Tạ Thị Thuỳ Linh ndrel Nguyễn Mai Thảo Anh lah bar đảng viên geh lăp Đảng. Lĕ bar kon se aơ lah nti blau tâm 12 năm mro. 3 năm Phổ thông trung học kŏ geh nau nsôih râng nau kan bah Đoàn druh ndăm. Khân păng lah Lớp phó ƀư nau kan ntĭm nti, lah Groi Bí thư Chi đoàn bah jrâu nti. Thuỳ Linh mra lăp nti ngih săm ƀŭt Đại học Phòng cháy chữa cháy, hôm Thảo Anh mra nti Đại học Luật, Đại học Quốc gia Hà Nội. Tạ Thị Thuỳ Linh nkoch nau rnôk geh lăp đảng:

            ‘Rnôk geh lăp đảng ri gâp lơn ma nsôih lơn tay đŏng tâm âk nau kan. Mro nsôih ntĭm nti ân ueh ndrel mra geh nau rgop ueh lăng ân nau rêh jêng”.

            Nguyễn Mai Thảo Anh ri mbơh:

            ‘Me mbŏ ndrel ăp wa tâm rnăk vâl gâp lah đảng viên ri ma gâp geh âk ngăn nau rnơm tâm Đảng. Mbŏ me gâp kŏ ntĭm nti nau mĭn nau blau ân gâp. Bŏ gâp dŭt n’hâm kơl an âk ngăn ân gâp”.

            Nai nti Trần Văn Công, Bí thư Chi bộ 2, Đảng bộ Ngih săm ƀŭt Trung học Phổ thông Buôn Đôn mbơh: năm nti 2020-2021 Ngihs ăm ƀŭt THPT Buôn Đôn nglăp đảng viên bôk năp lah kon se nti lôch jrâu 12. Aơ lah du nhoat mhe bah Đảng bộ, yor rnôk nê mô đê̆ nai ntĭm nti kon se lah đảng viên hôm geh nau mĭn, vĭ vĕ. N’ăp ma me mbŏ kon se kŏ ân lah: Lăp Đảng lah ơm ir rđil đah năm mom rnôk aơ.

            ‘Đah ma ăp nŭih geh nau blau, gay ma nơm ntĭm nti ân geh lăp Đảng lah du nau kan dŭt n’hâm khlay ngăn. Ndri ma, êng nau kan nai ntĭm nti, ăp nŭih đảng viên ơm hŏ kơl an nchiăr nti ân ăp kon se ri hên kŏ mro tâm mâp mbơh nau ma rnăk vâl gay ma rnăk vâl kơl an ntop tay ân kon se. Gay rnôk geh lăp Đảng lah geh nau đăp mpăn ngăn ndrel năl kloh nau mĭn ƀư nau kan ân kloh ngăn gay geh nsôih lôch nau rêh bah nơm”.

            Nai nti môn Văn Trịnh Thị Dung, nŭih nti kon se bah jŏ năm ndrel lah nai ntĭm chủ nhiệm 18 năm ân lah: Nau kan ntĭm nti ân kon se geh nau ŭch rŏng dak ndrel gĭt kloh mpeh nau mĭn kan bah Đảng, nau nsôih chiărr nti bah săk nơm lah nau kan khlay, ngăn lah đah kon se jrâu 12:

         ‘Lah du hê đảng viên tĭng uănh mbơh ăp đoàn viên tât chi bộ, kŏ kơt lah uănh ăp đồng chí ri gâp rhuăt luh nau tă blau, tal bôk năp rnôk ma kơl an ăp kon se gĭt nau mĭn blau kan bah Đảng kŏ kơt lah nau rŏng dak ri saơ ăp oh nôih, nsôih lơn, tal bar đŏng nâp blau lơn tâm âk nau kan kơt lah tâm nau rêh ndrel ma tâm rnôk dôl ntĭm nti”.

            Nai nti Trần Vĩnh Trung, Groi Bí thư Đảng uỷ, Groi Hiệu trường Ngih săm ƀŭt THPT Buôn Đôn lah rjăp: Nau kan ntĭm nti ndrel rnglăp kon se nti ân lăp Đảng mro geh ăp gưl uỷ uănh khlay. Đảng uỷ mô nsôih tĭng nau geh dơi, rnoh geh âk ma mro ân geh đăp mpăn nau nâp ngăn:

            ‘Đảng uỷ vay ƀa ƀơ ăp đảng viên bah ngih săm ƀŭt hŏ geh ân lăp, hŏ  ntrơn nau rƀŭn rgum tâm ăp ngih săm ƀŭt Đại học, cao đẳng tâm lam dak. Bah nau geh uănh ri ăp đồng chí aơ hun hao ueh ngăn mpeh nau dơi, nau dăng blau bah nơm. Geh nau nsôh leo trong râng ăp nau kan tâm ăp ngih săm ƀŭt Đại học, ndrel lah ngoai tâm ăp nŭih ntoh lư tâm nau kan bah druh ndăm ăp ngih săm ƀŭt Đại học”.

            Nkuăl Buôn Đôn geh 2 ngih săm ƀŭt Phổ thông Trung học. Tâm năm kan aơ hŏ geh rnglăp 18 đảng viên lah kon se nti. Êng năm 2023-2024 geh 6 kon se geh lăp Đảng. Wa Ngô Cự Tâm, Kruanh Rnâng kan nkuăl uỷ Buôn Đôn mbơh: ăp năm Ntŭk kan ntĭm nti Chính trị bah nkuăl tâm rgop nsum ma Đảng uỷ 2 ngih săm ƀŭt THPT pơk ăp jrâu ntĭm nti nau gĭt tât Đảng tâm ngih săm ƀŭt. Pơk ân nŭih đảng viên ntơm bah ngih săm ƀŭt THPT, gay jêh lôch lôch nti jrâu 12, lăp tâm nau rêh, nau kan, ăp oh hŏ gĭt kloh nau mĭn ƀư kan ndrel nau ŭch bah nơm:

            ‘Jêh lôch lôch nti sĭt tâm nkuăl nơm ri Đảng bộ nkuăl dŭt n’hâm kơl an, rđau đă ăp đảng bộ, chi bộ tâm ntŭk kan kŏ kơt lah chi bộ tâm dâng kơl an âk ngăn. Pơk trong ân ăp oh lŏ nsôih gay ân geh lăp Đảng”./.