Ôi ntri (6/8), n’gor Gia Lai khuh n’gôr ƀư Đại hội tâm rlong geh nău dơi ăp mpôl tahen bah n’gor lvang năm 2019 – 2024. Râng đại hội geh kruanh Bộ Tư lệnh Quân khu 5, kruanh n’gor Gia Lai, ăp nuĭh tahen dăng janh ƀon lan n’hanh ăp nuĭh ntoh lư mpôl tahen tâm n’gor Gia Lai.

Ta đại hội, siƀŭt nchrăp lor dăn đă ta rnôk tâm nchră bah ăp mpôl, ăp nuĭh ntoh lư hŏ mpơl kloh ăp nău blău mhe, trong ƀư uĕh, nuih n’hâm nchrăp rdâng lơh n’hanh ăp trong nkra rgâl mhe an trong leo  tâm rlong geh nău dơi bah mpôl tahen Gia Lai, wat jêh ngăch prăl nău dơn kan, rgop tâm n’gâng kan rdâk njêng n’hanh mât njrăng neh dak. Tâm let năp tay, mpôl tahen n’gor Gia Lai tĭng ƀư jăp tay nău khlay kan bah “rmôt tahen hăn lơh”, “rmôt tahen pah kan". Kan nsum đah ăp n’gâng kan, nsum mpôl tĭng ƀư jăp pah kan rgŏ jă, râng trong leo ƀư “Mpôl tahen nsum suan rdâk njêng ƀon lan mhe”.