Thôn R’Chai 3, xã Phú Hội, nkuăl Đức Trọng, n’gor Lâm Đồng geh 305 rnăk, geh 5 rnoh oh nô, Yuăn, Khmer, Tày, Nùng ndrel rêh, tâm nê rnoh K’ho lah âk ngăn. Tâm nkuăl geh 4 ntil chroh lah: Tin lành, Phật giáo, Cao Đài ndrel Thiên Chúa giáo.

            Kônh wa ăp rnoi tâm thôn gơih pah kan, tâm rnglăp tâm kơl tâm nau rêh. Jêh rnôk bah srê Covid-19 geh nkân ueh, kônh wa ăp rnoi, ăp mpôl chroh ta aơ nsôih pah kan jan sa, rgop nau ndâk njêng nkuăl lơn ma hun hao. Năm 2022, nau geh du hê bôk nŭih geh 58 rkeh. Lĕ ma thôn hôm 2 rnăk ach o. Wa Ka Să Ha Nhiếu, Uỷ viên Uỷ ban MTTQ Việt Nam n’gor Lâm Đồng, lah nŭih geh bu rnơm ngăn tâm thôn R’Chai 3, xã Phú Hội, nkuăl Đức Trọng, ntoh nau:

            ‘Gâp rhơn ngăn yor nar aơ kônh wa tâm thôn blau kơt tĭng oh nô yuăn, blau rgâl nau mĭn tuch tăm, rgâl nau ƀư pah kan. Kônh wa ta aơ hŏ blau tăm ăp ntil tơm tăm geh rnoh văng sa prêh, kơt: mrăch, lagim, blên srat, byăp, susu, cà phê...Tâm thôn rnôk aơ geh nklăp 30-40% rnăk tăm lagim, gâp saơ nau rgâl mhe ueh ngăn tâm nau kan tuch tăm”.

            Dà Sar lah xã nkuăl jru bah nkuăl Lack Dương, n’gor Lâm Đồng-lah ngoai tâm ăp xã nkuăl rnoi mpôl đê̆ ơm geh ƀon lan mhe. Lam xã geh 7.832 rnăk, đah rlau 31.200 nŭih, tâm nê kônh wa rnoi mpôl đê̆ geh bơi tât 70%. Tâm ăp năm rlau aơ, rnơm ƀư ueh nau ntrơn rgâl ntơm bah cà phê jêng tăm dau-rong ndrŭng brai ndrel ăp ntil byăp, bum, play, kônh wa geh prăk âk lơn. Wa Cil Ha Ổn (rnoi K’ho) tâm thôn 3, xã Dà Sar, nkuăl Lạc Dương, n’gor Lâm Đồng mbơh: Âk ngăn kônh wa ta aơ tĭng chroh Tin lành, ndrel geh n’gâng kan pơk trong ân ndâk 2 ngih rƀŭn nâp ueh. Rnơm văng sa hun hao, kônh wa rnoi mpôl đê̆ tĭng chroh Tin lành hŏ geh nau dơi gay ma vơt Noel ueh lăng-đăp mpăn:

            ‘Năm aơ, gâp lah ueh n’gâng kan hŏ kơl an njrăng rdâng srê Covid-19 rlau ma âk khay ma aơ hôm, ri ma tâm rnôk Noel aơ mô lah njŭn sông, tâm ôp ur sai kŏ ƀư ueh. Ŭch Noel geh tay nau rhơn đăp mpăn, ri hên jă rmôt chĭng gong tur ndrel hăn râng”.

            Wa Liêng Jrang K’Sáu-Kruanh rmôt pah kan lŏ mir xã Dà Sas, nkuăl Lạc Dương mbơh: Tâm rnôk ndâk njêng ƀon lan mhe, êp nau kan bah ăp rmôt kan, ăp rđau kan chroh rƀŭn tâm nkuăl bonh đă kônh wa tâm ƀon nsôih râng kan. Âk rnăk hŏ blau pă êng neh ƀư trong, nsôih râng ƀư nar hăn kan kơl an. Rnơm kơt nê, nau geh jêng bah ƀon lan hŏ ntrơn rgâl. Wa Liêng Jrang K’Sáu-Kruanh rmôt nŭih pah kan lŏ mir xã Dà Sas lah rjăp: Dĭng lĕ kônh wa ƀon lan ta aơ mô knŭng kơt tĭng rjăp nau ntrŭnh bah Đảng ndrel Ngih dak ma hôm rêh tâm di đah nkô̆ nau “rêh ueh chroh ueh”.

            ‘Ăp kruanh chroh mro lah nŭih leo trong trong lor, ntoh ang tâm nau ƀư kơt tĭng nau ntrŭnh, nau kan bah Đảng, pháp luật bah Ngih dak, nsôih râng ăp nau rgŏ jă, râng ăp rơh rƀŭn n’gâng kan tâm nkuăl ƀư gay ma bonh đă kônh wa tĭng chroh kơt tĭng ân ueh”.

            Knŭng du pơh tay đŏng lah tât năm mhe 2023, du yan Noel lŏ tât đŏng. Tâm ăp nar rlau aơ, rđau kan n’gor Lâm Đồng ndrel ăp nkuăl bah n’gor hŏ tât khâl, rhơn năm mhe ăp ntŭk tĭmh chroh, kơp dơn ndrel rnê prêh ăp nau rgop kơl bah ăp nŭih rđau kan, ăp nŭih tĭng chroh ndrel kônh wa tĭng chroh tâm ăp nau kan hun hao văng sa, rêh jêng, hun hao tuch tăm, ndâk văng sa. Rđau kan n’gor Lâm Đồng lah rjăp, n’gâng kan ăp gưl mro kơl an, pơk trong nơih ueh ngăn gay ăp ntŭk tĭng chroh pah kan, tŏng dơi nau ŭch rƀŭn rgum bah kônh wa tĭng chroh. Ndrel, ŭch ăp kruanh chroh, mục sư, ăp nŭih kơl an nau kan tĭng chroh rƀŭn lŏ ƀư ueh nuih n’hâm ryơk brah, rŏng dak, bonh đă kônh wa ƀon lan pah kan jan sa, n’hao nau rêh, ndrel nsôih râng ndâk nau tâm rnglăp ăp rnoi mpôl./.