Tâm 2 nar ƀư Nar wer khĭt lam dak Tổng Bí thư Nguyễn Phú Trọng hŏ geh âk mpưm cán bộ, đảng viên, ăp rơh kơn ƀon lan, kon se nti, sinh viên …đah nuih n’hâm n’guh mbah hŏ tât njăt ntĭnh n’hanh njŭn tâp Tổng Bí thư tât ntŭk gŭ rlu n’glĕ dŭt. Bơi 6000 mpôl (đah rlău 252.000 tơ̆ nuĭh), lah ntơh măt kruanh rđău kan Đảng, Ngih dak, ăp nhih pah kan, ăp n’gâng kan, nsum mpôl, ăp n’gor,  ăp đơn vị, ăp mpôl tahen công an ƀon lan, ăp Mpôl kan tâm boh dak bah dih, ntơh măt ăp mpôl kan n’hanh băl mpôl dak bah dih, ƀon lan hŏ tât weh njăt ntĭnh,  njuăl kao si, tâm pă nău rngot klâng ndrel rnăk wâl Tổng Bí thư Nguyễn Phú Trọng. Ta nâm nuih n’hâm bah âk nuĭh ƀon lan hŏ nkah tât Tổng Bí thư, lĕ rngôch khân păng mpơl  nău uănh khlay, rngot klâng du hê nuĭh geh nău gĭt blău nuih n’hâm uĕh lŏng ăp tŏng, way n’groh lĕ nuih n’hâm he an n’gâng kan rdâk njêng n’hanh hun hao neh dak. Âk nuĭh ƀon lan an lah, Tổng Bí thư Nguyễn Phú Trọng lah du hê kruanh rđău kan tă âk nău gĭt blău, way mbrôn lĕ suan rhal, bôk rngok bah he  rhŏ dŏng an neh dak, dăch dêh đah ƀon lan, rnoi mpôl lam dak.

Hôm đah druh ndăm aƀaơ, âk băl mom an gĭt đah ăp nău rgop n’hanh nău n’groh an mô gŭ rlu an nău hun hao bah neh dak, Tổng Bí thư Nguyễn Phú Trọng way lah nuĭh ntĭt leo lor trong chrat ang, lah tơm nđơr têh gay rơh kơn druh ndăm kơt nti  n’hanh ƀư tĭng. Ma ăp nău kan ngăn ngăn, rơh druh ndăm aƀaơ nsrôih, tiăr nti tĭng nuih n’hâm uĕh lŏng bah Tổng Bí thư gay jêng du hê ƀon lan uĕh, geh âk n’hâm suan an lam rêh jêng kon nuĭh. Đoàn viên A Tống Tiến Quân, Ban Phong trào, Tỉnh đoàn Kon Tum an gĭt, khay 7 năm aơ, ndrel lam dak njŭn ntĭnh Tổng bí thư Nguyễn Phú Trọng sĭt ntŭk gŭ rlu n’glĕ dŭt n’hanh nkah gĭt ăp nău rgop têh kuâng bah Tổng Bí thư, săk nơm lơn  ma geh nău nđơr tiăr nti, nsrôih ndôr:

“Wa Nguyễn Phú Trọng lah du nuĭh ntĭt leo têh gay druh ndăm nsrôih jêng du hê nuĭh đoàn viên uĕh, let năp tay lah du hê nuĭh đảng viên geh trong rƀŏng hao, rôih sŏng kơl uĕh an neh dak he. Lý luận n’hanh drăp ndơ ntlơi an tay bah Wa hŏ ntlơi an tay rơh druh ndăm mpôl hên mbra nsrôih, ntik n’hao tâm du bông n’gâng kan bah he”.

Du bông nău rêh Tổng Bí thư Nguyễn Phú Trọng hŏ an ƀon lan, an neh dak, du nău mĭn, nuĭh văn hóa, nuĭh kruanh, du nuĭh rêh têh kuâng, lĕ du bông nău rêh mô hưp geh, kloh rsang n’hanh lư săk. Bol Tổng Bí thư Nguyễn Phú Trọng hŏ tĭng drô phan, yơn ăp drăp ndơ ntlơi an tay bah Tổng Bí thư ntlơi an tay mbro nkah jru tâm bôk rngok, tâm trôm nuih n’hâm bah ăp nuĭh ƀon lan Việt Nam n’hanh nău uănh khlay dêh rmên bah băl mpôl dak bah dih./.