66 tác phẩm mpla nsơ ta mpla nsơ djôt tât âk ntil rup gui êng êng, du păng rup lah nău nkoch mpeh ăp nuĭh tahen rmôt tahen nuĭh ƀon lan, công an nhân dân tâm trong hun hao bah neh dak. Tác phẩm “Trường Sơn Đông” nkoch choat jâng nuĭh tahen ta trong Trường Sơn kăl e, rup ndah nuĭh tahen têh dăng bôl rdâng đah ndrăk bom, khĭt ôm; tác phẩm “Nău wa ntĭnh”, nkoch nău nkah ndrăy Kruanh Hồ Chí Minh tât khâl n’hanh ntĭnh ntăn cán bộ phòng không không quân ta năp nău rơh tâm lơh; Tác phẩm “Đồng đội” mpeh rup ndah nuĭh tahen n’hanh cảnh sát dak lêng tâm rnôk đăp mpăn, tâm rgop, ƀư uĕh nău kan ntop kơl, mât njrăng nuĭh ƀon lan joi ka rnôk pah kan ta dak lêng. Đah bơi 40 năm pah kan tâm tahen, tâm nĕ geh 30 năm pah kan ta Quân chủng Phòng không không quân, bôk nău nuĭh tahen lah nău ŭch dŭt têh đah họa sỹ Đào Hoa Vinh. Wa nkoch mpeh nkô̆ nău tác phẩm “Nău Wa ntĭnh”:

Gâp dŭt ŭch đah bôk nău wa Hồ đah rmôt phòng không không quân yor rnôk nĕ, nuĭh an tahen quân chủng phòng không không quân 11 tơ̆ tât khâl, tât ta ntŭk tâm lơh tât khâl cán bộ, tahen geh tâm ăp năm lơh mprơh Mỹ. Rlău ma chop khâl, ntrŭt đă, nău rêh bah cán bộ, tahen ri ăp nău ntĭnh ntăn bah nuĭh ngăn ngên lah kim chỉ Nam an nău ƀư, nău kan bah quân chủng phòng không không quân, mô di tâm rnôk tâm lơh, mô di tâm lvang tâm lơh tâm su ma tâm rnôk đăp mpăn dâl, ndâk njêng n’hanh mât njrăng Bri dak ri ăp nău ntĭnh bah nuĭh hôm e khlay n’hanh n’ăp tahen lah nsum, phòng không không quân lah êng hôm e djôt nău ntĭnh bah nuĭh n’hanh uănh nĕ lah nău rƀŏng nsrôih tiăr nti tâm nău kan ndâk njêng n’hanh mât njrăng Bri dak aƀaơ.

Mpla nsơ geh tât râng bah 66 nuĭh lah hội viên Câu lạc bộ nchih rklă bôk nău mât njrăng Neh dak n’hanh ăp họa sỹ ta Hà Nội, Nghệ An, Thanh Hóa, Thái Bình, Phú Thọ, Hải Phòng... Lĕ rngôch tác phẩm dơi mĭn rklă tâm năm 2023. Dơi uănh, bah meng tác phẩm bah ăp nuĭh pah kan tâm tahen, công an nhân dân, mpla nsơ năm aơ hôm geh ăp trong uănh mhe bah ăp nuĭh druh ndăm pah kan bah dih nău kan. Uănh lah prêh uĕh n’hanh nkô̆ nău nkoch bah ăp tác phẩm mpla nsơ “Hăn ndrel tahen” năm 2023, wa Nguyễn Bằng Lâm, Tă ƀư Groi kruanh Hội Mỹ thuật Việt Nam an lah:

Mpla nsơ aơ gâp uănh lah prêh, prêh mpeh rnoh nuĭh njuăl, âk mpeh rnoh tác phẩm n’hanh lơn lah ăp tác phẩm mât njrăng bri dak, nuĭh tahen nar aơ dơi lah tâm mpla nsơ aơ. Mpôl hên saơ rhơn bôk nău rmôt tahen cách mạng mô lah bôk nău cách mạng mât njrăng bri dak hôm e dơi ăp nuĭh uănh tât, n’ăp ăp nuĭh lĕ rlău rơh tâm lơh tâm su n’hanh lơn lah geh âk nuĭh druh ndăm mô tă tâm lơh tâm su yơn bu hôm e mĭn rklă. Nĕ lah nău mbơh răm gay nchrăp an năm 2024 mpla nsơ lam dak mpeh bôk nău rmôt vũ trang cách mạng, du rơh rgum têh bah ăp nuĭh mỹ thuật mpeh bôk nău rmôt vũ trang cách mạng, ndrel đah uănh an ndơ nkhôm 5 năm bah N’gâng kan mât njrăng bri dak năm 2025.

Uĕh đah nkô̆ nău n’hanh trong ƀư âk ntil mpeh bôk nău tahen kahan ƀon lan, công an nhân dân tâm rơh tâm lơh n’hanh aƀaơ, yuh Nguyễn Mai Anh, pah kan ta nkual ƀon têh Hồ Chí Minh gĭt năl:

Ăp họa sĩ lĕ nkoch tă bah ntơr uĕh, rup ndah, trong treh, trong treh dŭt rbân uĕh mô lah geh âk rup uĕh yơn he uănh saơ rup ndah n’hanh nău mbơh ma rup gui ŭch nkoch, dơi saơ nău rŏng đah tahen n’hanh nuĭh tahen ƀon lan mât njrăng bri dak.

Lah kơt rnoh tác phẩm râng ăp mpla nsơ bah năp đaơ mô âk, ri đah mpla nsơ “Hăn ndrel đah tahen” năm aơ, ăp tác phẩm dăn râng mô knŭng ntoh lư đah rnoh ma uĕh mĭn rklă dŭt uĕh đŏng. Aơ lah jâng nsan gay ăp họa sĩ rgum tay mĭn rklă mpeh bôk nău tahen vũ trang n’hanh tâm lơh tâm su cách mạng, rƀŏng tât nkah gĭt 80 năm Nar ndâk njêng tahen ƀon lan Việt Nam tâm năm tât.