:

"Gĭt phung rlăng tâm lơh duh jang kơt nê yơn lah tahen nơm gĭt lah nơm nkra trong, leo ndeh ndrel kon nŭih hăn tâm lơh. Ma nau khlay ta aơ lah bu khĭt kđôi săk nơm mô geh nau nghoach, knŭng geh nau lah dơi huch oi dơm. Hôm ăp nŭih tahen bah hên, dĭng lĕ 57 nŭih lĕ khĭt ta nê ri khân păng kŏ geh ndrel du nau mĭn kơt nê đŏng”.

 Kŏ tâm ntŭk aơ, jêh nar miền Nam đăp mpăn geh rklaih, 14 cán bộ, tahen tâm Công an ƀon lan Dak Lak (ƀa hin lah Tahen biên phòng Dak Lak) hŏ khĭt tâm rnôk tâm lơh ma phung Pôl pôt gay ma mât neh dak bah nơm.

Ntoch jong bơi tât 50 năm, tât rnôk aơ, nau nkah ơm kăl e hôm mpơl ơm n’gâng si pâng tâm măt neh nklăp 20cm. Ntơm năm 2013 ndrâm dak Sêrêpôk geh kơp dơn lah ntŭk nkah ơm ueh khlay. Ntơm bah nê tât rnôk aơ, ta aơ jêng ntŭk ueh tâm nau kan ntĭm nti mpeh nau ơm tâm lơh vay ơm bah cách mạng ân rơh mom. Êp ndrâm dak me, ntŭk nchih nkah moh săk ăp nŭih lĕ khĭt hŏ geh ndaka nkra ndrel jao ân Đồn Biên phòng Sêrêpôk mât njrăng.

Trong aơ ntơm bah ndrâm dak tât trong Quốc lộ 14C kŏ geh tŏ chai kloh ueh, nơih ân ăp nŭih tât uănh chop khâl. Gay ma nkra ueh ân ntŭk aơ, ăp cán bộ, tahen Đồn Biên phòng Sêrêpôk hŏ ndâk 2 ntŭk bah druh ndăm, tăm ăp ntil tơm sa play kơt play đur, play cam. Nau tăm tơm, rep kloh ntŭk aơ kŏ geh ăp cán bộ, tahen biên phòng ƀư mro. Thiếu tá Phạm Văn Hiếu, Bí thư Đảng uỷ, Chính trị viên Đồn Biên phòng Sêrêpôk, Tahen Biên phòng n’gor Dak Lak mbơh:

            ‘Lah rmôt tahen mât trong n’har bri, tâm nê geh ntŭk nkah ơm khlay aơ ri ăp cán bộ tahen mro nkah nau kan bah ăp kơn mbŏ, nô, ngăn lah ăp nŭih tahen janh dăng, tahen hŏ khĭt gay ma tâm lơh ndrel mât nau dơi đăp mpăn ân rnoi mpôl.

Lah ăp rơh hăn ba kơi ndrel ndơn nhoat jâng ri cán bộ, tahen phung hên mro gĭt kloh ăp nau ryơn ndrel nau kan, lŏ kơt tĭng ăp nau rêh ueh ndrel nau tă blau nau kan, nau dơi nau kan gay ma lŏ ndơn nhoat jêng ăp mbŏ, nô gay ma mât nau ƀư tơm nkual n’har bri bah neh dak tâm rnôk mhe”.

Nau tâm lơh hŏ rŭch ngai, yơn ăp ntŭk hôm nkah tâm ndrâm dak choat dak me Sêrêpôk lah ăp nau khlay ngăn, lah nau ƀư ueh dăng jang mpeh nau tâm lơh nâp, rjăp ngăn bah ƀon lan nơm. Nê lah ăp nau nkah ân ăp nŭih mpeh nau kan kơl an, nau khĭt hoach săk nơm bah ăp rơh hăn lor kăl e gay kơl an nau rklaih đăp mpăn ân rnoi mpôl, đăp mpăn neh dak nơm./.