Ôi 11/1, ta Hà Nội, Thủ tướng Phạm Minh Chính râng n’hanh ntĭm rđău Rƀŭn nchră n’glôch jêh trong kan năm 2023 n’hanh mbơh ƀư nău kan năm 2024 bah N’gâng kan Kế hoạch n’hanh Đầu tư. Ntoh ngơi ta Rƀŭn nchră, Thủ tướng Phạm Minh Chính uănh lah prêh, rnê rhơn nău nsrôih n’hanh săk rnglăy dŭt dơi kơp dơn bah lĕ rngôch kruanh, chông chức, viên chức, nuĭh pah kan nău kan Kế hoạch, Đầu tư n’hanh Thống kê, rgop khlay an nău geh hun hao wăng sa rêh jêng bah neh dak he tâm năm 2023 n’hanh năm bah năp.

Thủ tướng lah rjăp, năm 2024 lah năm hao mhe, geh nkô̆ nău dŭt khlay tâm nău ƀư tĭng dơi trong nchrăp 5 năm 2021-2025. Nchroh mbơh nu nău năm 2024 jêr jŏt tay n’hanh geh jêr jŏt lơn tâm năm 2023. N’gâng kan Kế hoạch n’hanh Đầu tư an ƀư uĕh lĕ nău kan n’hanh nău kan dơi jao, mât uĕh âk ngăn nău ƀư tơm lah ngih pah kan tâm ôp tâm nchră, Đảng, Ngih dak, Chính phủ mpŏng ŭch n’hanh nsing nơm N’gâng kan Kế hoạch n’hanh Đầu tư geh nău mĭn uĕh ngăn, rgâl mhe, gĭt ngăch ăp nău ntoh hao bah lam ntŭr neh, neh dak n’hanh geh trong uănh ngai, tâm ôp tâm nchră ăp trong mkra têh mpeh wăng sa rêh jêng an Đảng, Quốc hội, Chính phủ.