Kêng măng ntri (22/1) ta Hà Nội, nkhêp geh bôk năm mhe 2025, nchrăp wơt Tết way ơm Ất Tỵ n’hanh rƀŏng tât nkah ndray 95 năm Nar njêng Đảng CSVN (3/2/1930-3/2-2025) Tổng Bí thư Tô Lâm hŏ tât khâl rnăk wâl n’hanh mpoh nhang nkah gĭt drô Tổng Bí thư Nguyễn Phú Trọng. Tổng Bí thư Nguyễn Phú Trọng lah kruanh rđău kan dŭt prăl blău mha êng bah Đảng, Ngih dak n’hanh ƀon lan he, mpơl ăp tŏng nuih n’hâm uĕh lŏng, gĭt blău, han săk, bôk rngot bah rơh kơn kruanh rđău kan Việt Nam rơh rgâl mhe.

Tâm du bông nău rêh nău kan cách mạng bah he, pah kan rdâk njêng, rmăn glêh tam Đảng n’hanh lam trong kan chính trị âk ntŭk gŭ kan khlay mha êng đah Tổng Bí thư Nguyễn Phú Trọng. Tổng Bí thư Nguyễn Phú Trọng hŏ ndrel Ban Chấp hành Trung ương tor trong n’hanh rđău đă tĭng ƀư geh nău dơi ăp trong nchrăp têh jong mpeh rdâk njêng, rmăn glêh tam Đảng; sŏng di, rôih dăng rdâng lơh tay nău mĭn tĭng nău nŏng êng nơm, rdâng lơh tay hŭch hêng mpeh nău mĭn, nuih n’hâm uĕh lŏng, trong gŭ rêh, rdâng lơh tay sa khâm, tih djơh tâm Đảng. Aơ lah rơh rdâng lơh “phŭng rlăng nơm” dŭt ŏ r’ah ƀư an Đảng he nar lơn ma kloh uĕh, nâp dăng, năl di nău khlay kan dâk leo lor, han săk, bôk rngok, gay Đảng he “lah nuih n’hâm uĕh lŏng, lah rsang rnglay ngăn”.