Ta rơh tâm mâp ăp đại biểu lĕ geh nău mbơh mpeh mhe lam ntur neh n’hanh ta nkual, ăp nău dơi geh ntoh lư mpeh trong hun hao wăng sa rêh jêng bâh n’gor Dak Lak năm 2022, mpŏng tât hun hao năm 2023 n’hanh ăp năm let năp tay. Năm 2022, nău wăng sa rêh jêng bâh n’gor Dak Lăk lĕ ndâk nsơm ueh n’hanh dơi geh ăp nău dơi lĕ rngôch ta âk trong kan. Lĕ rngôch ăp nău mpŏng kan dŭt âk geh tĭng Nghị quyết ngluh mbơh lĕ geh ƀư tĭng lĕ rngôch. Năm 2023, Dak Lăk nsrôih an hun hao wăng sa geh klâp ma 8% đah nău ŭch geh ƀư năm 2022.

Ntoh ngơi ta rơh tâm mâp, wa Võ Văn Cảnh, groi kruanh UBND n’gor Dak Lak lah na nê̆, gay ma dơi geh nău dơi aơ, ta meng nău nsrôih kơl an, nău nsrôih âk, tâm nău leo kan, ntĭm đă, mbơh tơih ƀư tĭng trong pah kan bâh ăp gâl ủy, n’gâng kan, ƀon lan n’hanh mpôl tahen bâh n’gor. Nkre lah, nuĭh leo kan ta n’gor ŭch dơn geh nău mât kơl âk tay lơn bâh ăp cán bộ gâl têh tahen gay ma Dak Lăk ơm ƀư lôch ăp nău mpŏng kan an hun hao wăng sa, rêh jêng ngluh mbơh.