Rơh khâl gưl Ngih dak tât Việt Nam bah Tổng Bí thư, Kruanh Tập Cận Bình hŏ jêng nkô̆ tơm ntoh ngăn geh ntŭk nkoch mbơh nau Trung Quốc nkoch tâm bar nar rlau aơ. Tâm 2 nar 12-13/12, ăp nau nkoch bah rơh khâl gưl Ngih dak Việt Nam bah Tổng Bí thư, Kruanh Tập Cận Bình geh tâm ăp n’ha báo ndrel ntŭk nkoch mbơh bah mạng Trung Quốc. Rup gui bah ƀon lan Việt Nam rhơn vơt rđau kan Trung Quốc, nau vơt tơm, tâm nchră, ngêt sa, ngăn lah mbơh nkoch n’hêl Tổng Bí thư Nguyễn Phú Trọng pă ndrel ân ndơ nê lah rup 2 nŭih dôl ngêt dak trà tâm Bắc Kinh tâm rnôk hăn khâl tâm dŭt năm 2022 ân Tổng Bí thư, Kruanh Tập Cận Bình hŏ geh rgum mbơh ndrel geh âk nŭih nkoch mbơh tâm mạng xã hội.

Tâm nau mbơh tâm Tân Hoa xã ndrel Nhân dân Nhật bái, Tổng Bí thư Tập Cận Bình lah rjăp: Nua tâm boh ueh bah Việt-Hoa, nkre lah đồng chí nkre lah oh nô lah nau rup ueh ngăn mpeh nau tâm boh Việt-Trung. Trung Quốc mro kơp dơn nau tâm boh việt-Trung tă bah gưl prêh ƀư nau kan ndrel nau jŏ jong. Wa rnơm lah, đah nau nsôih nsum bah lĕ 2 ding, nau tâm boh mra lăp tâm rnôk mhe đah nau rnơm chính trị prêh lơn, tâm boh đăp mpăn ngăn ngên lơn. Nau kan ndâk njêng chủ nghĩa xã hội bah bar dak lŏ geh dơi ăp nau kan mhe ndrel geh ăp nau rgop tâm nau đăp mpăn, hun hao ndrel nâp nâl bah nkual ndrel lam ntur neh./.