Jay tă dak bât Dak Nting nklăp 500 mét ta bah dâng tu dak, nô K Thu, nuĭh Bunong, thông Quảng Tiến, xă Quảng Sơn, lĕ nchrăp ur n’hanh 2 hê kon jêt hăn jay jay ta nklang xă gay njrăng nău rlău ndal. Du hê nô K’Thu gŭ kâp jay, ƀư mir n’hanh kâp nău rvê.

   Kônh wa rêh bah kơi dak bât aơ rvê ngăn, mih mro kơt aơ pơng rlăp mô gĭt. Dăn ăp gưl n’gâng kan lah mô mkra, nkra dơi nău pĭch rlâm ri nkra dâl dak bât gay kônh wa dơi oi rvê. Dak bât aơ lah chah ri rnăk wâl bah kơi geh dak klôn rlu lĕ.

Wa Vũ Tiến Lư, Bi thư Nkuăl ủy Dăk Glong, n’gor Dak Nông, khay 8/2023, jêh rnôk geh pĭch rlâm, chah đang jâng dak bât thủy điện Dak N’ting, xă Quảng Sơn, nkuăl mbơh ƀư trơn 34 rnăk bah dâng dak. Jêh đêt năm, nuĭh ƀon lan lĕ plơ̆ tay gay rêh n’hanh pah kan. Aƀaơ, tâm tơm yan mih hô, geh nău klach đah dak bât aơ dŭt jêrr njrăng, an ơm mkra gay đăp mpăn nău rêh n’hanh drăp ndơ an nuĭh ƀon lan.

Dak Bât Dak Nting 1 năm aơ jêh khuch djơh ri mô hŏ dơi năl nkô̆ nău. Yor nê, gâp dăn đă ơm an uănh lah nkô̆ nău mkra dak bât aơ.

Nău mkra dak bât Dak nting geh pĭch rluh n’hanh đang dơi năl lah ndăn. Yơn lah, wa Phạm Tuấn Anh, Giám đốc N’gâng kan tuch tăm mât rong n’hanh hun hao ƀon lan n’gor Dak Nông an lah dôl vĭ veh n’hanh mbrơi năl nkô̆ nău kơt mkra ndơ aơ. Lĕ tŏng du năm yơn mô dơi năl nkô̆ nău yor ndâk ƀư, ndâk ƀư môh lah yor trôk nar. Tĭng wa Phạm Tuấn Anh, geh nău ăp nuĭh ndrănh “hôm e dêr” râng uănh năl nkô̆ nău ndơ ƀư.

Nău jêr jŏt ngăn lah joi ntŭk kan mbơh ntĭm geh nău dơi, tơm prăk gay ƀư tĭng nău kan aơ. Tâm rnôk ƀư, mpôl hên jă dŭt âk ntŭk kan tât gay hăn uănh yơn khân pơng tât hăn uănh khân pơng sĭt êng, jêng tât ƀư mbrơi. Jŏ tât dăch aơ Viện Khoa học dak bât khân pơng mư dơn nău, aƀaơ lĕ tâm ban ŭch mbra ký ton gay ƀư tĭng nău kan aơ.

Nău nchrăp ƀư n’glău n’gâr dak Dak Nting geh dĭng lĕ rnoh ntuh kơl 137 rmen prăk, bah tơm prăk bôk nău kan rƀŏng tĭng rgâl trôk nar n’hanh n’hao uĕh nđĭr lvang 2016-2020 n’hanh manh tơm prăk n’gor. Nău nchrăp ƀư yor Ban Mât uănh ăp nău nchrăp ƀư ntuh kơl ndâk ƀư n’gor Dak Nông ƀư tơm ntuh kơl. Bôk khay 8/2023, ndơ ƀư geh pĭch rlâm, đang chah săk bât rnôk geh bêng dak. Ban ntĭm rđău Ngih dak mpeh njrăng n’gang trôk nar yor Groi Kruanh N’gâng kan tuch tăm mât rong Nguyễn Hoàng Hiệp, Groi Kruanh ban leo trong lĕ tât hăn uănh nđôi n’hanh ntĭm rđău ăp trong mkra jăch ndăn kơt jŏ jong. UBND n’gor Dak Nông ntĭm rđău ndăn mĭn nkô̆ nău n’hanh mkra ndơ ƀư, yơn tât aƀaơ hôm e rlu du ntŭk. Wa Hồ Văn Mười, Kruanh UBND n’gor Dak Nông an lah, geh nău mô tŏng âk, mô lĕ đah nău nău kan tâm nău mkra, ndâk ƀư dak bât Dak Nting.

Rƀŭn nkah ntĭm đah sam ƀŭt, lah âk tơ̆ mô ƀư, lah Dak Nting yan aơ pĭch rlâm, geh nău khuch tât nău rêh kon nuĭh, drăp ndơ nuĭh trok. Ma rlău du năm aơ hôm, tât aƀaơ mư dơi joi trong gay năl, ma năl tâm yan mih aơ lah du nău êng tay.

Trung ương ntĭm rđău ndăn, n’gor ntrôl, ndrĭ yơn nău năl nkô̆ nău n’hanh mkra nău pĭch rlâm, chah đang dak bât Dak Nting, xă Quảng Sơn, nkuăl Dak N’glong, n’gor Dak Nông, lŏ mbrơi. Tâm rnôk nĕ, nău geh đah dak bât aơ dŭt jêr njrăng tâm rnôk yan mih dak lip hô, nău rêh n’hanh drăp ndơ nuĭh ƀon lan bah dâng geh ntêt nkri.