Nkhêp geh tât râng Tâm nchră ăp năm Rgum nchră wăng sa lam ntŭr neh (WEF) tâl 55, ôi 22/1, mông ta ntŭk, ta Davos, Thụy Sĩ, Thủ tướng Chính phủ Phạm Minh Chính hŏ wơt Tổng Thư ký Mpôl kan tâm boh n’hanh hun hao wăng sa lam ntŭr neh (OECD)Mathias Cormann.

Gay ntrŭt ntrôl tâm boh đah Việt Nam n’hanh OECD nar lơn ma jêng ngăn ngăn, nsĭt geh nău dơi lơn, Thủ tướng nkoch Việt Nam ŭch gŭ mĭn râng OECD n’hanh dăn đă Tổng Thư ký rđău đă ăp Ban rnâng kan bah OECD tâm mbơh nkoch nău tă ơm gĭt kan, mbơh nti trong kơl n’hanh ntop kơl Việt Nam n’hao nău dơi tâm rlong, rƀŏng tât nău tŏng ăp rnoh di mât bôk kan lam ntŭr neh bah OECD; ntop kơl Việt Nam wat jêh n’hanh mbơh ăp nău dơi wăng sa khlay gay ƀư ntŭk nsing uănh kơt nău uĕh an trong tor gĭt ăp trong kan  hun hao jŏ jong bah Việt Nam. Thủ tướng dăn đă OECD n’grŏ tĭng, ntop kơl gay Việt Nam tŏng ăp rnoh di, rêng ƀư, rƀŏng tât nău râng lăp OECD, bah nê lăp tâng jru lơn tâm wăng sa lam ntŭr neh n’hanh rgop âk lơn an nsum mpôl lam ntŭr neh, yor bah tâm lơh tâm su, tâm boh, hun hao lam ntŭr neh.