Năm 2023 dơi uănh lah du năm geh âk rgâl uĕh đah n’gâng kan pâl nđaih, lơn lah droh rklaih  mpeh trong kơl ta ăp ntil ndơ geh ƀư, rhŏ dŏng, geh tay âk nău mĭn mhe dơi jêng, âk nău mpơl bah nău rgâl, rgâl mhe nău mĭn tâm trong ƀư pâl nđaih. Aơ lah ăp jâng ntơm khlay gay n’gâng kan pâl nđaih dak he nsan đăt ndal, dâk hao tay n’hanh hun hao dăng tâm năm 2024.

Nău lư rhơn răm tĭng rnoh nchih rgum bah Cục Pâl nđaih gưl neh dak Việt Nam an saơ rlău 11 khay bah năm 2023, n’gâng kan pâl nđaih Việt Nam hŏ wơt 11,2 rkeh tơ̆ năch dak bah dih n’hanh nklăp 100 rkeh tơ̆ năch tâm dak, rlău 11 rkeh tơ̆ năch dak bah dih, âk rlău 4 tơ̆ rđĭl đah năm 2022. Kơp êng tât lĕ khay 10/2023, nsĭt geh bah n’gâng kan pâl nđaih 556 rbăn rmen prăk. Wa Nguyễn Công Hoan – Kruanh Ban Truyền thông Hiệp hội pâl nđaih Việt Nam an gĭt, geh 4 ntŭk nsing gay dơi wơt 12 tât 13 rkeh tơ̆ năch dak bah dih tâm năm aơ:

 “Bôk năp, nê lah trong rong dơm thị thực, trong kơl ƀư thị thực điện tử hŏ geh nău tam ngăn ntơm bah nar 15/8/2023. Tâl bar 2, năm 2023 nău kan tâm boh dak bah dih bah Việt Nam hŏ ƀư dŭt khuh n’gôr. N’hanh ăp trong kơl dja hŏ nsĭt nău dơi uĕh tâm nău nkoch n’hơ neh dak kon nuĭh Việt Nam n’hanh wăch rgum năch pâl nđaih. Tâl 3, trong nchrăp rdâk hao văn hóa bah rnoi nuĭh ndrel đah nău ntrŏng pâl nđaih  lah n’gâng kan wăng sa tơm khlay, dŭt âk ăp  rnoh khlay văn hóa, ăp drăp ndơm ơm yău ntlơi an tay văn hóa bah Việt Nam hŏ dơi ƀư jêng ngăn ngăn ăp ndơ geh ƀư pâl nđaih uĕh êng, way êng, wăch rgum năch n’hanh geh nău khlay tâm rlong âk. Tâl 4, ntŭk pâl nđaih lam ntŭr neh hŏ sĭt jêng tay, ăp ntŭk pâl nđaih way ơm bah he hŏ dâk hao tay n’hanh rnoh âk năch bah ăp dak dja  tât Việt Nam hŏ mbrơi hao âk tay kơt bah năp nuh srê nơh”.

Gay an ƀư hun hao dăng tay n’hanh njêng nău đăt ndal tâm năm 2024, tĭng ăp nuĭh rnâng kan n’hanh ăp doanh nghiệp leo hăn pâl jong nar, ăp doanh nghiệp, ăp n’gor n’hanh ăp n’gâng kan ân rgum tâm du đêt nău dơn kan khlay. Bah năp măt, rnôk dja dôl lah rnôk dŭt khlay wăch rgum năch dak bah dih, jêng ân rgâl dăng an ƀư geh nău tam Nghị quyết 82 bah Chính phủ đah âk trong ƀư dăng. Ndrel đah Hà Nội n’hanh nkual ƀon têh Hồ Chí Minh, ăp n’gor ntrôl dăng ƀư ăp bôk nău kan wơt năm mhe Tết Dương lịch gay n’hao dăng wăch rgum năch. Wa Nguyễn Trùng Khánh – Cục trưởng Cục pâl nđaih neh dak Việt Nam lah:

“Tâm rnôk khay âk năch dak bah dih hăn pâl nđaih khay 10 năm bah năp tât khay 4 năm bah kơi. Ăp doanh nghiệp pâl nđaih Việt Nam dôl nchrăp ăp ntŭk pâl nđaih mhe n’hanh ntrôl dăng pah kan ntrŭt nsôr nkoch n’hơ tât ăp ntŭk pâl êng, lơn lah râng ăp hội chợ pâl nđaih dak bah dih têh, geh ăp hội chợ pâl nđaih dak bah dih way n’gâng kan”.

Uănh tay năm 2023, bol wăch rgum năch pâl nđaih dak bah dih hun hao mpeh rnoh âk, yơn I ngăn, rnoh tât chông yôch dŭt đêt rđĭl đah ăp dak tâm nkual. Tĭng wa Vũ Thế Bình – Kruanh Hiệp hội pâl nđaih Việt Nam, ndrel đah nău ntrôl dăng tay wăch rgum năch pâl nđaih tât bah ăp dak way ơm, ân ntrôl dăng wăch rgum năch pâl nđaih châu Âu n’hanh ntŭk pâl nđaih bah ngai.

“Năch pâl nđaih dak bah dih lah ngoăy tâm ăp rnoh ŭch tât kan khlay ma pâl nđaih Việt Nam ân wăch rgum dơi. Gay wơt năch pâl nđaih dak bah dih ân geh ăp ntŭk pâl nđaih mhe, ntŭk rhŏ dŏng mhe tâm di đah năch pâl nđaih dak bah dih. Ntŭk mhe hŏ rgâl, aƀaơ mô dơn geh ăp ntŭk dăch ma ăp ntŭk ngai đah he dŭt khlay đŏng.

Đah ntŭk pâl nđaih tâm dak, bol năm 2023 geh nău hao âk ndal, yơn tĭng ăp công ty leo hăn pâl nđaih jong nar, nsĭt geh bah pâl nđaih tâm dak mô hŏ kơt nău mpŏng, tă bah wăng sa hôm jêr jŏt, nuĭh ƀon lan dŏng sa đêt, an sơch lor ăp bôk nău kan n’hŭch rnoh khlay, hăn glêh nar rgâl an sơch tour khlay n’hanh jong nar. Gay wăch rgum âk năch pâl nđaih tâm dak, wa Bùi Thanh Tú - Giám đốc Marketing Công ty pâl nđaih BestPrice an lah:

“Bôk năp lah rnoh khlay vé ndeh păr tât ăp ntŭk tâm dak jêng dơi hŭch jŭr gay ntrŭt nsôr hăn pâl nđaih bah năch. He mbra dơi uănh saơ tâm năm 2023 geh du đêt rơh rnoh khlay vé ndeh păr hăn tât Phú Quốc n’hanh Nha Trang hao âk khuch tât nău ŭch geh rsong hăn bah năch pâl nđaih. Tâl bar nê lah hun hao pâl nđaih jŏ jong, mât dơi rup uĕh êng, der bah nău ntuh kơl grŭ gră tĭng trong tâm kơt ndŭ lôch nê năch pâl nđaih dơn tât 1 tơ̆ mô hôm plơ̆ tay. Tâl pe nê lah ăp n’gor ân tĭng ƀư ăp bôk nău kan ntrŭt nsôr ngăch pâl nđaih nkre đah ƀư mhe ndơ geh ƀư pâl nđaih gay wăch rgum năch: Tâm năm rlău aơ he mbra saơ Hà Nội đah Festival Thu Hà Nội, mô lah Pơh lễ pâl nđaih nkual ƀon têh Hồ Chí Minh hŏ ƀư dŭt uĕh ăp nău kan dja gay wăch rgum năch pâl nđaih tât đah n’gor he”.

Ta Tâm nchră Hun hao pâl nđaih Việt Nam ngăch, nâp jŏ mhe aơ, Thủ tướng Phạm Minh Chính lah rjăp, pâl nđaih dơi ntrŏng lah du n’gâng kan wăng sa khlay, rgop nta joi nău kan, jut jăng ji ngot, n’hŭch ach o, wăch rgum ntuh kơl, ntrŭt ntrôl hun hao n’hanh dăp rgum rgâl jâng wăng sa, mât ndray n’hanh ntik n’hao rnoh khlay way ơm, lịch sử, văn hóa bah rnoi nuĭh, n’hao nău rêh drăp ndơ n’hanh nuih n’hâm bah nuĭh ƀon lan. Gay hun hao pâl nđaih jêng n’gâng kan wăng sa tơm khlay tĭng nuih n’hâm rđău đă bah Bộ Chính trị, tĭng Thủ tướng, pâl nđaih Việt Nam ân rgâl mhe ngăn nău mĭn, trong ƀư đah ăp trong blău njêng mhe, đăt ndal, ăp kôp, geh nău tam; tĭng ƀư “tâm rgop kan lhăt, tâm râp jôn rbăn, tâm boh lam lĕ rngôch”.