Bol gĭt lah mblŭng ranh ji khĭt lah nău way êng dơm yơn rnôk tăng lư Tổng Bí thư Nguyễn Phú Trọng roh, lam Đảng lam ƀon lan he nha mô bah rhih rhâl rngot klâng ơm. Hôm nha rêh, Tổng Bí thư Nguyễn Phú Trọng way lah du nuĭh ntĭt leo trong chrat ang mpeh trong gŭ rêh mô ntưih nău geh, dăch dêh ƀon lan, du hê kruanh rđău kan way lĕ nău gĭt blău n’hâm suan đah nău kan an neh dak têh ndrŏng, ƀon lan hơm răm n’hanh uĕh mƀak, rvê đah pah kan rdâk njêng Đảng, ndrel nău mĭn sôt hơr, seh kruanh, năl saơ ngăch ăp nkô̆ nău nchiăng khan tâm Đảng gay rtŭt rmăn glêh tam. Tổng Bí thư Nguyễn Phú Trọng hŏ sĭt tĭng drô phan tâm  nău rngot klâng dŭt n’hâm bah Đảng, Ngih dak n’hanh ƀon lan Việt Nam yơn nha hôm ta nê đŏng rup gui Tổng Bí thư Nguyễn Phú Trọng – du nuĭh ntĭt leo trong chrat ang kơt nti n’hanh ƀư tĭng nău mĭn uĕh lŏng trong gŭ rêh Hồ Chí Minh.

Deh n’hanh hao têh ta thôn Lại Đà, xã Đông Hội nkuăl Đông Anh, nkuăl ƀon têh Hà Nội- du ƀon đăp mpăn ueh lăng đah âk nuĭh ƀon lan dêh mêr, yơn geh nău way gơih nti n’hanh lah kon mbŭt tâm du rnăk vâl pah kan tuch tăm, âk oh nô. Tổng Bí thư Nguyễn Phú Trọng way geh băl nti ndrel kahgĭt đah săk njoat prêh, măt ang, ngăn lah dŭt mbleh mblôn n’hanh gơih nti. Tât ba kơi nơh rlet rlău âk nău pah kan khlăy yor Đảng, Ngih dak n’hanh ƀon lan jao an kơt: Ủy viên BCH Trung ương Đảng bâh khóa 7 tât khóa 13, Ủy viên Bộ chính trị bâh khóa 8 tât khóa 13, Tổng Biên tập Tạp chí Cộng sản; kruanh Hội đồng Lý luận Trung ương, Bí thư Thành ủy Hà Nội, Kruanh Quốc hội, kruanh dak, Tổng Bí thư bâh khóa 11 tât 13, đồng chí Nguyễn Phú Trọng lĕ geh âk nău ntop kan têh, khlăy an nău kan cách mạng bâh Đảng n’hanh mpôl rnoi he. Wa Đào Duy Quát, tă ƀư groi kruanh rnâng kan Tuyên giáo Trung ương nkoch.

”Ta lĕ rngôch ăp nău kan dơn kan bâh nơm đồng chí Nguyễn Phú Trọng lĕ pah kan đah nău leo kan lor, nău kan tâm di khoa học, dơn kan têh khlăy đah nău mĭn lý luận geh ntĭm mbơh bâh nău ngăn jêng lah đồng chí lĕ dơi ƀư lôch ueh nău kan geh jao an. Ngăn lah tâm nău kan ƀư Tổng Bí thư 3 rơh pah kan đồng chí lĕ tâm rnglăp dơn ngoăy bâh Bộ chính trị, Ban Bí thư, Ban chấp hành Trung ương jêng tât dơn ngoăy tâm lĕ rngôch tâm lam dak.

Nău rêh ueh, dăch bên đah ntŭk kan ba dâng geh mpơl saơ tâm nău pah kan mô lah tâm nău rêh êng. Đah Đảng viên Phùng Huy Đan wa way geh saơ kon nuĭh bâh Tổng Bí thư lah nău ueh ang mpeh nău mĭn cách mạng rêh ueh, dăch bên đah ƀon lan đah ăp nuĭh. Nău kahgĭt ueh nĕ wa dơi geh rnôk tât râng 4 rơh tâm mâp ƀon lan bâh mpôl Đại biểu Quốc hội ntŭk săch kruanh mbrô 1 nkuăl ƀon têh Hà Nội ntŭk Tổng Bí thư Nguyễn Phú Trọng lah Đại biểu Quốc hội n’hanh tât aƀaơ, nău kahgĭt nĕ hôm nha kơt ơm tâm nău mĭn bâh cử tri Phùng Huy Đan.

 “Gâp dŭt rhơn geh mâp wa Trọng ta 4 rơh tâm mâp cử tri, wa lĕ hăn tâm mâp cử tri đah ƀon lan jêng lah dŭt lăp kan ndrel, rnôk geh cử tri ntoh ngơi wa dŭt djăt, nchih nău. Lôch rnôk ntoh ngơi rnôk nglôch lôch rĭ wa lah lĕ rngôch  ăp nuĭh lah nuĭh gĭt vât da dê, mĭn uănh na nê̆ mpeh nău kơl kan. Jêng lah ăp wa lĕ geh ăp nău tâm rgop dŭt ueh an Quốc hội, ntoh ngơi bâh ăp wa lah dŭt di, mbơh di nău ŭch rŏng rnôk rlu rlău rĭ wa hăn tâm ngơi nhup ti đah ăp nuĭh. Lĕ rngôch ăp nuĭh chup rup đah wa da dê”.

Lah nuĭh leo kan dŭt têh bâh Đảng, Tổng Bí thư Nguyễn Phú Trọng mât uănh âk nău kan, n’gâng kan n’hanh âk trong kan, bâh khoa học, ntĭm nti tât văn hóa, njroh mprơ, báo chí, bâh nău kan jut n’huch ach o tât ntĭm nti nău way rŏng dak n’hanh cách mạng an rơh ba kơi...ntoh ta ăp ntŭk kan lĕ geh saơ bâh đồng chí nău nsrôih n’hanh nău dơn kan dŭt âk. Tât đah nkuăl ƀon têh Hồ Chí Minh “ntoh ang nău ntơ” n’hanh ƀon lan Nam Bộ “rbăn rmưn nău rŏng”, tâm pêt, tâm rŏng, nău ueh mhe, ƀon lan geh nău rêh hơm răm đăp mpăn, ŭch kơt nĕ nkuăl ƀon têh an geh n’hao tay nău rgâl mhe, n’hao lĕ rngôch nău ueh ntĭm n’hanh nti, hun hao rnoh nuĭh kan, ngăn lah rnoh nuĭh kan gĭt blău, rnoh nuĭh leo kan, mât uănh, hun hoa khoa học- công nghệ ndrel đah hun hao nău wăng sa, gĭt vât, ƀư nău tơm khlăy gay ma ntrôl an nkuăl ƀon têh hun hao ngăch n’hanh nâp nâl.

Hôm mpeh đah Đảng bộ, ƀon lan ăp mpôl rnoi n’gor n’har bri Lạng Sơn, Tổng Bí thư  ntĭnh ntăn, đah nău dơn kan lah “nking nchăng ngih dak” mpeh mât đăp mpăn ngih dak, đăp mpăn rnă njrăng, nkre lah “nking nchăng mât mpeh nău wăng sa”, mât nâp nâl ntŭk tăch rgâl ta ntŭk tâm ban kơt lah mât nău ƀư tơm, rnă njrăng wăng sa bâh neh dak, leo kan ƀư tĭng geh săk rnglăy nău pah kan nchră nău đah dak bah dih n’hanh lăp kan ndrel đah lam ntur neh, rdâk njêng n’har bri đăp mpăn, tâm rnglăp, njêng ntŭk dơh nơih an hun hao wăng sa, rêh jêng ta n’gor, ta nkual trung du, gôl yôk Bắc Bộ n’hanh lam dak.

Hôm đah thủ đô Hà Nội, mô dơn lah nău rŏng đah nkual neh ntŭk nơm deh n’hanh têh kuăng, ma hôm nha lah nău dơn kan dŭt khlăy đah thủ đô- play nuih ta lam dak, Tổng Bí thư Nguyễn Phú Trọng way ntêm nău mât kơl âk ngăn n’hanh geh ăp nău ntĭm leo na nê̆, dŭt khlăy đah nău hun hao năp lor n’hanh jŏ jong ba kơi tay. Tổng Bí thư Nguyễn Phú Trọng way nkoch.

”Nkoch tât thủ đô Hà Nội, tâm nuih n’hâm ăp nuĭh kon neh Việt lĕ dŭt rhơn, ryơk, n’hao mpeh nkual neh rbăn năm văn hiến n’hanh têh kuăng, ueh ntơr n’hanh ueh ang gĭt nău, thủ đô bâh nău gĭt vât, nău ueh kon nuĭh, nkuăl ƀon têh yor nău đăp mpăn, gay ma “bol ma hăn ta 4 njônh jâng trôk, nuih n’hâm kahgĭt sĭt đah Hà Nội na nao”. N’hanh nău ngăn kơt nĕ, tâm lĕ nău rêh pah kan  “Yor ngih dak, yor ƀon lan”, Kruanh Hồ Chí Minh way an Thủ đô Hà Nội âk nău rŏng khlăy. Hà Nội lah ntŭk krêp bên đah ăp nău khlăy tâm nău rêh cách mạng bâh Wa, ngoăy tâm âk ntŭk Kruanh Hồ Chí Minh rêh n’hanh pah kan dŭt jŏ, ntŭk geh âk têl jâng Wa, rnôk nkoch mpeh Hà Nội. Wa way dŏng pe rplay nău “thủ đô he”. Tâm nar bôk năp Thủ đô geh rklaih đăp mpăn (10/10/1954), Wa lĕ nchih: “Lam dak mpŏng uănh let thủ đô he, lam ntur neh uănh ta thủ đô he, lĕ rngôch he an geh n’hao săk soan mât đăp mpăn, rnă njrăng, ƀư an thủ đô he jêng du thủ đô đăp mpăn, ueh nđir, ngăch dăng nđâp mpeh ndơ dŏng n’hanh nău mĭn, aơ lah nău mât uănh dŭt khlăy n’hanh lah nău đă, nău ŭch, nău knơm gay ma Hà Nội ngăn ngên hun hao, hăn lor bôk năp, ƀư ntoh ang an lam dak kơt Wa Hồ tă ntĭnh ntăn đah Thủ đô he”.

Bâh ăp rơh hăn tât đah đồng chí, ƀon lan n’hanh uănh nău ngăn, ăp nău mĭn kan mhe, uănh nđôi na nê̆ geh Tổng Bí thư Nguyễn Phú Trọng mbơh dăn đah Đảng, Ngih dak tâm nău nchrăp ăp nău ntrŭnh, nău kơl kan, gay ma mât đăp mpăn ueh lăng ngăch nău wăng sa rêh jêng n’hanh hun hao neh dak, rdâk njêng chủ nghĩa xã hội. Đah ăp nău pah kan na nê̆, Tổng Bí thư Nguyễn Phú Trọng lĕ ƀư kloh ang rup du hê nuĭh leo kan geh âk nău nsrôih, ƀư tĭng nău ngăn, nănh mĭn nănh kan, nănh dơn kan ta năp Đảng, ta năp ƀon lan, yor nĕ lĕ geh ƀon lan knơm âk.

 Play nuih bâh nuĭh cộng sản ngăn Tổng Bí thư Nguyễn Phú Trọng lĕ mô hôm mpât yơn lam Đảng, lam ƀon lan n’hanh lam tahen he hôm nha kahgĭt mbro rup gui du hê nuĭh gĭt blău têh bâh cách mạng Việt Nam, nuĭh mĭn kan, nuĭh văn hóa, chông cờ lý luận bâh Đảng, lĕ nău rêh yor ngih dak, yor ƀon lan, yor nău mĭn kan ueh ang.