Nar 24/11, Bộ Công Thương ƀư rgum nchră tăch rgâl Việt Nam - Á Âu đah nkô̆ “Bên di rnôk jêr jŏt- Ntik luh săk geh”. Nkual Á – Âu lah ntŭk tăch rgâl way ơm bah Việt Nam n’hanh aƀaơ dơi  ŭanh lah ntŭk tăch n’gluh săk geh. Aơ lah tâm ntêng lêng nkual lĕ rngôch 28 dak, njok bah Đông Âu tât Trung Á, rnoh âk rlău 400 rkeh nuĭh n’hanh lĕ rngôch GDP bơi 4.500 rmen USD.

9 khay năm 2023, tâm rsong tăch rgâl đah Việt Nam n’hanh ăp dak nkual Á – Âu geh 9 rmen USD. Tâm nê tăch n’gluh bah Việt Nam tât nkual dja rlău 6 rmen USD; rvăt n’glăp geh bơi 3 rmen USD. Bộ Công Thương đah nău ƀư lah nhih pah kan ƀư tơm ăp nău kan tâm boh wăng sa- tăch rgâl bar ding n’hanh âk ntil ta nkual Á Âu, mbra kan nsum tay đah ăp nhih pah kan dơi kan, ndrel hăn đah nsum mpôl doanh nghiệp gay rƀah gĭt n’hanh ndăn dŏng tâm boh mhe, droh rklaih jêr jŏt, kŏ kol ntrŭt ntrôl ăp nău kan tăch rgâl n’hanh ntuh kơl./.