Ôi ntri (6/12), HĐND n’gor Dak Lak ntơm pơk rơh hop tâl 7, khóa X, năm kan 2021-2026. Aơ lah rơh hop kêng dŭt năm gay mĭn uănh, năl gĭt nô năi tĭng ƀư Nghị quyết bah Hội đồng Nhân dân n’gor mpeh nău dơn kan hun hao wăng sa- rêh jêng kon nuĭh năm 2023, n’gluh nău dơn kan, trong nkra tĭng ƀư nău kan năm 2024 n’hanh an nău rgop âk bôk nău kan, trong nchrăp khlay bah n’gor. Nchrăp rơh hop ƀư tâm 3 nar.

Ta rơh hop dja, Hội đồng Nhân dân n’gor Dak Lak mĭn uănh ăp nău mbơh mpeh pah kan njrăng n’gang nuĭh tih n’hanh nău tih pháp luật ta n’gor, pah kan njrăng n’gang sa khâm, nkra nău lah phong, djăt Ủy ban Mặt trận tổ quốc Việt Nam n’gor mbơh mpeh pah kan râng rdâk njêng n’gâng kan, mĭn uănh lôch jêh nău ơh, nkra nău dăn đă bah cử tri n’hanh ƀư rơh  tâm nchră. Lah ta rnôk ntơm pơk rơh hop, wa Huỳnh Thị Chiến Hoà, Kruanh Hội đồng Nhân dân n’gor Dak Lak an gĭt: ăp  nău rgop n’hanh nău n’glêh an tâm nchră ta rơh hop mbra njêng ntŭk nsing tâm di, suan ntrôl an hun hao wăng sa- rêh jêng kon nuĭh, đăp mpăn njrăng n’gang neh dak- rnă njrăng, rdâk njêng lam trong chính trị tâm dâng bah n’gor tâm năm 2024 n’hanh ăp năm bah kơi nê.