VOV4.M’nông: Bah năp ăp nau tât bah mih sial tât ndal rnôk mih phŭt sial, Công ty điện lực Dak Lak hŏ nchrăp ƀư ăp nau kan, mra rdâng đah trôk nar lơh. Công ty ndâk 2 rmôt kan leo trong lor tâm nau njrăng rdâng trôk nar lơh ndrel ma joi kơl nŭih mâp rmanh đah rlau 40 nŭih. Ndrel ma nau kan rklaih ăp nau tât tâm n’gor Dak Lak, rmôt kan aơ mra ntơm hăn kơl an ăp n’gor êng lah geh nau đă ndal. Ăp rmôt kan điện lực tâm n’gor vay mêt uănh nâp ăp ntŭk tât bah ăp trong điện, pă nau kan n’hêl bah ăp rmôt, ăp nŭih mêt uănh ndrel ndơn nau kan đah ăp trong rse, ăp trạm biến áp, đăp mpăn đah ăp ntŭk n’gâng rlet trong dak, rlet trong hăn, n’gâng prêh rêh ndrel ăp ntŭk kan khlay...

Nkre ƀư tĭng ăp khay muih kloh trong rse điện, n’hao nau tâm rgop đah ăp nkuăl, ƀư ăp nau kan nkoch trêng, gay nŭih ƀon lan ndrel nchrăp nau kan đăp mpăn điện. Ntoh ngăn kơt tâm nkuăl Ea H’Leo, ntŭk vay geh nau khuch bah mih phŭt sial, wa Phạm Thế Nghi, Điện lực Ea H’Leo, mbơh:

‘Điện lực hŏ hăn mêt uănh, ƀư nâp, nkra nâp tay ăp trong sre điện, nkah mbơh ân nŭih năch dŏng mpeh trong rse ba kơi công tơ gay ân ăp năch dŏng ê nkra, rklaih rjăp tâm ntŭk mra geh nau khuch. Điện lực kŏ ƀư n’hao nau dăng bah ăp trạm biến áp gay ma kơl an nau kan ân ueh lơn. Phung hên kŏ pă săm ƀŭt gay ma nkoch trêng, mbơh ntĭm ăp nŭih năch dŏng điện ân đăp mpăn, têm nkrem ndrel săk tam”./.

VOVTây Nguyên/Nŭih rblang: H’Thi