Kêng măng 6/9, Thủ tướng Chính phủ Phạm Minh Chính hŏ râng rƀŭn gưl prêh ASEAN + 3 đah Trung Quốc, Nhật Bản, Hàn Quốc) ndrel ăp gưl prêh ASEAN ndrel Hoa Kỳ ndrel đah Canada. Ta rơh rƀŭn gưl prêh ASSEAN+3 tal 26, ăp ding lah rjăp tay nau khlay bah nau tâm boh ASEAN+3 ndrel nau đăp mpăn, nâp nâl, tâm boh ndrel hun hao. Rđau kan ASEAN+3 tâm ban nau tâm rgop ntrŭnh ƀư nau nchrăp tâm boh nau kan ASEAN+3 lvang năm 2023-2027, tâm nê geh nau ƀư ueh n’hâm dăng tâm boh đah văng sa, tăch rgâl, tơm prăk dak si ...ndrel pơk hvi tâm ăp nau kan tâm boh mhe, rgum tâm nau rgâl blau mhe, đăp mpăn ndơ sa, ntrơn rgâl ŭnh nar, ntrơn rgâl mih sial, rƀŏng tât nau hun hao geh ăp ntil ndrel nâp nâl.

Thủ tướng Chính phủ Phạm Minh Chính ntoh nau ŭch ASEAN+3 mra geh nau kan ngăn, săk tam tâm nau đă ăp nau kan geh nau dơi, ndrel rlet rlau ăp nau jêr, ntul rlong.

Ta rơh rƀŭn gưl prêh ASEAN-Hoa Kỳ tal 11, Groi Tổng thống Kamala Haris lah rjăp, Hoa Kỳ ton mra ƀư rjăp ndrel hŏ jong đah ASEAN ndrel nkuăl, kơl an ASEAN ƀư nau kan tơm, lah rjăp bar ding tâm pă mbơh nau geh dơi, nau kơl an ndrel rƀŏng jŏ jong, ndrel rdâng đah nau ntul rlong nsum. Tâm rơh rƀŭn gưl prêh ASEAN-Canada, ăp ding kŏ tâm ban nau nchră nau ton lah nsum ngăn gay ndâk nau tâm boh kan nsum ASEAN-Canada.

Nar aơ lơ 7/9/2023, rđau kan ăp dak mra geh râng rƀŭn rơh rƀŭn gưl prêh ASEAN đah Ấn Độ ndrel rơh rƀŭn gưl prêh Đông Á (EAS).

Êp rơh rƀŭn, tâm lơ 6/9, Thủ tướng Chính phủ Phạm Minh Chính hŏ mâp Thủ tướng Canada Justin Trudrau, Thủ tướng Nhật Bản Kishida Fumio, rơh rƀŭn đah Tổng thống Hàn Quốc Yoon Suk Yoel ndrel Thủ tướng Trung Quốc Lý Cường./.