Nô Trần Hải Đăng, Giám đốc mât dơn nău kan XL02, Nău kan Vũng Áng - Bùng, ntŭk kan hăn rlet n’gor Quảng Bình an gĭt. Aƀaơ ntŭk kan dôl rgum geh klâp ma 800 nuĭh kan rgum ƀư lĕ măng nar, lĕ ma Tết gay ma mât đăp mpăn nău kan.

"Ntŭk kan way geh ang ŭnh, ndăn trôk nar ueh aih, mpôl hên geh pă 3 tơh nuĭh kan mbro, pah kan 24/24. Ta ăp ntŭk pah kan, trong găng bâh nău kan kơt lah bun dăp an prêh, ntŭk tơm, mpôl hên geh pă jêng jê̆ jê̆ gay ma dơh ƀư mbro. Di rơh Tết đah rnăk vâl rĭ dŭt rhơn ngăn, yơn lah yor nău kan nsum, mpôl hên gŭ tay ta ntŭk, tâm rgop du đê̆ săk soan bâh nơm, nsrôih ƀư lôch ăp nău kan khlăy bâh neh dak.

Mô lah ta ăp ntŭk pah kan êng ta trong têh Bắc - Nam, ăp ntŭk kan dôl ngăch ndăn lăp ta rơh tâm rlong nglâ̆ dŭt, ntop ƀư tĭng geh nău dơi ăp nkô̆ mpŏng 3 rbăn km trong hăhn têh tĭng nău ŭch bâh Thủ tướng Chính phủ. Nău tâm rlong kan aơ ăp nuĭh tahen ta Binh đoàn 12 hao ngăch nău kan, đah nău nsrôih nău nđơr n’anh ăp nău tâm kơl kan mhe mbơh bâh Đại tá Nguyễn  Tuấn Anh, Groi Tư lệnh Binh đoàn 12, Groi Tổng giám đốc Tổng công ty Xây dựng Trường Sơn.

"Tâm rlong ăp nău kan ƀư trong têh, mpôl hên dt mât uănh tât nău kĩ thuật pah kan ƀư ta neh mô nâp. An geh ƀư chăt neh mơ dơi ƀư tay ăp nău kan êng.Ŭch mât đăp mpăn di nar kan, mpôl hên rgum lĕ nuĭh kan may mok ndơ dŏng tŏng ăp, bâh nĕ rgum ta rơh aơ rgum nuĭh kan gay ma pah kan nău kan, nkre geh mât đăp mpăn nău ngăch n’hanh nău ueh nău kan ƀư trong têh.

Năm 2025 aơ, nkuăl ƀon têh Hồ Chí Minh lĕ geh mbơh ƀư âk nău kan ƀư trong khlăy, tâm nĕ geh du đê̆ nău kan têh, tâm rgop đah ăp ntŭk hăn trong khlăy ta nkuăl ƀon têh. Wa Bùi Xuân Cường, Groi kruanh UBND nkuăl ƀon têh Hồ Chí Minh an gĭt, vơt tĭng rơh tâm rlong 500 nar măng ƀư lôch ăp nău pah kan, mbra geh rgum ƀư ăp nău kan, nău nchrăp kan khlăy đah nău mĭn n’hanh nău nsrôih tâm rgop âk ăp nău kan ƀư trong têh n’hanh ăp nău kan ƀư trong hăn khlăy, ntop ƀư ntrôl hun hao wăng sa- rêh jêng bâh nkuăl ƀon têh Hồ Chí Minh n’hanh lĕ ma nkual mpeh ba dâng.

"Ta năp Tết Nguyên đán mbra geh klâp ma 10 nău kan geh ƀư tay. Nkre lah trong mper nkuăl ƀon têh 3, bâh nău tâm rgŏ tâm rlong bâh Thủ tướng Chính phủ, rĭ geh rgum pah kan ndal tâm năm 2025, gay ma ndơ lăp dŏng ta ntŭk prêh 15km, tâm rgop đah trong têh nkuăl ƀon têh Hồ Chí Minh - Long Thành- Giầu Dây tâm rgop đah ndrâm tach ndeh păr lam ntur neh Long Thành. N’hao nău tâm rlong, mât nău kan an geh mât đăp mpăn tâm di đah nău ngăch hun hao tâm năm 2025 gay ma mbơh ƀư ăp nău kan ƀư trong hăn mât đăp mpăn ngăch ueh. Ta meng nĕ, mbra rgum mbơh tơih ăp nău kan mhe kơt ndrâm dak lêng nchoăn rdeng ndơ Cần Giờ.

Tâm ăp nar bôk năm aơ đŏng, kruanh n’gâng kan mât uănh ntung trong Trần Hồng Minh hăn uănh nđôi, tât khâl du đê̆ nău kan ƀư trong têh Bắc- Nam. Mhe aơ ta 2 nău kan ta nkuăl trong têh Vũng Áng- Bùng n’hanh Bùng- Vạn Ninh, ntŭk hăhn let n’gor Quảng Bình lĕ geh đă ăp ntŭk tơm dơn kan, ăp ntŭk kan uănh nđôi na nê̆ nău ngăch kan, rgum lĕ máy mok pah kan lĕ ta nar tết gay ma mbluh aih ueh trong hăn tơm kơt nău nchrăp. Tĭng wa Trần Hữu Hải, Giám đốc rnâng kan mât uănh nău kan 6 tơm ntuh kơl nău kan, gay ma mât đăp mpăn nău ngăch kan, rnâng kan lĕ đă ntŭk tơm leo kan ntop ta nuĭh kan nkra njêng, n’hao nuĭh kan, mông nar ƀư lĕ ma Tết gay ma mhâm ƀư an đăp mpăn nău ngăch kan ngluh mbơh. Tât rnôk aơ, rnoh tâm rlong geh rlău 70%, nău nchrăp kan mbra ƀư lôch di lơ 30/4/2025.

Geh tât nău ntrơn ntŭk gŭ ta ntŭk, wa Trần Phong, Kruanh UBND n’gor Quảng Bình an gĭt , tât aƀaơ, n’gor lĕ pă ntrơn ntŭk kan an ntŭk bư trong. Yơn lah, aƀaơ nău kan hăn rlet ta ntŭk hôm nha geh klâp ma 40 rnăk ŭch geh ntơn tât ntŭk gŭ mhe. Mpeh nău aơ, Kruanh n’gâng kan Trần Hồng Minh an gĭt, aơ lah nău ŭch tâm di, an geh mông nar n’hanh trong kan doh rklaih. Năp lor n’gâng kan n’hanh ăp nuĭh leo kan mbra rgum gay ma ƀư kan an lôch ăp nău kan tơm di ta rơh 30/4/2025. Ngăn lah, năm 2025 đah nău ndơ̆ mbơh âk nău nchrăp kan tơm khlăy n’gâng kan mât uănh ntung trong lăp pah kan, nkre lah ƀư lôch nkô̆ mpŏng 3 rbăn km trong têh lah nău kan tơm an geh rgum kan na nê̆ gay ma ƀư lôch, Kruanh n’gâng kan mât uănh ntung trong Trần Hồng Minh ton.

"Âk nău kŏ văk jêr jŏt lĕ geh rgum doh rklaih ăp nău kơt ntrơn ntŭk gŭ, rnoh ndơ rdâk njêng, kơl an ăp nău nchrăp kan, ngăn lah ta mpeh ba dâng. Tât aƀaơ, nău ngăch ƀư ăp nău kan tơm lĕ geh đăp mpăn. Du đê̆ nău kan trong têh Bắc- Nam kơt trong têh Quảng Ngãi- Khánh Hòa lĕ rlău nău nchrăp 3-6 khay. N’gâng kan mbra n’hao nău tâm rnglăp, mât đăp mpăn ƀư ueh ăp nău kan năm 2025.

Mât uănh na nê̆ nău ntĭm đă bâh Thủ tướng chính phủ: Ntŭk hôm jêr jŏt rĭ doh rklaih na nĕ n’hanh mô dun, mô lah jêr, n’gâng kan mât uănh ntung trong leo kan tâm rgop đah ăp n’gâng kan, ntŭk kan geh tât njêng rmôt pah kan sŏng dăng pah kan đah ăp ntŭk mbơh tơih ăp trong kan, kơl an nuĭh leo kan doh rklaih ndơ dŏng, n’hao ndơ̆ ăp nău nchrăp ƀư trong lôch ơm, ndrel ƀư tĭng ăp nkô̆ mpong kan 3 rbăn km trong têh ta năm 2025 di đah nău nchrăp, ntop ntrôl an hun hao wăng sa neh dak ta rơh mhe.