Lah nkuăl tâm kâng n’har đah 2 xã Đăk Nuê ndrel Đăk Lieng ri trong Quốc lộ 27, trong rlet ƀon Tơ, xã Đăk Liêng, nkuăl Lăk, n’gor Dak Lak bah năp aơ lah du ntŭk ôch ƀư nkhŭt ndŏk âk, jong ngai bơi tât 100m. Gay ma rklaih dơi ntŭk ôch ơ, rmôt kan druh ndăm 2 xã Đăk Liêng ndrel Đăk Nuê hŏ vay hăn rgum ndrel ma rklaih ndŏk nkre rnglăp camera mêt uănh gay ma năn saơ ndrel rklaih ăp nau ƀư tih. Tĭng yuh Sao Mai Len, Bí thư Đoàn Xã Đăk Liêng, nau kan “rnglăp camera đăp mpăn jut ntŭk ôch ân ndŏk” geh ƀư tâm dŭt khay 7/2023, hŏ ngăch ƀư geh săk tam:

‘Bah năp nơh ri hên kŏ nchih bảng “mô ân nkhŭt ndŏk” yơn lah mô geh nau dơi. Jêh rnôk phung hên ƀư nglăp Camera ri kŏ geh 2 nŭih, du nŭih ri nơm nkah ân păng bư ueh tay ntŭk nê. Hôm nŭih tal bar ri UBND xã dê mhal, rnoh mhal rnôk nê lah du rkeh. Lah nsum jêh rnôk phung hên ƀư rnglăp camera aơ ri âk rnăk vâl hŏ blau n’huch oi nau nkhŭt ndŏk. Nau mĭn nau gĭt bah ƀon lan kŏ geh n’hao prêh, ê geh nŭih ƀư tih tay ôh”.

            Yuh Phan Thị Hoa, tâm ƀon Tơ, xã Đắk Liêng, rêh êp nê, kŏ kơt dơn geh âk nau rgâl ueh:

            ‘Ntơm nar geh nglăp camera ri saơ geh nau ueh oi, geh ntơm 70-80%, kơt lah rnôk aơ ri mô geh bu nkhŭt ndrŏk ta nê tay ôh. Mhâm ƀư ân ntŭk ntu, trong hăn kloh ueh lah nơm mra râng ƀư, yor nê lah nau kan geh nau ueh bah nau rêh”.

            Gay ƀư rjăp nau jut lĕ ntŭk geh âk ndrŏk tâm nkuăl tâm kâng n’har, đoàn viên, druh ndăm 2 xã Đăk Liêng ndrel Đăk Nuê hôm ƀư tăm kao, tăm pih kao tâm ăp trong. Tât rnôk aơ, nkuăl aơ ntơm geh tơm kao chăt jêng ueh ngăn.

            Tĭng nô Phạm Ngọc Thắng, Bí thư Đoàn nkuăl Lăk, rnglăp Camera ndrel tăm kao gay ma jut ntŭk ôch ân ndrŏk lah nau kan mhe, ueh, tâm di ma nau ngăn geh bah nkuăl. Bah nê rgop nau n’hao nau dơi bah mom ndăm tâm nau kan mât ntŭk ntu gŭ âm, êp ăp nau kan ntơm ƀư kan nsum ty mât ntŭk ntu, nar prao hăn kơl an mô lah nar pơh ndrih kŏ geh ƀư ntơm sa ơm tât rnôk aơ. Nau nglăp camera ndrle ƀư ăp nau kan mô kâp geh nkô̆ nau sŏk prăk mhal, yơn bah nau mhal du đê̆ nŭih ƀư leo trong lor ri mra jêng nau rêng ueh ngăn tât ăp nŭih ƀon lan, kơt an khân păng gĭt rjăp lơn tam nau rgum ndŏk:

‘Bah nau kan kơt nê ri nơm saơ ueh ndrel ma tâm di, đoàn viên druh ndăm geh nau dơi tâm kơl tâm nau kan mât ntŭk ntu. Tâm rnôk tât, Rnâng kan đoàn nkual mra nchrăp ntrŭnh âk nau kan tâm 11 xã, nkuăl têh, ăp xã mra ƀư du ntŭk. Jêh nê ăp xã mra tâm rgop nsum đah Rnâng kan mât ăp thôn, ƀon ƀư pơk rêng hvi tay nau kan aơ. Nglăp camera aơ lah ăp nhoat bôk năp ma dơi n’hao nau mĭn bah ƀon lan, nkre ƀư pơk rêng tâm kơt gay ma geh nau nchâp, tă bah nê ƀon lan mra geh nau tâm kơt ueh lơn. Kŏ ŭch lah mra bonh đă ăp balư mom, druh ndăm ndâk dơi ăp nau tâm boh kan nsum rgum ndŏk, lah dơi geh nau tâm ban bah ƀon lan mra rgop tâm nau ƀư nau kan ueh ngan’.

            Kŏ tĭng nô Phạm Ngọc Thắng, nau mĭn ƀư rnglăp camera ndrel tăm kao gay ma njrăng lơi nau bu nkhŭt ndrŏk, bol ma ƀư ueh nau kan, yơn mô dơi rklaih tât dŭt tât lôch bah nau kan. Mô ân nkhŭt ntŭk aơ, bu lŏ nkhŭt ntŭk êng, yor rnôk aơ âk ƀon, âk xã tâm nkuăl ê geh ntŭk gay ma rgum ndŏk du ntŭk, ê dơi rklaih ndrŏk ân tâm ban tâm di ndrel ê geh nau rgum ndŏk. Knŭng nau rgum, nsŭn, rklaih ndŏk geh dơi rklaih tâm ban, ăp camera, mir, mir kao, ntŭk tăm kao gay ma rdâng lơi nau ân ndrŏk mơ geh ƀư săk tam jŏ jong./.